Baby Bag

„თუ თითოეულ ბავშვს დიდი სიყვარულით არ მიუდექი, შედეგს ვერ მიაღწევ, რაც უნდა კარგი აქტივობებით დაგეგმო გაკვეთილი“

„თუ თითოეულ ბავშვს დიდი სიყვარულით არ მიუდექი, შედეგს ვერ მიაღწევ, რაც უნდა კარგი აქტივობებით დაგეგმო გაკვეთილი“

ნათელა ბუჟღულაშვილი 51 წელია საგარეჯოს მუნიციპალიტეტის სოფელ ნინოწმინდის საჯარო სკოლაში დაწყებითი კლასების პედაგოგად მუშაობს. მან პროფესიიდან გასვლის გადაწყვეტილება მიიღო.

„დედა პედაგოგი მყავდა, ამიტომაც ეს ძალიან ახლობელი პროფესია იყო ჩემთვის. ბავშვობაშიც კი მასწავლებლობანას ვთამაშობდი.

სკოლა არ ყოფილა ჩემთვის მხოლოდ სამსახური. ბავშვებთან ურთიერთობა დიდ სიამოვნებას მანიჭებდა, ბედნიერი ვიყავი ამ საქმის კეთებით და 51 წელი სიხარულით ვემსახურე. თუ თითოეულ ბავშვს დიდი სიყვარულით არ მიუდექი, შედეგს ვერ მიაღწევ, რაც უნდა კარგი აქტივობებით დაგეგმო გაკვეთილი. გარდა ამისა, პასუხისმგებლობას უნდა გრძნობდე მომავალი თაობების წინაშე და ყველაფერი უნდა სცადო, რომ სასურველ შედეგს მიაღწიო. მიუხედავად ხანგრძლივი მუშაობისა, სისტემატურად უნდა ზრუნავდე პროფესიული დონის ამაღლებაზე, სიახლეების მოძიებასა და საკლასო ოთახში დანერგვაზე. სულ იმის მცდელობა უნდა გქონდეს, რომ საკუთარი თავი პროფესიულად განავითარო და სიახლეებს ფეხი აუწყო.

სახელმწიფოს მხრიდან საპენსიო ასაკის პრაქტიკოსი პედაგოგებისათვის ჯილდოს გადაცემის გადაწყვეტილება დიდი სიურპრიზი იყო და ძალიან გამახარა. მხცოვან მასწავლებლებს ამ ჟესტით გვითხრეს, რომ ტყუილად არ გვიშრომია. მადლიერება ამ განვლილი წლებისთვის ამ ფორმით გამოიხატა.

გადაწყვეტილება, რომელიც საპენსიო ასაკის პრაქტიკოს პედაგოგებს ეხება, ჩემი აზრით, საგანმანათლებლო სისტემაში ახალი თაობის შემოსვლას გულისხმობს, რასაც მივესალმები. მათაც უნდა შეიძინონ გამოცდილება. ყოველთვის მსიამოვნებდა ახალგაზრდებთან ერთად მუშაობა, იმიტომ რომ მათგან ბევრ ახალ და საინტერესო რამეს ვსწავლობდი.“


შეიძლება დაინტერესდეთ

გარე დაკვირვებაზე რეგისტრაცია eschool-ში 1-ლი ოქტომბრიდან 5 ოქტომბრის ჩათვლით განხორციელდება

გარე დაკვირვებაზე რეგისტრაცია eschool-ში 1-ლი ოქტომბრიდან 5 ოქტომბრის ჩათვლით განხორციელდება

მასწავლებლის პროფესიული რეგულირების პროგრამის გარე დაკვირვების მიმართულების მენეჯერის, ქრისტინე ინგოროყვას ინფორამაციით, გარე დაკვირვებაზე რეგისტრაცია eschool-ში 1-ლი ოქტომბრიდან 5 ოქტომბრის ჩათვლით განხორციელდება.

„იქედან გამომდინარე, რომ სასწავლო პროცესი დაიწყო შერეულ რეჟიმში და პირველ ოქტომბრამდე მიმდინარეობს ელექტრონულ სისტემაში საგაკვეთილო ცხრილების და ელექტრონული ჟურნალების დამატება. გარე დაკვირვებაზე რეგისტრაცია განხორციელდება eschool-ის ელექტრონულ სისტემაში 1-ლი ოქტომბრიდან 5 ოქტომბრის ჩათვლით. თითოეულ თქვენგანს გარე დაკვირვების გავლის პერიოდი სისტემაში აგესახებათ რეგისტრაციის დასრულებიდან უმოკლეს ვადაში, რათა დროულად შეძლოთ გაკვეთილის გეგმების მომზადება და ატვირთვა,“ - წერს ქრისტინე ინგოროყვა სოციალურ ქსელში.

წაიკითხეთ სრულად