Baby Bag

განათლების მინისტრი სექტემბრიდან სკოლებში ახალი საგანმანათლებლო პროგრამის დანერგვას აანონსებს

განათლების მინისტრი სექტემბრიდან სკოლებში ახალი საგანმანათლებლო პროგრამის დანერგვას აანონსებს

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა კორპორაცია Microsoft-ის განათლების მიმართულების ვიცეპრეზიდენტ ენტონი სალსიტოსთან ვიდეოკონფერენცია გამართა და მასთან სამომავლო თანამშრომლობის გეგმები განიხილა.

„COVID-19-ის პანდემიის დროს შექმნილმა კრიზისმა დაგვანახა, რომ ურთიერთდახმარებასა და გამოცდილების გაზიარებას სერიოზული გამოწვევის დასაძლევად გადამწყვეტი მნიშვნელობა ენიჭება. შეიძლება თამამად ითქვას, რომ აპრობირებული და მარტივად გამოსაყენებელი პროგრამის – Microsoft Teams-ის საგანმანათლებლო სივრცეში დანერგვამ საქართველოს განათლების სისტემის წარმატებაში მნიშვნელოვანი როლი შეასრულა. გამოცდილება, რომელიც კრიზისის დროს მივიღეთ, პოსტპანდემიურ პერიოდშიც გამოგვადგება. მჯერა, როდესაც სწავლების ტრადიციულ მეთოდებს დავუბრუნდებით, ახლადშექმნილი ვირტუალური ინფრასტრუქტურა საქართველოს საგანმანათლებლო სისტემის შემადგენელ მნიშვნელოვან ნაწილად დარჩება,“ - აღნიშნა მიხეილ ჩხენკელმა.

შეხვედრაზე მხარეებმა Microsoft-ის გლობალურ ინიციატივებში საქართველოს ჩართვის შესაძლებლობები განიხილეს. საუბარი შეეხო როგორც განათლების, ასევე, კულტურისა და ელექტრონული სპორტის მიმართულებით ახალი პროგრამების დანერგვას ზოგადსაგანმანათლებლო სკოლებსა და უმაღლეს სასწავლო დაწესებულებებში.

მიხეილ ჩხენკელმა Microsoft-ის განათლების მიმართულების ვიცეპრეზიდენტს სამინისტროს უახლოესი გეგმებიც გააცნო, კერძოდ, მინისტრი პროგრამა Microsoft TEAMS-ის ქართულ ენაზე თარგმნის საკითხს შეეხო და ამ საქმეში ენტონი სალსიტოს მხარდაჭერაც მიიღო.

მინისტრმა აღნიშნა, რომ უწყების გეგმაა სექტემბრიდან საქართველოს მასშტაბით შერჩეულ 150 სკოლაში საპილოტე რეჟიმში Microsoft-ის საგანმანათლებლო პროგრამის „Minecraft Education Edition“ დანერგვა. ეტაპობრივად კი პროგრამა საქართველოს ყველა სკოლას მოიცავს. თამაშით სწავლა – 21-ე საუკუნის პედაგოგიური მიდგომა – სასწავლო პროცესს უფრო ეფექტურსა და საინტერესოს გახდის. „Minecraft Education Edition“ პროგრამის მეშვეობით გაადვილდება საკლასო ოთახის მენეჯმენტი, ჯგუფური სამუშაოებისა და საშინაო დავალებების შესრულება კი მოსწავლეებისთვის უფრო მეტად სახალისო გახდება.

ვიდეოკონფერენციას Microsoft-ის სხვა წარმომადგენლებიც ესწრებოდნენ: რეგიონული დირექტორი ანკე დე ოინენი, რეგიონის განათლების სექტორის მენეჯერი ალბენა სპასოვა, განათლების სექტორის დირექტორი ევროპის რეგიონში პეტრონელა გოელი და Microsoft Georgia-ს განათლების მიმართულების წარმომადგენელი დავით ჭიაბერაშვილი.

მორიგი საინტერესო სიახლე განათლების სამინისტროსგან
განათლებისა სამინისტრო მშობლებს, მასწავლებლებს და სპეციალურ მასწავლებლებს მოსწავლეებისთვის მარტივ, საინტერესო და განმავითარებელი აქტივობებს სთავაზობს. აღნიშნული ​აქტივობები მშობლებს, მა...

შეიძლება დაინტერესდეთ

რას ჰპირდება განათლების მინისტრი მასწავლებლებს 2019 წლისთვის

რას ჰპირდება განათლების მინისტრი მასწავლებლებს 2019 წლისთვის

საქართველოს განათლების, მეცნიერების, კულტურისა და სპორტის მინისტრმა არაერთი გამოსვლისას აღნიშნა, რომ პედაგოგების შრომა აუცილებლად დაფასდება და მათ 2019 წლისთვის ხელფასები გაეზრდებათ. 

კონკრეტულად რა განცხადებები გააკეთა მინისტრმა 2018 წელს აღნიშნულ საკითხთან დაკავშირებით, იხილეთ მინისტრის ნათქვამი სიტყვა-სიტყვით:

„1 წლის განმავლობაში 10 000 პედაგოგს გაეზრდება ხელფასი. ხელფასების ზრდა ყოველწლიურად მოხდება. 2022 წლისთვის ჩვენ უკვე მივაღწევთ, რომ პედაგოგის საშუალო ხელფასი 1500 ლარი იყოს. ეს არის კარგად დათვლილი და გააზრებული. გაზრდილი ხელფასი მნიშვნელოვანია მათი ეკონომიკური მდგომარეობისთვის. ვფიქრობთ, რომ რეფორმას, განახლებულ პროგრამებს სჭირდება შესაბამისად მაღალანაზღაურებადი მასწავლებელი. იმიტომ, რომ დიდი მნიშვნელობა აქვს მოტივაციას. მასწავლებლების ღირსეული შრომა უნდა იყოს დაფასებული.“
„თუ პედაგოგს არ ექნა ღირსეული ანაზღაურება, ღირსეული ეკონომიკური პირობები, მას ვერ ექნება მოტივაცია და ამის გარეშე საქმე წინ ვერ წავა. მესმის, რომ დღეს ბევრი ადამიანი მართლა გმირობას სჩადის – დაუღალავად და ყოველდღიურად შრომობს, თუმცა იმისთვის, რათა სისტემურ ცვლილებებზე ვილაპარაკოთ, ჩვენ აუცილებლად გვჭირდება ადამიანთა მატერიალური უზრუნველყოფა. უკვე მომავალი წლისთვის დაგეგმილი გვაქვს ხელფასების ზრდა. ეს პედაგოგთა დიდ რაოდენობას ეხება. ამისთვის რესურსები უკვე გაწერილია.“
„თქვენ, მასწავლებლები, ყველაზე მნიშვნელოვანი და დასაფასებელი ადამიანები ხართ მთელ საგანმანათლებლო სისტემაში და მინდა, მადლობა გადაგიხადოთ იმისათვის, რომ უანგაროდ ემსახურებით ყველაზე მნიშვნელოვანს - ჩვენს ბავშვებს და მათ მომავალს. დაანონსებული რეფორმის ფარგლებში, ჩვენ გავაკეთებთ ყველაფერს, რომ სასკოლო ცხოვრება უფრო საინტერესო, კიდევ უფრო ეფექტური გახდეს და თქვენი პროფესია უფრო მეტად იყოს დაფასებული.“
წაიკითხეთ სრულად