Baby Bag

მთელი ქვეყნის მასშტაბით დაწყებითი საფეხურის პედაგოგები და სკოლის წარმომადგენლები გადამზადდებიან - სკოლებში ახალი სახელმძღვანელო შედის

მთელი ქვეყნის მასშტაბით დაწყებითი საფეხურის პედაგოგები და სკოლის წარმომადგენლები გადამზადდებიან - სკოლებში ახალი სახელმძღვანელო შედის

საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრმა გარემოს დაცვისა და აგრარული განათლების შესახებ პროგრამის პრეზენტაცია გამართა.

შეხვედრაზე პროგრამის პრეზენტაციასთან ერთად მის ფარგლებში შექმნილი სახელმძღვანელოს „გარემოს დაცვითი და აგრარული განათლება სკოლაში“ წარდგენა მოხდა.

მინისტრის მოადგილემ საზოგადოებას სიტყვით მიმართა და სკოლებში გარემოსდაცვითი და აგრარული განათლების ხელმისაწვდომობის მნიშვნელობაზე ისაუბრა.

თამარ ქიტიაშვილი: „მოხარული ვარ, რომ მაქვს შესაძლებლობა, გარემოსდაცვითი განათლების საერთაშორისო დღე აღვნიშნო იმ ადამიანებთან ერთად, რომლებიც ჩვენს ქვეყანაში ამ მიმართულების განვითარებასა და ხელშეწყობაზე ზრუნავენ.

მნიშვნელოვანია, რომ სკოლის მოსწავლეებმა მიიღონ განათლება და გამოიმუშაონ უნარ-ჩვევები როგორც გარემოს დაცვის, ასევე, აგრარული დარგის მიმართულებით. ვფიქრობ, დაწყებით საფეხურზე, როდესაც ბავშვების ცნობიერება ჩამოყალიბების პროცესშია, ამ საკითხების საგნობრივ ჭრილში ინტეგრირება და მრავალფეროვანი აქტივობებით მოსწავლეებში სწორი შეხედულებებისა და ქცევების ფორმირება კიდევ ერთი წინ გადადგმული ნაბიჯია, რაც გვაახლოებს ჩვენს საერთო მიზანთან – გვყავდეს განათლებული, სწორი ღირებულებების მქონე ახალგაზრდობა, რომლისთვისაც თანაბრად მნიშვნელოვანი იქნება გარემოს დაცვა, სოციალური კეთილდღეობა თუ ეკონომიკური განვითარება. დარწმუნებული ვარ, მომავალ თაობას ექნება გაცილებით მაღალი სოციალური პასუხისმგებლობა, რასაც საფუძველს სკოლებში სწორედ ასეთი პროგრამების დანერგვა ჩაუყრის.“

სახელმძღვანელო საქართველოს განათლების, მეცნიერების, კულტურისა და სპორტის სამინისტროსა და საქართველოს გარემოს დაცვისა და სოფლის მეურნეობის სამინისტროს სსიპ გარემოსდაცვითი ინფორმაციისა და განათლების ცენტრის თანამშრომლობით შემუშავდა. იგი დამხმარე სახელმძღვანელოა დაწყებითი საფეხურის პედაგოგებისთვის და გარემოსდაცვითი და აგრარული განათლების ხელშეწყობასა და ზოგადსაგანმანათლებლო სივრცეში ინტეგრირებას ითვალისწინებს.

სახელმძღვანელო გარემოს დაცვისა და აგრარული მიმართულებით შემდეგ თემებს აერთიანებს:

  • მდგრადი განვითარების კონცეფცია;
  • ბიომრავალფეროვნების დაცვა;
  • წყლის რესურსების დაცვა და მდგრადი მართვა;
  • ნარჩენების მართვა;
  • კლიმატის ცვლილება და ბუნებრივი კატასტროფების საფრთხეების შემცირება;
  • ატმოსფერული ჰაერის ხარისხი;
  • მიწის მართვა და გაუდაბნოებასთან ბრძოლა;
  • სოფლის მეურნეობა – სურსათის უვნებლობა და ხარისხი.


​სახელმძღვანელოს წარდგენის შემდეგ იწყება მნიშვნელოვანი პროცესი, რომელიც მთელი ქვეყნის მასშტაბით დაწყებითი საფეხურის პედაგოგებისა და სკოლის წარმომადგენლების გადამზადებას გულისხმობს.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფ​ი“)

შეიძლება დაინტერესდეთ

ინდოელ მოსწავლეებს თავზე მუყაოს ყუთები ჩამოაცვეს, რათა ტესტის პასუხები ერთმანეთისგან არ გადაეწერათ

ინდოელ მოსწავლეებს თავზე მუყაოს ყუთები ჩამოაცვეს, რათა ტესტის პასუხები ერთმანეთისგან არ გადაეწერათ
ინდოეთის სამხრეთ-დასავლეთით ჰავერის რაიონში მდებარე ერთ-ერთი კოლეჯის წარმომადგენლებმა საჯარო ბოდიში მოიხადეს იმის გამო, რაც ცოტა ხნის წინ გამოცდაზე მოხდა. კოლეჯის მოსწავლეებს თავზე მუყაოს ყუთები ჩამოაცვეს, რათა მათ ტესტის პასუხები ერთმანეთისგან არ გადაეწერათ. ინფორმაციას cnn ​ავრცელებს. სკოლის ერთ-ერთმა თანამშრომელმა გამოცდის მიმდინარეობისას მოსწავლეებს ფოტო გადაუღო და სოციალურ ქსელში განათავსა, რასაც საზოგადოების აღშფოთება მოჰყვა.

გამოცდის დაწყებამდე ყუთები წინა მხარეს ამოჭრეს, რათა მოსწავლეებს დაფისა და ტესტის ფურცლების დანახვა თავისუფლად შეძლებოდათ, თანაკლასელების ნამუშევრებს კი ვერ ხედავდნენ. სოციალურ ქსელებში გავრცელებულ ფოტოს უდიდესი გამოხმაურება მოჰყვა. ადამიანები კოლეჯის ადმინისტრაციას სასტიკად აკრიტიკებდნენ. აღნიშნული ფაქტი არც ინდოეთის ხელისუფლების წარმომადგენლებს დარჩენიათ ყურადღების მიღმა. განათლების მინისტრმა მოსწავლეებისადმი მსგავს დამოკიდებულებას „მიუღებელი“ უწოდა და განაცხადა: „არავის აქვს უფლება მოსწავლეებს ისე მოექცეს, როგორც ცხოველებს ექცევიან.“ სკოლის ადმინისტრაციამ განათლების სამინისტროს ახსნა-განმარტებითი ბარათი წარუდგინა და აღნიშნული ფაქტის გამო საჯარო ბოდიშიც მოიხადა.

კოლეჯის წარმომადგენლების განცხადებით, ფოტოზე სკოლის მიერ ჩატარებული ერთ-ერთი ექსპერიმენტია ასახული. გამოცდის დაწყებამდე მუყაოს ყუთების გამოყენებასთან დაკავშირებით სკოლამ მშობლებისგან და ბავშვებისგან თანხმობა წინასწარ მიიღო. გამოცდა სულ 72 მოსწავლეს ჩაუტარდა, მაგრამ მუყაოს ყუთები მხოლოდ 56 ბავშვს ეკეთა, რადგან დანარჩენი ბავშვების მშობლებმა ექსპერიმენტის შესახებ არაფერი იცოდნენ. ექსპერიმენტში მონაწილე ყველა ბავშვის მშობელი მუყაოს ყუთების გამოყენებას წინასწარ დათანხმდა.

„ექსპერიმენტში მოსწავლეები თავიანთი სურვილით მონაწილეობდნენ. ჩვენ არავისთვის დაგვიძალებია. ზოგიერთმა ბავშვმა თანხმობა განაცხადა, ზოგიერთმა კი უარი თქვა, მათი შეწუხება ან აღელვება არც გვიფიქრია,“ - განაცხადა კოლეჯის ადმინისტრაციის წარმომადგენელმა.

მოსწავლეებმა ყუთები წინასწარ დაამზადეს და სახლიდან სკოლაში თავად მოიტანეს. ზოგიერთმა მათგანმა ყუთი გამოცდის დაწყებიდან 15 წუთში მოიხსნა, ეს მათ თავისუფალ ნებაზე იყო დამოკიდებული. მოცემულ კოლეჯში გასულ წელს გამოცდებზე მასობრივი გადაწერის შემთხვევები დაფიქსირდა, რის გამოც ადმინისტრაციის წარმომადგენლებმა აღნიშნულ პრობლემასთან ბრძოლის სტრატეგიების შემუშავების ექსპერიმენტული გზების ძიება დაიწყეს.

გამოცდებზე თაღლითობა ინდოეთში საკმაოდ გავრცელებული პრობლემაა. 2015 წელს ბიჰარის შტატში გადაიღეს ფოტო, რომელზეც მოსწავლეების მშობლები არიან ასახულები. ისინი თავიანთ შვილებს გამოცდის პასუხების ფურცლებს სკოლის ფანჯრებიდან აწვდიან.

ინდოეთის განვითარებადი ეკონომიკის პირობებში განათლება საკმაოდ ძვირადღირებული პროდუქტია, რომელიც მოსახლეობის უდიდეს ნაწილს სიღარიბისგან თავის დაღწევის ერთადერთ საშუალებად ესახება. სწორედ ამიტომ მშობლებისა და სკოლების წარმომადგენლების მხრიდან მოსწავლეებზე ზეწოლა ძალიან დიდია. ისინი ბავშვებისგან გამოცდების საუცხოოდ ჩაბარებას ელიან, რაც მოსწავლეებში გადაწერისა და საგამოცდო თაღლითობისადმი მიდრეკილებას ზრდის. გამუდმებით სტრესულ ვითარებაში ყოფნა კი სკოლის მოსწავლეების ჯანმრთელობაზეც უარყოფითად აისახება. წლის დასაწყისში ინდოეთის სამხრეთით მდებარე ტელანგანას შტატში 19-მა მოსწავლემ გამოცდების ცუდი შედეგების გაგების შემდეგ სიცოცხლე თვითმკვლელობით დაასრულა. 

წყარო: ​cnn

თარგმნა ია ნაროუშვილმა

წაიკითხეთ სრულად