Baby Bag

რას უნდა მიაქციოს ყურადღება აბიტურიენტმა შედეგების გაგების შემდეგ? - მნიშვნელოვანი რჩევები აბიტურიენტებს

რას უნდა მიაქციოს ყურადღება აბიტურიენტმა შედეგების გაგების შემდეგ? - მნიშვნელოვანი რჩევები აბიტურიენტებს
აბიტურიენტების აქტუალურ კითხვებს შეფასების და გამოცდების ეროვნული ცენტრის საგამოცდო პროცესების მართვის სამსახურის უფროსი მაია გაბუნია პასუხობს.

სულ რამდენიმე დღეში აბიტურიენტები შეიტყობენ აპელაციის შედეგებს. რა დრომდე ექნებათ შესაძლებლობა, ცვლილება შეიტანონ საკუთარ გვერდზე საგანმანათლებლო პროგრამების რეიტინგულ სიაში?

საგანმანათლებლო პროგრამების ჩამონათვალში ცვლილებების შეტანის შესაძლებლობა აბიტურიენტებს აპელაციის შედეგების გამოქვეყნებიდან მომდევნო დღის 18:00 საათამდე ექნებათ. კონკრეტული რიცხვი დაზუსტებისთანავე გამოქვეყნდება. ამიტომ კიდევ ერთხელ ვთხოვ აბიტურიენტებს, ყურადღება მიაქციონ ჩვენს ვებ- და ფეისბუკგვერდებზე გამოქვეყნებულ ინფორმაციას.

რას გულისხმობს პროგრამების ცვლილება?

ეს ცვლილებები, რა თქმა უნდა, გულისხმობს იმას, რომ აბიტურიენტს შეუძლია წაშალოს, დაამატოს ან გადაანაცვლოს საგანმანათლებლო პროგრამა ე. წ. საკუთარ რეიტინგულ სიაში. კიდევ ერთხელ გავიმეორებ, ამის შესაძლებლობა მსურველებს აპელაციის შედეგების გაგების შემდეგ კიდევ ერთი დღის განმავლობაში ექნებათ.

აპელაციების შედეგების გამოქვეყნების შემდეგ, გარდა პროგრამების ცვლილებისა, კიდევ რას უნდა მიაქციოს ყურადღება აბიტურიენტმა?

თუ აბიტურიენტი აპელაციის შედეგებს არ ელოდება, ამ შემთხვევაში მისთვის მნიშვნელოვანია გათანაბრებული და სკალირებული ქულების შესახებ ინფორმაციის მიღება, რაც ამ პროცესის დასრულების შემდეგ ქვეყნდება. იმ საგნებში, რომლებშიც იყო ტესტის რამდენიმე ვარიანტი, გათანაბრების შედეგად ქულა შეიძლება შეიცვალოს. ამ ცვლილების შედეგად აბიტურიენტმა შესაძლოა გადალახოს მინიმალური კომპეტენციის ზღვარი მაშინაც კი, თუ მას პირველადი შედეგების გამოცხადებისას არ ჰქონდა ბარიერი დაძლეული.

რამდენი პროგრამის არჩევა შეუძლია აბიტურიენტს?

როგორც შეფასებისა და გამოცდების ეროვნულმა ცენტრმა თავის გავრცელებულ განცხადებებში არაერთხელ აღნიშნა, აბიტურიენტი საკუთარი არჩევნის რაოდენობაში შეზღუდული არ არის. ყოფილა შემთხვევები, როდესაც აბიტურიენტს 100-ზე მეტი არჩევანი გაუკეთებია და იყო შემთხვევაც, როდესაც მხოლოდ ერთი არჩევანი გააკეთა - მისთვის მხოლოდ ეს ერთი პროგრამა იყო მნიშვნელოვანი. ცენტრი ურჩევს აბიტურიენტებს, მაქსიმალურად გამოიყენონ ეს შესაძლებლობა. ამასთან, რაც ყველაზე მნიშვნელოვანია, გააკეთონ რეალური არჩევანი - გაითვალისწინონ საკუთარი შეფასება და გადახედონ კონკურსს კონკრეტულ პროგრამებზე, რისი შესაძლებლობაც მათ აქვთ.

ხშირად გვეკითხებიან, როგორ გააკეთონ რეიტინგული ჩამონათვალი და რის მიხედვით შეარჩიონ პირველი პროგრამა? ჩემი პირადი რჩევა ასეთია: პირველი ყოველთვის დაწერეთ ის საგანმანათლებლო პროგრამა, რომელზეც ყველაზე მეტად გსურთ ჩარიცხვა და სწავლის გაგრძელება, შემდეგ კი შეგიძლიათ განუსაზღვრელი რაოდენობით მიუთითოთ პროგრამები ცნობარში მითითებული ინფორმაციის გათვალისწინებით.

თუ აბიტურიენტს პროგრამა პირველ ადგილას აქვს მითითებული, მაგრამ უკეთესი ქულები აქვს იმ აბიტურიენტს, რომელსაც ეს პროგრამა მეორე ან მესამე ადგილას უწერია, ვის მიენიჭება უპირატესობა ჩარიცხვის დროს?

იმ შემთხვევაში, თუ ერთ აბიტურიენტს აქვს მეორე აბიტურიენტზე მაღალი ქულები, მაგრამ არ აღმოჩნდა საკმარისი პირველ და მეორე ადგილზე ჩასარიცხად, სისტემა პირველ რიგში განიხილავს მაღალქულიანი აბიტურიენტის ჩარიცხვის საკითხს. მიუხედავად იმისა, რომ ეს კონკრეტული პროგრამა მას, ვთქვათ, მესამე ადგილზე ჰქონდა მითითებული. ისიც გასათვალისწინებელია, რომ იმ შემთხვევაში, თუ გამოცდებში მონაწილეს ქულა ეყოფა პირველ არჩევანზე ჩასარიცხად, მომდევნო არჩევანზე მისი ჩარიცხვა აღარ განიხილება.

თუ აბიტურიენტმა ჩააბარა მათემატიკაც და ისტორიაც და ერთ-ერთ საგანში ვერ გადალახა კომპეტენციის მინიმალური ზღვარი, რა უნდა გაითვალისწინოს მან საგანმანათლებლო პროგრამების არჩევისას?

ასეთ შემთხვევაში აბიტურიენტმა კარგად უნდა გადაამოწმოს არჩევანი და ჩამონათვალში დატოვოს მხოლოდ ის პროგრამები, სადაც ჩაირიცხება იმ საგნით, რომელშიც გადალახა მინიმალური კომპეტენციის ზღვარი.

დამატებით რას ურჩევდით აბიტურიენტებს?

აბიტურიენტებს ვთხოვ ყურადღება მიაქციონ მათთვის განკუთვნილ ცნობარში მოცემულ ინფორმაციას. ვებგვერდზე გამოქვეყნებულ ამ დოკუმენტში ასახულია ყველა ის ცვლილება, რომლებიც განხორციელდა რეგისტრაციის დაწყებიდან (ვგულისხმობ ინფორმაციას აკრედიტაციის შესახებ).

ცნობარში ასევე მოცემულია ცხრილები, რომლებშიც ასახულია უმაღლესი საგანმანათლებლო დაწესებულებების მონაცემები, თითოეული გამოცდისათვის მინიჭებული კოეფიციენტები, მინიმალური კომპეტენციის ზღვარი და სწავლის საფასური, თუ რომელ ქალაქში ხორციელდება ესა თუ ის პროგრამა და სხვ. მიუხედავად იმისა, რომ საგამოცდო პროცესის ძირითადი ნაწილი დასრულებულია, კიდევ უფრო მნიშვნელოვანი ეტაპი წინ არის. ამიტომ აბიტურიენტებს ვურჩევ აუცილებლად გადაამოწმონ საკუთარი არჩევანი და რაც ყველაზე მნიშვნელოვანია, არ დაივიწყონ ნებისმიერი ცვლილების დამახსოვრება.

შეიძლება დაინტერესდეთ

ეროვნულ სასწავლო გეგმაში მნიშვნელოვანი ცვლილებები შევიდა

ეროვნულ სასწავლო გეგმაში მნიშვნელოვანი ცვლილებები შევიდა

საქართველოს განათლებისა და მეცნიერების სამინისტროს ინიციატივით ეროვნული სასწავლო გეგმის ცვლილებებზე მუშაობის პირველი ეტაპი დასრულდა. განახლებული დოკუმენტი საჯარო და კერძო სკოლებისთვის მეტი ავტონომიის მინიჭებას გულისხმობს.

ცვლილებები სწავლა-სწავლების დაგეგმვასა და წარმართვასთან დაკავშირებულ ყველა კომპონენტს შეეხო, მათ შორის, როგორც სწავლა-სწავლების პრინციპებს, მიზნებსა და შინაარსობრივ პრიორიტეტებს, ასევე, სწავლების მეთოდებს, შეფასებასა და სასწავლო პროცესის ორგანიზებას. შედეგად, სწავლა-სწავლების თითოეული კომპონენტი უფრო მიმართულია ზოგადსაგანმანათლებლო დაწესებულებების მხარდაჭერაზე და მეტ შესაძლებლობას აძლევს სკოლებს, შემოქმედებითად და მოსწავლის საუკეთესო ინტერესების გათვალისწინებით დაგეგმონ სასწავლო პროცესი.

ცვლილებების თანახმად:

  • მკაფიოდ გამოიკვეთა, თუ რას გულისხმობს მოსწავლეზე ორიენტირებული, სიღრმისეული სწავლა-სწავლება.
  • განისაზღვრა პრინციპები, რომლის საფუძველზეც ყალიბდება სწავლა-სწავლების შედეგები და შუალედური სასწავლო მიზნები.
  • დაკონკრეტდა პრინციპები, რომლის საფუძველზეც მასწავლებლებმა უნდა აწარმოონ განმსაზღვრელი და განმავითარებელი შეფასება.
  • დაკონკრეტდა სასკოლო სასწავლო გეგმის ფუნქცია და მნიშვნელობა.
  • ახლებურად ჩამოყალიბდა ეროვნული სასწავლო გეგმის მიზნები (ზოგადი განათლების ეროვნულ მიზნებზე, კვალიფიკაციების ჩარჩოზე და XXI საუკუნის კომპეტენციებზე დაფუძნებით).
  • ახლებურად ფორმულირდა მიზნები თითოეული საგნორივი ჯგუფისთვის საფეხურების მიხედვით. კერძო სკოლებს უფლება მიეცათ, თავად განსაზღვრონ, რა საგნებს ასწავლიან (რა სასწავლო შედეგებს განსაზღვრავენ) ამ მიზნების მისაღწევად.
  • ეროვნული სასწავლო გეგმიდან ამოღებულ იქნა მეთოდოლოგიური რეკომენდაციები (გაუქმდა მესამე კარი, სადაც წარმოდგენილი იყო რჩევები – თუ როგორ შეიძლებოდა წლიური პროგრამების დაგეგმვა).
  • გაუქმდა განმსაზღვრელი შეფასებების კომპონენტები (საკლასო, საშინაო, შემაჯამებელი) და მოდელები. სკოლებს თავად შეუძლიათ შექმნან განმსაზღვრელი შეფასების ორიგინალური სისტემა და პრინციპები, რომლის მიხედვითაც სასკოლო სისტემაში დაწერილი ნიშნების კონვერტირება მოხდება ეროვნული სასწავლო გეგმით განსაზღვრულ 10 ბალიან სისტემაში.
  • კერძო სკოლებს უფლება მიეცათ, განსაზღვრონ არა კლასის, არამედ საფეხურის დაძლევის ბარიერი.
  • თუ მოსწავლეს კლასში რომელიმე საგანში აქვს 5.0-ზე დაბალი წლიური შეფასება, სკოლა ვალდებულია, მოსწავლეს შესთავაზოს რემედიაციის პროგრამა საშემოდგომო გამოცდის ჩატარებამდე.
  • რემედიაციის პროგრამა, დაწევისა და დაჩქარებული სწავლების კურიკულუმის სახით, სკოლამ უნდა შესთავაზოს იმ მოსწავლეებსაც, რომლებიც არიან სკოლის მიღმა ან იმყოფებიან სკოლის მიტოვების მაღალი რისკის ქვეშ. კურიკულუმის შინაარსს განსაზღვრავს თავად სკოლა ეროვნულ სასწავლო გეგმაზე დაყრდნობით.
  • სკოლა თავად განსაზღვრავს სასკოლო საათობრივ ბადეს შესაბამისი დასაბუთებით მოსწავლეთა საჭიროებებისა და ინტერესების, ასევე, სკოლის ადამიანური და ფინანსური რესურსის გათვალისწინებით. ეროვნულ სასწავლო გეგმაში მოცემული საათობრივი ბადე მხოლოდ სარეკომენდაციო ხასიათისაა.
  • ეროვნულ სასწავლო გეგმაში აღარ აღიწერება საგნობრივი კათედრებისა და დამრიგებლის ფუნქციები. სკოლებს შეუძლიათ, თავად მიიღონ გადაწყვეტილება – რა ფუნქციებს შეასრულებენ სასკოლო საზოგადოების წევრები და როგორი იქნება სკოლის სტრუქტურა.
  • კერძო სკოლის უცხოენოვან პროგრამაზე ჩარიცხული უცხო ქვეყნის მოქალაქეებისთვის განისაზღვრება სახელმწიფო ენის სწავლების დონეები სწავლების წლების შესაბამისად (ენების ერთიან ევროპულ სარეკომენდაციო ჩარჩოზე დაყრდნობით).
  • ქართულ სექტორზე/სკოლაში ეთნიკური უმცირესობების წარმომადგენელი მოსწავლეებისთვის მოიხსნა შეზღუდვა, რომელიც გულისხმობს მშობლიური ენის სწავლების მოთხოვნას 10 მსურველის შემთხვევაში. შესაბამისად, ინდივიდუალურად, თითოეულ მოსწავლეს ქართულ სექტორზე სწავლების შემთხვევაში მიეცემა მშობლიური ენის სწავლების შესაძლებლობა.
  • აღსანიშნავია, რომ ასევე დამტკიცდა სახელმძღვანელოების შეთანხმების წესი, რომლის საფუძველზეც კერძო და საჯარო სკოლებს შეუძლიათ, სასწავლო პროცესში გამოიყენონ არაგრიფირებული, სამინისტროსთან შეთანხმებული სახელმძღვანელოები.

    აქვე მოგახსენებთ, რომ პარალელურად მიმდინარეობს საგნობრივი სტანდარტების რევიზიის პროცესი და დაწყებულია საგნობრივი ჯგუფების ფორმირება, რომელშიც ჩართულები არიან მოქმედი მასწავლებლები, აკადემიური წრის წარმომადგენლები და ფსიქოლოგები. რევიზიის პროცესი 2024 წლის გაზაფხულზე დასრულდება.

    წაიკითხეთ სრულად