Baby Bag

,,სასიამოვნო სიახლეა, რომ 2020 წელს მასწავლებლობის მსურველთა უპრეცედენტო რაოდენობა დარეგისტრირდა...ასევე მნიშვნელოვანია, დაფასებული იყოს პედაგოგის პროფესია''

,,სასიამოვნო სიახლეა, რომ 2020 წელს მასწავლებლობის მსურველთა უპრეცედენტო რაოდენობა დარეგისტრირდა...ასევე მნიშვნელოვანია, დაფასებული იყოს პედაგოგის პროფესია''

მასწავლებლობის მსურველებისთვის საგამოცდო პროცესი დღეიდან დაიწყო. საქართველოს განათლების, მეცნიერების, კულტურისა და სპორტის მინისტრის მოადგილე, ეკატერინე დგებუაძე, ოზურგეთის მე-2 საჯარო სკოლაში გახსნილ ცენტრს ეწვია და საგამოცდო პროცესის მიმდინარეობას პირადად გაეცნო. მინისტრის მოადგილემ მასწავლებლობის მსურველებს წარმატება უსურვა.

„დღეს დაიწყო მასწავლებელთა გამოცდა და მინდა წარმატება ვუსურვო თითოეულ მათგანს. სასიამოვნო სიახლეა, რომ 2020 წელს მასწავლებლობის მსურველთა უპრეცედენტო რაოდენობა დარეგისტრირდა. ეს კარგი მაჩვენებელია იმისა, რომ ბევრ ადამიანს აქვს სისტემაში შემოსვლის სურვილი. განათლების სამინისტრო ხელს უწყობს ამ ადამიანების პროფესიულ განვითარებასა და კარიერულ წინსვლას. ასევე მნიშვნელოვანია დაფასებული იყოს პედაგოგის პროფესია,“ - აღნიშნა ეკატერინე დგებუაძემ. 

მასწავლებლობის მსურველები პირველ გამოცდას ქართულ ენაში, მათემატიკასა და ბუნებისმეტყველებაში აბარებენ.

მათთვის საგამოცდო ცენტრები ბათუმში, ფოთში, ზუგდიდში, ოზურგეთში, ქუთაისში, ახალციხეში, გორში, თბილისში, რუსთავსა და თელავშია გახსნილი. ტესტირება ერთ სესიად დღის პირველ ნახევარში ტარდება.

ახალი კორონავირუსის გავრცელების პრევენციის მიზნით, გამოცდებში მონაწილეთა ჯანმრთელობის მაქსიმალური დაცვისა და ამავე დროს საგამოცდო პროცესის სრულყოფილად წარმართვის უზრუნველსაყოფად, პრემიერ-მინისტრის ხელმძღვანელობით მოქმედ უწყებათაშორის საბჭოში შემავალმა სამინისტროებმა სპეციალური რეკომენდაციები შეიმუშავეს, რომელთა დაცვითაც მიმდინარეობს საგამოცდო პროცესი.

დაავადებათა კონტროლისა და საზოგადოებრივი ჯანმრთელობის ეროვნული ცენტრის რეკომენდაციების შესაბამისად, გამოსაცდელთა და მეთვალყურეთა დაშვება ხდება მხოლოდ ყოველი საგამოცდო სექტორის ფართობის 50%-ზე. ყოველი სამუშაო მაგიდა წინა მხრიდან აღჭურვილია გამჭვირვალე დამცავი ფარით/ბარიერით; მაგიდებს შორის სიგანეში დაშორება მინიმუმ 2 მეტრია, ერთმანეთის მიმდევრობით განლაგებულ მაგიდებს შორის მანძილი კი - 1 მეტრი.

მაგიდებზე არსებული დამცავი ფარების, თერმოსკრინინგის, შესაბამისი დისტანციის დაცვისა და კორონავირუსის გავრცელების პრევენციასთან დაკავშირებული ყველა რეკომენდაციის ზედმიწევნით შესრულება იძლევა საშუალებას, გამოსაცდელებს საგამოცდო მაგიდასთან ადგილის დაკავების შემდეგ, პირბადის გარეშე მიეცეთ გამოცდის დაწერის შესაძლებლობა.

ასევე ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და ევროპის დაავადებათა პრევენციისა და კონტროლის ცენტრის (ECDC) რეკომენდაციებით დაზუსტდა, რომ ბუნებრივი განიავების (ღია ფანჯარა) დროს ნებადართულია კონდიციონერების ჩართვა. ჩართული კონდიციონერის პირობებში სავალდებულოა პირბადის გაკეთება.

▶ კონდიციონერების ჩართვა ნებადართულია ქვემოთ ჩამოთვლილი წესების დაცვით.

▶ კონდიციონერის მოხმარებისას აუცილებელია, რომ შენარჩუნებული იყოს:

  • ფიზიკური დისტანცია;
  • დაცული უნდა იყოს ხელების ჰიგიენა;
  • რესპირატორული ეტიკეტი;
  • ნიღბების სავალდებულო ტარების წესი;
  • კონდიციონერიდან ჰაერის ნაკადი არ უნდა იყოს პირდაპირ მიმართული ადამიანებზე;
  • აუცილებელია მუდმივად ღია ფანჯარა, რაც კონდიციონერის გარეშეც სავალდებულოა, რადგან ჩაკეტილ სივრცეში ინფექციის გადაცემის რისკი მაღალია;
  • დაუშვებელია ერთი და იგივე ჰაერის რეცირკულაცია;

აღსანიშნავია, რომ ძალაში რჩება ჯანმრთელობის უსაფრთხოებასთან დაკავშირებული ყველა ის წესი, რომელიც აპლიკანტებმა უნდა დაიცვან საგამოცდო სივრცეებში.

მასწავლებლის სტატუსის მოპოვების მსურველთა ხელშეწყობის მიზნით, 2020 წლის 30 აპრილის ჩათვლით დარეგისტრირებული მაძიებელი მასწავლებლები და სისტემაში შემოსვლის მსურველები გამოცდას 2020 წლის ზაფხულში აბარებენ, რომელიც 22 ივლისიდან - 30 ივლისის ჩათვლით ტარდება. საგნობრივ გამოცდას წელს 12 000-მდე მასწავლებელი ჩააბარებს.

შეიძლება დაინტერესდეთ

მიხელ ბატიაშვილმა და მისმა მოადგილეებმა ბრიუსელში ​ინოვაციური საგანმანათლებლო პროექტები და წინადადებები წარადგინეს

მიხელ ბატიაშვილმა და მისმა მოადგილეებმა ბრიუსელში ​ინოვაციური საგანმანათლებლო პროექტები და წინადადებები წარადგინეს

ბრიუსელში საქართველო-ევროკავშირის თანამშრომლობის უმაღლესი დონის ფორმატის პირველი შეხვედრის ფარგლებში, ევროკომისიასა და საქართველოს განათლების, მეცნიერების, კულტურისა და სპორტის სამინისტროს წარმომადგენლებს შორის კლასტერი გაიმართა, რომელსაც ევროპული სამეზობლო პოლიტიკისა და გაფართოებაზე მოლაპარაკებების საკითხებში ევროკომისარი იოჰანეს ჰანი, ევროკომისარი განათლების, კულტურის, ახალგაზრდობისა და სპორტის საკითხებში - ტობას ნავრაჩიჩი, ევროპის სამეზობლო პოლიტიკისა და გაფართოების შესახებ მოლაპარაკებების გენერალური დირექტორატის, ევროკავშირის აღმოსავლეთ პარტნიორობის ქვეყნებთან თანამშრომლობის დირექტორი - ლორენს მერედიტი და ევროპული სამეზობლო პოლიტიკისა და გაფართოების შესახებ მოლაპარაკებების საკითხებში ევროკომისარის მრჩეველი - ჰანა იანსი ესწრებოდნენ.

განათლების, კვლევის, ინოვაციისა და კულტურის სფეროს მიმართულების სამიზნე ჯგუფში საქართველოს განათლების, მეცნიერების, კულტურისა და სპორტის მინისტრმა მიხელ ბატიაშვილმა, მოადგილეებთან ირინა აბულაძესა და ლევან ხარატიშვილთან ერთად, ისეთი ინოვაციური საგანმანათლებლო პროექტები და წინადადებები წარადგინა, როგორიცაა განათლების და კვლევით სფეროში,ჯგუფური/კლასტერული მიდგომა; ქართველი სტუდენტებისთვის ევროკავშირის მოქალაქეებისთვის განკუთვნილი ანალოგიური პირობების შექმნა; განათლებაში ინოვაციური ციფრული ტექნოლოგიების დანერგვა და ახალი პროგრამის - ევროკავშირი-საქართველოს კულტურული ხიდების წამოწყება, რომელიც კულტურათაშორისი დიალოგის და კულტურის ინტერნაციონალიზაციის გაფართოვებას ისახავს მიზნად. შეხვედრაზე საუბარი შეეხო ასევე ორმხრივი კულტურული პროგრამის შემუშავებას და ამასთან, საქართველოში ევროპის კულტურული დღეების კამპანიას და ევროკავშირის ქვეყნებში საქართველოს ცნობადობის გაზრდას.

ევროკომისიის წარმომადგენელთა მხრიდან გამიოთქვა თანამშრომლობის მზაობა და გადაწყდა, რომ დაიწყება ევროკავშირის გაერთიანებული კვლევითი ცენტრების თანამშრომლობა ქართულ უნივერსიტეტებთან, ქართულ კვლევით ცენტრებთან და კერძო სექტორთან, ტექნიკური დახმარებისა და ცოდნის გაზიარება, მკვლევარებისთვის ერთობლივი სასწავლო პროგრამის განვითარება და მონაწილეობა, სემინარებისა და სემინარების მეშვეობით სამეცნიერო და ტექნოლოგიური ცოდნის გაცვლა. მხარეები თანამშრომლობის შემდგომ განმტკიცებასა და გაღრმავებაზე შეთანხმდნენ.

წაიკითხეთ სრულად