Baby Bag

„ყველაზე მთავარი სათამაშო და განვითარება ბავშვისთვის არის მშობლებთან ურთიერთობა და ღია სივრცე,“ - ბაკურ კოტეტიშვილი

ბავშვთა ნევროლოგმა ბაკურ კოტეტშივილმა უფროსებისა და ბავშვების ყოველდღიურ ქცევას შორის არსებული განსხვავებების შესახებ ისაუბრა. მისი თქმით, ზრდასრულების ქმედებები მნიშვნელოვნად არის შეზღუდული, ბავშვი კი ბუნებით ლაღია:

„ჩვენი ქმედებები ძალიან შეზღუდულია კლიშეებით, სტერეოტიპებით, კანონებით, რომელიც ჩვენ თვითონ მოვიფიქრეთ. ​ძალიან მკაცრ ჩარჩოებში ვარსებობთ. ამას ვერ ვატყობთ, მაგრამ ეს ესეა. ბავშვი ამ ჩარჩოებისგან აბსოლუტურად თავისუფალია. მისი ქმედებები არის აბსოლუტურად ლაღი, ისევე როგორც უნდა ხდებოდეს ღია სისტემაში, ღია ბუნებაში. ჩვენ ნიღაბს ვატარებთ, დისკომფორტია, მაგრამ ვატარებთ თავდაცვის მიზნით. ზუსტად იმავეს ვეუბნებით ბავშვს, რომ არ შეიძლება იქ მისვლა, არ შეიძლება სტუმრად წასვლა, არ შეიძლება სათამაშოდ, არ შეიძლება ბაღში წასვლა. „არ შეიძლება“ არის მკაცრი აკრძალვა განმარტების გარეშე.“

ბაკურ კოტეტიშვილმა აღნიშნა, რომ ბავშვები უმეტესად ყურადღების მიქცევის მიზნით ჭირვეულობენ:

„ბავშვი თავდაცვითი მდგომარეობიდან გამომდინარე იწყებს სხვადასხვა ფორმით ყურადღების მიპყრობას. ამ ყურადღების მიპყრობა ჩვენ უკვე აღარ გვსიამოვნებს. როგორც კი ის გააკეთებს ისეთ ქმედებას, რომელიც ჩემი წინა ნათქვამის საწინააღმდეგოა, მე იმაზე შენიშვნას ვეუბნები. ​ეს შენიშვნა მას აწყ​ობს, იმიტომ, რომ ყურადღება მიიპყრო. ჩვენ ვბრაზდებით: „ორჯერ გითხარი, სამჯერ გითხარი, ათჯერ გითხარი, მაინც იმავეს აკეთებ.“ შენიშვნა ამ შემთხვევაში არის სწორედ ყურადღება.“

ბაკურ კოტეტიშვილის თქმით, ბავშვის განვითარებისთვის ძალიან მნიშვნელოვანია, რომ ის ღია სივრცეში ხშირად იყოს:

„ღია სისტემა, სივრცე ბავშვის განვითარებისთვის ძალიან მნიშვნელოვანია. ჩვენთან გავრცელებულია აზრი: „გარეთ გაიყვანე, ჰაერზე.“ ეს მორიგი ტყუილია. ჰაერი თავისი აზოტისა და ჟანგბადის შემადგენლობით არაფერ შუაშია. ​გარეთ გასვლა სასიამოვნოა სივრცის აღქმის გამო. როდესაც ვიკეტებით სახლში, რა თქმა უნდა, ეს სივრცე შეზღუდულია. რა თქმა უნდა, ბავშვმა თითოეული ასაძრომი, თითოეული კუთხე-კუნჭული ზეპირად იცის. მისთვის სიახლე არაფერია. მით უმეტეს, როდესაც აძვრება, ეუბნებიან: „არ აძვრე,“ როდესაც შეძვრება: „არ შეძვრე,“ როდესაც დადებს, „არ დადო,“ როდესაც აიღებს „არ აიღო.“ მაშინ რა გააკეთოს ბავშვმა?!“

„თანამედროვე ტექნოლოგიებიდან ძალიან ხელსაყრელი გამოდგა ბავშვებისთვის გაჯეტების სისტემა, იმიტომ, რომ ეს არის კონტაქტი გარესამყაროსთან. თვითონ როგორც უნდა ისე მართავს ყველაფერს. ახლა აღმოჩნდა, რომ საზოგადოების მტერია გაჯეტი. ბევრი რამ დაბრალდა მას. არცერთ ბავშვს არ უყიდია გაჯეტი, ჩვენ ვუყიდეთ, ჩვენ მოვიტანეთ სახლში, ჩვენ მივეცით მაგალითი. ​ჩვენ რომ გავთავისუფლებულიყავით იმ წუთას ბავშვისგან, ამას მაგიტომ ვაძლევთ. ნებისმიერი სათამაშოს პრინციპი რა არის? სათამაშო შექმნა მოზრდილმა, რომ მისცეს ბავშვს და ბავშვი დაკავდეს. შემდეგ როგორ გავაფორმეთ?! ვთქვით: „სათამაშო საჭიროა ბავშვის განვითარებისთვის.“ ყველაზე მთავარი სათამაშო და განვითარება ბავშვისთვის არის მშობლებთან ურთიერთობა და ღია სივრცე,“- აღნიშნულ საკითხებზე ბაკურ კოტეტიშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​პირადი ექიმი - მარი მალაზონია

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, „ფასდაკლებები დედებისთვის“ (ჯგუფში გასაწევრიანებლად ნახეთ ბმული - „ფასდაკლებები დედებისთვის“)

„მთავარია ბავშვის დაცულობა. რაც უნდა საშინელება ტრიალებდეს გარშემო, ბავშვი დაცულად უნდა იყ...
​​ბავშვთა ნევროლოგი ბაკურ კოტეტიშვილი საქართველოს პირველი არხის გადაცემაში „დღის კოდი“ ბავშვებში რთული ქცევის გამოვლენისა და მისი სწორად მართვის შესახებ საუბრობს. ბაკურ კოტეტიშვილი აღნიშნავს, რომ...

შეიძლება დაინტერესდეთ

„ჩვენი ბებიები და ბაბუები გამხმარ პურს აძლევდნენ ბავშვს ხელში, ასევე ქათმის ძვლის ნაწილს,“ - პედიატრი მაია სურვილაძე პატარებისთვის კვების საინტერესო მეთოდს გვაცნობს

„ჩვენი ბებიები და ბაბუები გამხმარ პურს აძლევდნენ ბავშვს ხელში, ასევე ქათმის ძვლის ნაწილს,“ - პედიატრი მაია სურვილაძე პატარებისთვის კვების საინტერესო მეთოდს გვაცნობს

პედიატრმა მაია სურვილაძემ მშობლებს ბავშვების მყარ კვებაზე გადაყვანის შემდეგ კვების საინტერესო მეთოდი გააცნო, რომელიც რვა თვის ასაკიდან გამოიყენება:

„ეს მოდის ინგლისიდან. 2005 წელს ინგლისელმა მედდამ 70 წლის ასაკში, როდესაც უკვე დიდი გამოცდილება ჰქონდა დანერგა ეს მეთოდი. ბავშვი თვითონ ეცნობა საკვებს. დიდი მნიშვნელობა აქვს, რა ასაკიდან დავიწყებთ. კუნთების მოტორიკა უნდა იყოს განვითარებული იმისთვის, რომ შეძლოს პროდუქტის დაჭერა ორი თითით. თუ ადრე მისცემთ ბავშვს, ინტერესი იქნება ნული. მნიშვნელობა აქვს ფერსაც, საკვების კონსისტენციასაც. მნიშვნელოვანია, რომ ვიზუალურად განასხვავოს ბავშვმა საკვები.“

მაია სურვილაძის თქმით, ეს მეთოდი ახალი არ არის და ბევრ ქვეყანაში გამოიყენება:

„ეს მეთოდი დიდი ხანია, რაც მოდის, პედიატრებისთვის ახალი არ არის. სპეციალური საკვები გამოვიდა ევროპაში, ინგლისში, ამერიკაში. პროდუქტი ისეა დამზადებული, რომ შუა ნაწილი დავიწროვებული აქვს. ეს იმისთვისაა, რომ ბავშვმა კარგად მოჰკიდოს ხელი და მოსჭიდოს. ბავშვი საკვებს ეცნობა, მას სათამაშოს ფუნქცია აქვს. შესაძლოა, სხვა სათამაშოები ნაკლებად აინტერესებდეს. ბევრი მშობელი მოდის და ამბობს, ჩემს შვილს სათამაშო სულ არ უნდა, კოვზები და ქვაბები ურჩევნიაო. შეიძლება თავიდან ერთი კომპონენტისგან შემდგარი პროდუქტი დაუდოთ. რვა თვე ზუსტად ის ასაკია, რომელიც კარგია ასეთი ექსპერიმენტების ჩატარებისთვის.“

„ჩვენი ბებიები და ბაბუები ქათმის ძვლის ნაწილს აძლევდნენ ბავშვს ხელში, ასევე გამხმარ პურს, ახალ ხახვს. ამერიკელი მეცნიერი სპოკი, ასევე უდებდა პროდუქტს ბავშვს და არჩევინებდა. ეს არ არის ახალი მეთოდი. როდესაც ასპირაცია ხდება, საკვების ნაწილები ხვდება სასუნთქ გზებში, ვერ ამოისუნთქავს ბავშვი. ამიტომ სწორად უნდა განვსაზღვროთ როდის დავიწყოთ ეს პირველად. ასეთი სახით ბავშვი იმ რაოდენობას, რაც მას ერთ მოცულობაზე სჭირდება, ვერ შეავსებს,“ - აღნიშნულ საკითხზე მაია სურვილაძემ ტელეკომპანია „იმედის“ გადაცემაში „იმედის დილა“ ისაუბრა.

წყარო: ​„იმედის დილა“

წაიკითხეთ სრულად