„მთელი ცივილიზებული სამყარო სთხოვს პედაგოგებს 2 მიმართულებით კომპეტენციის დადასტურებას: პირველი ეს არის, პროფესიული უნარები და მეორე - საგნობრივი უნარები. მსოფლიოს საგანმანათლებლო საზოგადოება შეთანხმებულია იმაზე, რომ მასწავლებელმა პირველ რიგში უნდა იცოდეს საგანი. ცოდნა-გაცნობიერება ეს არის პირველი საფეხური. ამის შემდგომ უკვე მოდის სწავლების მიდგომები და თეორიები - როგორ მიიტანს მასწავლებელი ამა თუ იმ საკითხს მოსწავლემდე, როგორ დააინტერესებს და ჩართავს მას გაკვეთილში, ეს უკვე მეორე ნაწილია. ჩვენ ორივე მიმართულებით - როგორც საგნობრივი, ასევე პროფესიული მიმართულებით უფასოდ შევთავაზებთ პედაგოგებს ტრენინგებს. წინასწარ ვიცით, რომ ამაზე ძალიან დიდი მოთხოვნა იქნება და ცხელი ზაფხული გველოდება, ასევე ცხელი შემოდგომა.
ჩვენ გვინდა, პედაგოგების პროფესიული გადამზადება რამდენიმე მიმართულებით უფრო გავაძლიეროთ. სამი ძირითადი საკითხი, რაზედაც ვფიქრობთ, ეს არის:
1. პრაქტიკის კვლევა, რომელიც არის ძალიან ეფექტური საშუალება პედაგოგებისათვის და ითვალისწინებს კონკრეტულ კლასში არსებული პრობლემების მოგვარებიის გზებს.
2. ასევე გვინდა, რომ ყველა პედაგოგი გადამზადდეს ინკლუზიურ განათლებაში, რადგან ყოველწლიურად დაახლოებით 500-დან 700-მდე იმატებს იმ ბავშვთა რაოდენობა, რომლებიც არიან სპეციალური საგანმანათლებლო საჭიროების მქონე.
3. გვინდა, რომ სასკოლო უსაფრთხოებაში გადავამზადოთ ყველა პედაგოგი. ის პრობლემა, რაც შემდგომ ქუჩაში გადადის და ტრაგედიით მთავრდება, იწყება საკლასო ოთახში. მასწავლებელი, რაც უფრო ადრე შეამჩნევს ამ პრობლემას, მით უფრომე მეტად გვექნება საშუალება, თავიდან ავირიდოთ ტრაგედიები.“
ამის შესახებ მასწავლებელთა პროფესიული განვითარების ეროვნული ცენტრის დირექტორმა ბერიკა შუკაკიძემ საზოგადოებრივი მაუწყებლის გადაცემა „ახალ დღეში“ ისაუბრა.
განათლების სამინისტრო საინფორმაციო საშუალებებით გავრცელებულ ინფორმაციას ეხმაურება მოსწავლეზე ძალადობის ფაქტის შესახებ
განათლებისა და მეცნიერების სამინისტრო ეხმაურება მოზარდზე ძალადობისა და მოსწავლის პერსონალური ინფორმაციის გასაჯაროებასთან დაკავშირებით სხვადასხვა მედიასაშუალებით გავრცელებულ ინფორმაციას და გმობს სკოლაში მომხდარი ნებისმიერი სახის ძალადობას.
როგორც განათლებისა და მეცნიერების მინისტრის პირველი მოადგილე, ეკატერინე დგებუაძე განმარტავს, სამინისტროს მთავარი მიზანია, თითოეული მოზარდის განათლების ფუნდამენტური უფლების დაცვა. სამინისტროს მთელი ძალისხმევა მიმართულია იმისკენ, რომ ზოგადსაგანმანათლებლო დაწესებულებებში შეიქმნას ჯანსაღი გარემო და მოუწოდებს სკოლებს, შეუწყონ ამ პროცესს ხელი, უზრუნველყონ სკოლებში პოზიტიური და უსაფრთხო სივრცის შექმნა და მოსწავლეთა პერსონალური მონაცემების დაცვა.
მინისტრის პირველი მოადგილე ასევე მიმართავს საინფორმაციო საშუალებებს, განსაკუთრებული სიფრთხილე და პროფესიონალიზმი გამოიჩინონ მოზარდებთან დაკავშირებული ნებისმიერი საკითხის გაშუქებისას, არ დაარღვიონ მათი უფლებები, რათა ზიანი არ მიადგეს მოსწავლეთა ფიზიკურ და ფსიქოლოგიურ ჯანმრთელობას.
