Baby Bag

„ვერ დაველოდებით 2022 წელს, საბაზო ხელფასისა და სტატუსის დანამატების ეტაპობრივი ზრდის პროცესი უნდა დაიწყოს დაუყოვნებლივ“ - პედაგოგთა პროფკავშირი

„ვერ დაველოდებით 2022 წელს, საბაზო ხელფასისა და სტატუსის დანამატების ეტაპობრივი ზრდის პროცესი უნდა დაიწყოს დაუყოვნებლივ“ - პედაგოგთა პროფკავშირი

პედაგოგთა პროფკავშირი განათლების რეფორმის საკითხებზე მინისტრის ​განცხადებას გამოეხმაურა. როგორც მათ მიერ გავრცელებულ განცხადებაშია აღნიშნული, განათლების, მეცნიერების, კულტურისა და სპორტის მინისტრის მიერ წარმოდგენილი პროექტის ძირითად საკითხებთან დაკავშირებით განხილვები ჰქონდათ, გარკვეული ჩვენი მოთხოვნები დაკმაყოფილებულია სამინისტროს მხრიდან და პროფკავშირი მთლიანობაში პრინციპებს ეთანხმება.

„ჩვენ, მომავალშიც აქტიურად ვიქნებით ჩართული სქემის ცვლილებების და სხვა ნორმატიული აქტების პროექტების შემუშავების პროცესში.

ცხადია, მრავალ კითხვას გააჩენს და აზრთა სხვადასხვაობას გამოიწვევს პენსიონერ პედაგოგებთან დაკავშირებული მიდგომები. ალბათ იქნება ნეგატიური შეფასებებიც, რომ სახელმწიფო ზედმეტ ყურადღებას იჩენს პენსიონერი მასწავლებლებისადმი, სხვა სფეროს დასაქმებულ პენსიონრებთან შედარებით და სხვა.

შეგახსენებთ, რომ ათეული წლების განმავლობაში, მასწავლებლის საშუალო ხელფასი 2-ჯერ ნაკლებია საბიუჯეტო სექტორში დასაქმებულთა საშუალო ხელფასზე და იგი ბევრად ჩამორჩება ქვეყანაში არსებულ საშუალო ხელფასს.

ალბათ, უნდა მივესალმოთ საქართველოს მთავრობის ჰუმანურ გადაწყვეტილებას, დაბალ ანაზღაურებაზე ათეულობით წლებით განმავლობაში მომუშავე ღვაწლმოსილი პედაგოგების ამგვარი დაფასებისათვის. მიუხედავად იმისა, რომ სახელმწიფო ჯილდოს თანხა მინიმალურია.

რაც შეეხება მასწავლებელთა გამოცდებს: დადგა დრო, ყველა პედაგოგმა დაადასტუროს კომპეტენცია და პედაგოგთა კორპუსი ამისათვის მზად არის.
შემოთავაზებულ ცვლილებებში მასწავლებელთა შრომითი და სამართლებრივი უფლებები დაცულია. მასწავლებლებს აქვთ არჩევანის შესაძლებლობა, დარჩნენ პროფესიაში, თუ გავიდნენ პროფესიიდან. ახლა მთავარია, შემუშავდეს ისეთი ნორმატიული აქტები, რაც უზრუნველყოფს გადაწყვეტილების ობიექტურ განხორციელებას პრაქტიკაში.

უმნიშვნელოვანესია, პროფესიაში არ შეიქმნას დეფიციტი და არ დაზარალდეს სასწავლო პროცესი. ბევრი მუშაობა მოგვიწევს მასწავლებლის პროფესიაში შემოსვლის და კარიერული წინსვლის პროცესებთან დაკავშირებული საკანონდებლო ბაზის სრულყოფაზე.

პედაგოგთა პროფკავშირის ძირითადი მოთხოვნაა ეტაპობრივად გაიზარდოს მასწავლებლის საბაზო ხელფასი, რასაც 2014 წლიდან ვითხოვთ. პრემიერ მინისტრისა და განათლების მინისტრის განცხადების საფუძველზე 2022 წლიდან მასწავლებლის ხელფასი იქნება 1500 ლარი და ზოგ შემთხვევაში უფრო მეტიც. ვერ დაველოდებით 2022 წელს, მიგვაჩნია, რომ საბაზო ხელფასისა და სტატუსის დანამატების ეტაპობრივი ზრდის პროცესი უნდა დაიწყოს დაუყოვნებლივ,“ - წერია პედაგოგთა პროფკავშირის მიერ გავრცელებულ განცხადებაში.

შეიძლება დაინტერესდეთ

რამდენი ლარით იზრდება უფროსი, წამყვანი და მენტორი მასწავლებლების ხელფასები 2019-2020 სასწავლო წელს

რამდენი ლარით იზრდება უფროსი, წამყვანი და მენტორი მასწავლებლების ხელფასები 2019-2020 სასწავლო წელს

ოქტომბრის თვიდან პედაგოგებს ხელფასები გაეზრდებათ და ეს პროცესი ყოველწლიური იქნება, - ამის შესახებ  განათლების, მეცნირების, კულტურისა და სპორტის მინისტრმა მიხეილ ბატიაშვილმა პედაგოგებთან შეხვედრაზე განაცხადა.

„2019 წლის ოქტომბრის დასაწყისში ყველა პედაგოგს, რომელსაც აქვს სტატუსი და მინიმუმ 15 საგაკვეთილო საათი, ანაზღაურება გაეზრდება 150 ლარით.  უფროსი მასწავლებელი, სტატუსის გარდა, მიიღებს საათობრივ დანამატთან ერთად 1011 ლარს, წამყვანი მასწავლებელი - 1435 ლარს, მენტორი მასწავლებელი - 1745 ლარს. მეტი საგაკვეთილო საათის შემთხვევაში, რა თქმა უნდა, ანაზღაურება კიდევ უფრო მეტი იქნება. პედაგოგებს, რომლებსაც 15 საგაკვეთილო საათზე ნაკლები აქვთ, საშუალოდ 100 ლარით გაეზრდებათ ანაზღაურება.  ანუ ფაქტობრივად, ყველა პედაგოგს, რომელსაც სტატუსი აქვს მინიჭებული, ხელფასის ზრდა შეეხება. პედაგოგების ანაზღაურების ზრდის ტენდენცია გაგრძელდება ყოველწლიურად. ხელფასების მატება მოხდება ყოველ შემოდგომაზე,“ - აღნიშნა მიხეილ ბატიაშვილმა.

მინისტრის თქმით, პედაგოგების გარდა, ხელფასები ეზრდებათ სკოლის დირექტორებს, ტექპერსონალსა და  რესურსცენტრების თანამშრომლებს:

„პედაგოგების გარდა, ხელფასები ეზრდებათ სკოლის დირექტორებს, ადმინისტრაციის წარმომადგენლებს, ტექნიკურ მუშაკებს, საშუალოდ 20%-ით, ამ შემოდგომიდან. ეს ზრდა ყოველ შემოდგომაზე გაგრძელდება. პირველი სექტემბრიდან რესურსცენტრების ხელმძღვანელებს, თანამშრომლებს, ყველას ეზრდება ხელფასი მინიმუმ 150 ლარით“, - განაცხადა მიხეილ ბატიაშვილმა.

დღევანდელ შეხვედრაზე მასწავლებლების ხელფასების გაზრდაზე ისაუბრა პრემიერ-მინისტრმა მამუკა ბახტაძემაც.

„მასწავლებელთა სახელფასო ზრდის ისტორიაში, სწორედ ახლა ხორციელდება უპრეცედენტო და თანმიმდევრული პოლიტიკის პირველი ეტაპი, რომლის საფუძველზეც 2019 წლის ოქტომბერში, როგორც მე თქვენ შეგპირდით, ყველა მასწავლებელს, რომელსაც აქვს სტატუსი, ანაზღაურება გაეზრდება. პედაგოგების გარდა, ხელფასები ეზრდებათ რესურსცენტრების თანამშრომლებს და სკოლების ადმინისტრაციის წარმომადგენლებს, მათ შორის ტექნიკურ პერსონალს, სკოლის ექიმებს, ინკლუზიური განათლების მხარდამჭერ სპეციალისტებს, მანდატურის სამსახურის მიერ გადამზადებულ სკოლის უსაფრთხოებაზე პასუხისმგებელ პირებსაც. ხაზგასმით მინდა აღვნიშნო, რომ ხელფასების ზრდა ყოველწლიური იქნება და 2022 წელს უფროსი მასწავლებლის ხელფასი მიაღწევს 1700 ლარს; წამყვანი პედაგოგის - 2150 ლარს და მენტორი პედაგოგის - 2450 ლარს“, - განაცხადა პრემიერ-მინისტრმა.


წაიკითხეთ სრულად