Baby Bag

​„უსამართლო და დისკრიმინაციულია ასეთი დამოკიდებულება“ - პედაგოგები განათლების სისტემაში ცვლილებებს აპროტესტებენ

​„უსამართლო და დისკრიმინაციულია ასეთი დამოკიდებულება“ - პედაგოგები განათლების სისტემაში ცვლილებებს აპროტესტებენ

რამდენიმე დღის წინ ცნობილი გახდა, რომ ​ნოემბერში დაგეგმილი გამოცდები გადაიდო. ამის მიზეზად განათლების სამინისტრომ კოვიდპანდემია და შექმნილი სიტუაცია დაასახელა. „არსებული ეპიდვითარებისა და ჯანდაცვის სამინისტროს რეკომენდაციების გათვალისწინებით, მასწავლებელთა გამოცდები, ასევე, სპეციალურ მასწავლებელთა გამოცდები 2021-2022 სასწავლო წლის დაწყებამდე გაიმართება,“ - ნათქვამი იყო მათ განცხადებაში. ამის გარდა, აღნიშნულიდან გამომდინარე, ცვლილებები შევიდა მასწავლებლის საქმიანობის დაწყების, პროფესიული განვითარებისა და კარიერული წინსვლის სქემაში.

ერთი მხრივ, გამოცდების გადადებამ და, მეორე მხრივ, ცვლილებებმა პედაგოგთა გარკვეული ნაწილის პროტესტი და გაღიზიანება გამოიწვია. ისინი სამინისტროს ამ გადაწყვეტილებებს სოციალურ ქსელში გამოეხმაურნენ და ამბობენ, რომ მსგავსი მიდგომა არასამართლიანი და დისკრიმინაციულია.
„ყველაფერს ითვალისწინებთ, წამყვანი მასწავლებლები კი შემოგავიწყდით სულ. რატომ აგვიკრძალეთ წინსვლა? ვის რას ვუშავებდით? ჩვენთვისაც მოგეცათ წინსვლის შესაძლებლობა“ - წერს ერთ-ერთი პედაგოგი ​სტატიის კომენტარში, რომელიც ​MomsEdu.ge-მ გამოაქვეყნა.

​ამავე სტატიის ქვეშ სხვა პედაგოგიც აღნიშნავს იმას, რომ მსგავსი ტიპის მიდგომა, რომელიც ახლა აქვს სამინისტროს, უსამართლოა: „წამყვანი მასწავლებლები რამდენ წელს უნდა ველოდოთ კიდევ მენტორის გამოცდას?! უსამართლობის გარდა, კიდევ სხვა სახელი ხომ არ შეეფერება იმ ფაქტს, რომ ერთკრედიტიანი მასწავლებლებიც რაღაც აქტივობებით უკვე წამყვანები არიან და 4-5 საგანში სერტიფიცირებულებიც. მაინც და მაინც მაჩანჩალა უნდა იყო ამ ქვეყანაში, რომ ვინმემ იზრუნოს შენს წარმატებაზე?! რატომ გვაბრკოლებთ იმ ადამიანებს, რომლებმაც კომპეტენცია 10 კრედიტზე დავადასტურეთ, თანაც არა მხოლოდ ჩვენს საგანში! გაუბრალოვდა ყველაფერი, სტიმული გვეკარგება, რომ საქმე კარგად ვაკეთოთ. წარმატებული მასწავლებლების დემოტივირება გინდათ?! ასე აპირებთ განათლების სისტემის საოცნებო გაბრწყინებას?! რა უნდა ასწავლოს ჩვენს შვილებს იმ მასწავლებელმა, რომელმაც ძლივს მოახერხა საგანში ერთი კრედიტის აღება, გინდა წამყვანი იყოს, გინდა მენტორი და გინდა ფარაონი! კარგი რა, ,,გააჩერეთ დედამიწა, ჩავდივარ“.

​პედაგოგები, ამავდროულად, სამინისტროსგან საგამოცდო პროგრამებისა და სახელმძღვანელოების დროულად მიწოდებას ითხოვენ, რათა გამოცდებისთვის მოემზადონ.

​უფროსი და წამყვანი პედაგოგების გარდა პროტესტის გრძნობა გაუჩნდათ სპეციალურ მასწავლებლებსაც, მას შემდეგ, რაც 
​სამინისტრომ ხელფასების მატებასთან დაკავშირებით გაავრცელა ინფორმაციასიახლის თანახმად, 2021 წლის იანვრიდან სტატუსის მქონე ყველა პედაგოგს, ვისაც სრული დატვირთვა (15 საათი) აქვს, ხელფასზე 100 ლარი დაემატება. ვისაც არ აქვთ სრული დატვირთვა, სახელფასო დანამატი პროპორციული დაანგარიშების წესის შესაბამისად გაეზრდება.
​„სპეცმასწავლებლები არსად არც ერთ პირობაში და ცვლილებაში არ მოვიაზრებით?“, „სპეცმასწავლებლებს ისევ ჩაგრავენ. უარი დისკრიმინაციას!“ - წერენ სპეციალური მასწავლებლები სოციალურ ქსელში. შეგახსენებთ, რომ მათ არც ზაფხულში მიეცათ გამოცდაზე გასვლის საშუალება და ახლა კი, გამოცდები საერთოდ გადაიდო.

​სპეციალური მასწავლებლების პროტესტის საპასუხოდ არც განათლების სამინისტროსა და არც მასწავლებლის სახლს განცხადება არ გაუკეთებია. ერთი მხრივ, სამინისტრო წინგადადგმულ ნაბიჯად მიიჩვნევს იმას, რომ სპეციალური მასწავლებლები ჩართეს მასწავლებლის კარიერული წინსვლის სქემაში და საგნის პედაგოგებს გაუთანაბრეს. ამ ცვლილების თანახმად, სპეცმასწავლებლებს პრაქტიკოსის სტატუსი მიენიჭათ და მათ საშუალება აქვთ, რომ სტატუსი საგნობრივი კომპეტენციის დამადასტურებელ გამოცდაზე აიმაღლონ.

​რაც შეეხება ​სქემაში ცვლილებებს და კითხვებს, რომლებიც პედაგოგებს ჰქონდათ ამ თემებთან დაკავშირებით, ჩვენ მასწავლებლის სახლს დავუკავშირდით, თუმცა მათ ჩვენს კითხვებზე არ უპასუხიათ. 

თუ გინდათ, რო განათლების სფეროში მიმდინარე სიახლეების შესახებ ინფორმირებულები იყოთ, მოიწონეთ გვერდი „მასწავლებლების სანდო წყ​არო“

შეიძლება დაინტერესდეთ

პრემიერ-მინისტრი განათლების სფეროს მნიშვნელოვან რეფორმას აანონსებს

პრემიერ-მინისტრი განათლების სფეროს მნიშვნელოვან რეფორმას აანონსებს

პრემიერ-მინისტრმა მამუკა ბახტაძემ მთავრობის 2018 წლის ანგარიშის პრეზენტაციაზე განაცხადა, რომ შემდეგი დიდი რეფორმა საქართველოში განათლების სფეროს შეეხება. ბახტაძის თქმით, განათლებაში სამჯერ უნდა გაიზარდოს ინვესტიციები:

„მე მისვამენ კითხვას, რა იქნება შემდეგი დიდი რეფორმა საქართველოში. შემდეგი დიდი რეფორმა საქართველოში იქნება განათლება. ყველაზე დიდი სიმდიდრე და კაპიტალი რაც საქართველოს აქვს, ეს არის ჩვენი ადამიანები და მოქალაქეები. საქართველოში არის ძალიან დიდი ნიჭი. სამწუხაროდ, საქართველოს დამოუკიდებლობის მოპოვების დღიდან აღმოჩნდა ისე, რომ განათლების სექტორის დაფინანსება იყო ყველაზე მცირე. ეს გახლდათ ძალიან სამწუხარო ტენდენცია, რომელიც უაღრესად ნეგატიურად აისახა ჩვენს ეკონომიკურ პერსპექტივებზე. ჩვენ ვაპირებთ, რომ ეს ყველაფერი შევცვალოთ.

2019 წელს ჩვენ დავიწყებთ რეფორმას, რომელითაც სწორედ განათლების სექტორი გახდება დომინანტი სექტორი ჩვენს ეკონომიკაში. ანუ განათლების სექტორს ექნება მინიმუმ 10-11%-იანი წილი მთლიან შიდა პროდუქტში, ეს ნიშნავს იმას, რომ ჩვენ სამჯერ უნდა გავზარდოთ ინვესტიციები განათლებაში.

ჩვენ შევიმუშავეთ რეფორმა, რომლის მიხედვითაც, გამოვყავით 5 დონე: სკოლამდელი განათლება, საშუალო განათლება, პროფესიული განათლება, უმაღლესი განათლება და მეცნიერება. უნდა უზრუნველვყოთ, რომ ჩვენი ეკონომიკა ამ ხუთივე დონეზე ხარჯავდეს მთლიანი შიდა პროდუქტის 10-11%–ს. სწორედ ეს არის გამოსავალი და გზა, რომ საქართველო ჩავაყენოთ განვითარებული ეკონომიკების მქონე ქვეყანათა რიგებში. დარწმუნებული ვარ, რომ ეს რეფორმა იქნება ყველა ძირითადი პრობლემის დაძლევის გზა. ეს რეფორმა მოიტანს იმ სულისკვეთებას, რომელიც დაგვეხმარება, რომ ჩვენი ეკონომიკა გახდეს სრულიად განსხვავებული და დავძლიოთ ყველა ის გამოწვევა, რომელიც გვაქვს ქვეყანაში უმუშევრობისა და სიღარიბის თვასაზრისით... მხოლოდ განათლების რეფორმით ამ პრობლემებს ვერ გადავწყვეტთ, თუმცა, ეს რეფორმა უნდა იყოს ამ ამოცანების გადაწყვეტის მთავარი ლოკომოტივი“, - განაცხადა მამუკა ბახტაძემ.

წაიკითხეთ სრულად