Baby Bag

მასწავლებლებისთვის კონკურსი გამოცხადდა

მასწავლებლებისთვის კონკურსი გამოცხადდა

მასწავლებელთა პროფესიული განვითარების ეროვნული ცენტრი მასწავლებლის პროფესიის პოპულარიზაციის, პრესტიჟის ზრდის, წარმატებული პედაგოგიური პრაქტიკის გამოვლენისა და საზოგადოებისათვის საუკეთესო მასწავლებელთა წარდგენის მიზნით ატარებს ყოველწლიურ კონკურსებს:

2019 წლის საუკეთესო მასწავლებელის გამოსავლენად ცხადდება კონკურსები:

  • 2019 წლის მუსიკის საუკეთესო მასწავლებელი;
  • 2019 წლის სპორტის საუკეთესო მასწავლებელი;
  • 2019 წლის ხელოვნების საუკეთესო მასწავლებელი;

თითოეული კონკურსის ფარგლებში გამოვლინდება ერთი გამარჯვებული.

კონკურსში მონაწილეობა შეუძლია საქართველოს საჯარო და კერძო სკოლების მუსიკის, სპორტის და ხელოვნების უფროს, წამყვან და მენტორ მასწავლებლებს ასაკისა და პედაგოგიური სტაჟის მიუხედავად.

კონკურსში მონაწილეობა ნებაყოფლობითია და პედაგოგი თვითონ წარადგენს საკუთარ თავს კანდიდატად.

რეგისტრაციის ვადა: 6 ნოემბერი 2019 –20 ნოემბერი 2019

კონკურსში გამარჯვებული უნდა აკმაყოფილებდეს შემდეგ კრიტერიუმებს:


ა) საგნის და მისი სწავლების ღრმა და საფუძვლიანი ცოდნა - რაც გამოვლინდება წერილობით (მასწავლებლის პროფესიულ საქაღალდეში არსებული დოკუმენტების შემოწმება) და ზეპირად (ვიდეოჩანაწერი) წარმოდგენილი „ჩემი პედაგოგიური კრედოს“ საშუალებით ასევე, მასწავლებლის მიერ ჩატარებულ გაკვეთილებზე დასწრებით;


ბ) შემოქმედებითი უნარების დემონსტრირება - რაც გამოვლინდება მასწავლებლის მიერ გამოქვეყნებული მასალებით (წერილები, მეთოდური და სასწავლო ლიტერატურა, ბლოგი);


გ) მოსწავლეების სწავლის შედეგების დინამიკა - რაც დადასტურდება მოსწავლეების ქცევის, აკადემიური მოსწრების გაუმჯობესების ამსახველი მასალით;


დ) სწავლების ინოვაციური და ეფექტური მიდგომების გამოყენება - რაც დადასტურდება გაკვეთილზე დასწრებით და სხვა გაკვეთილების გეგმების გაცნობით;


ე) ზოგადსაკაცობრიო ღირებულებების სწავლება - რაც გამოვლინდება ეთნიკური, კულტურული, რელიგიური განსხვავებულობის მიმართ ტოლერანტული დამოკიდებულებით;


ვ) საზოგადოებრივი აღიარება და სამოქალაქო აქტივობა - რაც გამოვლინდება მასწავლებლის მონაწილეობით სასკოლო თუ საზოგადოებრივ ცხოვრებაში, მისი რეპუტაციით და აღიარებით თემის, ადგილობრივი მოსახლეობის, კოლეგების, სკოლის ადმინისტრაციისა და ფართო საზოგადოების მიერ.


ზ) პროფესიული განვითარება და გამოცდილების გაზიარება - რაც დადასტურდება მასწავლებლის მუდმივი ზრუნვით როგორც საკუთარ, ისე კოლეგების პროფესიულ განვითარებაზე (ჩართულობა პროფესიული განვითარების სხვადასხვა აქტივობაში; პედაგოგიური პრაქტიკის კვლევა; დამწყები და მომავალი მასწავლებლების მხარდაჭერა კონსულტაციის, მენტორინგის ან სხვა საშუალებებით; სხვა სახის საქმიანობა პროფესიის პოპულარიზაციის მიმართულებით).


თ) სამომავლო განვითარების გეგმები - რაც გამოვლინდება სამომავლო გეგმების შეფასებით, თანმიმდევრულობისა და მრავალფეროვნების მიხედვით.

რეგისატრაციისათვის, ეწვიეთ ბმულს - ​რეგისტრაცია

აპლიკაციებში ყველა ველის შევსება სავალდებულოა. წინააღმდეგ შემთხვევაში მონაწილე გამოეთიშება კონკურსს.

საკონკურსო ვიდეოები (მაქსიმუმ 5წთ.) გთხოვთ, გადმოგზავნოთ შემდეგ მისამართზე: [email protected]

შეიძლება დაინტერესდეთ

პირველადი მონაცემებით, მასწავლებლის ჯილდოთი სარგებლობის სურვილი 6 000-მა პედაგოგმა გამოთქვა

პირველადი მონაცემებით, მასწავლებლის ჯილდოთი სარგებლობის სურვილი 6 000-მა პედაგოგმა გამოთქვა

პირველადი მონაცემებით, მასწავლებლის ჯილდოთი სარგებლობის სურვილი 6 000-მა პედაგოგმა გამოთქვა, - ამის შესახებ განათლების, მეცნიერების, კულტურისა და სპორტის მინისტრის მოადგილემ, ირინა აბულაძემ საპენსიო ასაკის პედაგოგებზე საუბრისას განაცხადა.

„სკოლებისთვის და მასწავლებლებისთვის განცხადების დაწერა არ მოგვითხოვია, რადგან ეს იყო პროცესი, ინიციატივა და უნდა გვენახა, რამდენად მოისურვებდნენ მასწავლებლები ამ შესაძლებლობებით სარგებლობას. სკოლებს ვთხოვეთ, მსჯელობა ყოფილიყო კათედრებზე ამის შესახებ და მოეგროვებინათ პირველადი ინფორმაცია მსურველი მასწავლებლების შესახებ. პირველადი მონაცემებით, 6 000 მასწავლებელია მთელი საქართველოს მასშტაბით, ვინც არის მსურველი, ჯილდოთი ისარგებლოს, თუმცა ეს პროცესი გრძელდება. ვადა არ დაგვიწესებია, ვთქვით, რომ მასწავლებელს ნებისმიერ დროს შეუძლია გამოხატოს სურვილი 2019 წლის ბოლომდე. ცხადია, იმის მიხედვით, როდის გამოხატავენ სურვილს, ეტაპობრივად მიიღებენ ჯილდოს. ვმუშაობთ მთავრობის განკარგულების პროექტზე, რომლის მეშვეობითაც შევა ცვლილება მასწავლებლის პროფესიული განვითარების და კარიერული წინსვლის სქემაში, სადაც მთავრობის მიერ ჩანაწერი დამტკიცდება. ეს იქნება უახლოეს მთავრობის სხდომაზე“, - აღნიშნა ირინა აბულაძემ.

მისივე თქმით, ჯილდოს გაცემის პირველი ეტაპის დაწყება აგვისტოს ბოლოს ან სექტემბერში იგეგმება:

„ვგეგმავთ, რომ ჯილდოს გაცემის პირველი ეტაპი დავიწყოთ აგვისტოს ბოლოს ან სექტემბერში და მეორე ეტაპი - წლის ბოლოს ან შემდეგი წლის დასაწყისში. ასევე ვმუშაობთ სხვადასხვა თანმხლებ დოკუმენტაციაზე, რაც საჭიროა ჯილდოს გაცემის ორგანიზებისთვის, ფინანსთა სამინისტროსთან ერთად. ასე რომ, პროცესი მიმდინარეობს, პირველი ეტაპის ინფორმაცია შეგროვებულია, დაგეგმილია ეტაპები, სამთავრობო განკარგულება გამოვა რამდენიმე დღეში და ტექნიკური პროცესი გაგრძელდება. გასავლელია ტექნიკური პროცესები, რაც არ შეგვიშლის ხელს იმაში, რომ სასწავლო წლის დაწყებისთვის პირველი ეტაპის ჯილდოები გავცეთ იმ მასწავლებლებზე, პენსიონერ, ღირსეულ პედაგოგებზე, რომლებმაც გამოხატეს სურვილი“,  - განაცხადა მინისტრის მოადგილემ.

განათლების სამინისტროს შეთავაზებით, პენსიონერმა მასწავლებლებმა ან კომპეტენციის გამოცდა უნდა ჩააბარონ, ან ჯილდო მიიღონ ორი წლის ხელფასის ოდენობით და სკოლას დაემშვიდობონ.

წაიკითხეთ სრულად