Baby Bag

ინფორმაცია მასწავლებლებისთვის - სკოლებში დისტანციურ სწავლებასთან დაკავშირებით ონლაინშეხვედრა ჩატარდება

ინფორმაცია მასწავლებლებისთვის - სკოლებში დისტანციურ სწავლებასთან დაკავშირებით ონლაინშეხვედრა ჩატარდება

სკოლებში დისტანციური სწავლების მხარდაჭერის მიზნით, საქართველოს საზოგადოებრივი ინტერესების დაცვის ასოციაცია (სსიდა) მასწავლებლებს ონლაინკონსულტაციას სთავაზობს. ასოციაციის ცნობით, ონლაინშეხვედრაზე მასწავლებლები გაეცნობიან დისტანციური სწავლების თავისებურებებს, დისტანციური სწავლების დაგეგმვისა და განხორციელების შესაძლებლობებს ხელმისაწვდომი რესურსების გათვალისწინებით.

„კორონავირუსის შესაძლო გავრცელებასთან დაკავშირებით საქართველოში გამოცხადდა სასკოლო არდადეგები.

შექმნილი გარემოებიდან გამომდინარე, სკოლებში სწავლის პროცესის განახლების პროცესი 1-ლ აპრილამდე გადაიდო. დისტანციური განათლება დღის წესრიგში დგას, მასწავლებლები კარგად იცნობენ თანამედროვე ტექნოლოგიებს და წარმატებით იყენებენ სასწავლო პროცესში.

თანამედროვე ტექნოლოგიების, კოლაბორაციული პლატფორმებისა და სხვადასხვა აპლიკაციების დახმარებით შესაძლებელია მასწავლებელმა სწრაფად შექმნას სასწავლო გეგმა და განაგრძოს გაკვეთილების დისტანციურად ჩატარება.

მოკლე ვადებში სწავლების ტრადიციული ფორმატის ცვლილება რთულია, თუმცა შესაძლებელია იმ გარემოში, სადაც მასწავლებლებსა და მოსწავლეებს აქვთ კომპიუტერები, მობილური ტელეფონები, პლანშეტები და ინტერნეტი.

სწორედ ამ მიზნით ვგეგმავთ დისტანციურ სამუშაო შეხვედრას/კონსულტაციას მასწავლებლებთან.

მონაწილეებს გავაცნობთ:

- დისტანციური სწავლების თავისებურებებს;
- დისტანციური სწავლების დაგეგმვისა და განხორციელების შესაძლებლობებს ხელმისაწვდომი რესურსების გათვალისწინებით.

შეხვედრას წარუძღვებიან თამარ მოსიაშვილი და დავით ლიპარტელიანი.

დისტანციურ შეხვედრაში მონაწილეობის მსურველები უნდა დარეგისტრირდნენ და შეავსონ კითხვარი.

რეგისტრაციის ბოლო ვადაა 2020 წლის 11 მარტი, 23:59.

დისტანციური კონსულტაცია ჩატარდება 2020 წლის 14 მარტს (შაბათი) - 18:00-დან 20:00-მდე.

დისტანციური კონსულტაციის ჩატარების შესახებ დეტალურ ინფორმაციას მიიღებთ რეგისტრაციის დროს მითითებულ ელ. ფოსტაზე, პარასკევს 12:00-მდე (2020 წლის 13 მარტი),“ - აღნიშნულია ასოციაციის მიერ გავრცელებულ ინფორმაციაში.

​კითხვარი შეავსეთ ბმულზე - ​​დისტანციური სწავლება 2020

შეიძლება დაინტერესდეთ

15 თებერვლიდან საქართველოს მთელს ტერიტორიაზე სასწავლო პროცესი საკლასო ოთახში გაგრძელდება

15 თებერვლიდან საქართველოს მთელს ტერიტორიაზე სასწავლო პროცესი საკლასო ოთახში გაგრძელდება
საკოორდინაციო საბჭოს გადაწყვეტილებით, 15 თებერვლიდან თბილისის, ქუთაისისა და რუსთავის ზოგადსაგანმანათლებლო სკოლებში სასწავლო პროცესი საკლასო ოთახებში გაგრძელდება. ჯანდაცვის სამინისტროს რეკომენდაციის შესაბამისად, კიდევ ერთხელ შეფასდა ეპიდემიოლოგიური სიტუაცია და 7 დღის მაჩვენებელმა 4%-ზე დაბლა დაიწია.

აღსანიშნავია, რომ სკოლებში კორონავირუსის შემთხვევების დადასტურების შემთხვევაში გაგრძელდება მიდგომა წერტილოვანი შეზღუდვების შესახებ. ჯანდაცვის სამინისტროს მიერ დადგენილი წესების დაცვის პროცესს სამინისტრო სისტემატურად დააკვირდება და განახორციელებს სკოლების მონიტორინგს.

მნიშნელოვანია, რომ თბილისის, ქუთაისისა და რუსთავის საჯარო სკოლების მოსწავლეების მშობლებს ექნებათ შესაძლებლობა, აირჩიონ სწავლების დისტანციური ფორმა. თუკი მასწავლებლებს მოუწევთ დამატებით ჩაატარონ დისტანციური გაკვეთილები, სამინისტროს გადაწყვეტილებით, ისინი შესაბამის დანამატს მიიღებენ. მშობელმა, რომელსაც სურს, მოსწავლემ სწავლება დისტანციურ ფორმატში გააგრძელოს, ამის შესახებ უნდა მიმართოს სკოლის ადმინისტრაციას და გაიაროს რეგისტრაცია სსიპ-განათლების მართვის საინფორმაციო სისტემის მიერ შექმნილ ვებგვერდზე - www.online.emis.ge.

რაც შეეხება მასწავლებელთა ტესტირებას, ყველა სკოლაში, სადაც სასწავლო პროცესი საკლასო ოთახში წარიმართება, მოხდება მასწავლებელთა და სკოლის ადმინისტრაციული პერსონალის მინიმუმ 20%-ის სავალდებულო სისტემატური ტესტირება 2 კვირაში ერთხელ ჯანდაცვის სამინისტროსთან ერთად შემუშავებული პროტოკოლის საფუძველზე. სავალდებულო ტესტირების უზრუნველყოფის მიზნით, უნდა მოხდეს სკოლაში დასაქმებული ყველა პირის რეგისტრაცია ბმულზე: https://labour.moh.gov.ge/, რასაც სკოლები თავად უწევენ ორგანიზებას.

რაც შეეხება ბაღებს, პროფესიულ სასწავლებლებსა და უმაღლეს სასწავლებლებს, კონკრეტული გადაწყვეტილების შესახებ ცალკე განცხადება გაკეთდება.

აღნიშნულთან დაკავშირებით საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა განმარტება გააკეთა:

„ძალიან სასიხარულო ამბავი გვაქვს. როგორც იცით, ეპიდსიტუაცია საშუალებას გვაძლებს, რომ 15 თებერვალს, მთელი ქვეყნის ტერიტორიაზე სასწავლო პროცესი გაგრძელდეს საკლასო ოთახებში. მინდა საზოგადოებას მივულოცო ეს ამბავი.

როგორც იცით, ორშაბათს მთელი ქვეყნის ტერიტორიაზე უკვე გაგრძელდა სასწავლო პროცესი საკლასო ოთახებში, გარდა თბილისის, რუსთავის და ქუთაისის სკოლებისა, ხოლო 15 თებერვლიდან გაგრძელდება ამ 3 ქალაქშიც, შესაბამისად, მთელი ქვეყნის მასშტაბით.

რაც შეეხება ბაღებს, პროფესიულ სასწავლებლებსა და უმაღლეს სასწავლებლებს – ეს პროცესი სკოლებში დაბრუნებას ეტაპობრივად მოჰყვება, კონკრეტულ თარიღებთან დაკავშირებით ცალკე განცხადება გაკეთდება.

აქვე მინდა ხაზგასმით აღვნიშნო, რომ სკოლებში ზედმიწევნით იქნება დაცული სამედიცინო პროტოკოლი, მასწავლებლები გაივლიან რეგულარულ ტესტირებას, შესაბამისად, ყველაფერი გაკეთდება, რომ სკოლებში იყოს აბსოლუტურად უსაფრთხო გარემო.“


წაიკითხეთ სრულად