Baby Bag

რა ორთოპედიული პრობლემები შეიძლება გამოვლინდეს ადრეულ ასაკში და აუცილებელია თუ არა მასაჟები?

რა ორთოპედიული პრობლემები შეიძლება გამოვლინდეს ადრეულ ასაკში და აუცილებელია თუ არა მასაჟები?

ძირითადად რა ორთოპედიული პრობლემები შეიძლება გამოვლინდეს ადრეულ ასაკში, რას უნდა მივაქციოთ ყურადღება და რა არ უნდა გამოგვრჩეს? - ამ და სხვა საკითხებზე MomsEdu.ge-ს ბავშვთა ორთოპედი რომეო ვარდიაშვილი ესაუბრა. 

- ძირითადად რა ორთოპედიული პრობლემები შეიძლება გამოვლინდეს ადრეულ ასაკში?

- ბავშვებში ორთოპედიული პრობლემები თავს იჩენს სხვადასხვა ასაკობრივი განვითარების ეტაპზე. ისინი შეიძლება იყოს თანდაყოლილი ან შეძენილი, მათ შორის ინფექციური, ნეირომუსკულური, კვების, ნეოპლასტიკური და ფსიქოგენური წარმოშობის, რომლის დიაგნოსტირებაც შესაძლებელია ორსულობის, ბავშვის მუცლადყოფნის დროს და ორთოპედაიული გასინჯვის შედეგად. მათი ზოგადი ჩამონათვალი მოიცავს ისეთ დაავადებებს და მათ ფორმებს, როგორებიც არის:

  • კისერმრუდობა (ტორტიკოლიზი);
  • ტერფის თანდაყოლილი ექვინო-ვარუსული დეფორმაცია;
  • მენჯ-ბარძაყის სახსრის დისპლაზია;
  • მენჯ-ბარძაყის სახსრის თანდაყოლილი ან შეძენილი ამოვარდნილობა;
  • ბარძაყის თავის ასეპტიური ნეკროზი (ართრიტი, ოსტეომიელიტი, პერტესის დაავადება);
  • კიდურების თანდაყოლილი ანომალიები (ჰემიმელია, ამნიონური ჭიმები, პოლიდაქტილია-სინდაქტილია, კიდურის სიმოკლე);
  • მუხლის სახსრის ვალგუსური ან ვარუსული დეფორმაციები;
  • სქოლიოზი და კიფოზი (სპონდილოლიზი, სპონდილოლისთეზი);
  • გენერალიზებული დარღვევები - ართროგრიპოზი, ოსტეოქონდროდისპლაზია და სხვა.

- რას უნდა მივაქციო ყურადღება და რა არ უნდა გამოგვრჩეს?

- ჩვილის პირველადი დათვალიერება ხდება სამეანო ბლოკში, დაბადების დროს, მედპერსონალის მიერ. არსებობს რამდენიმე წამყვანი ფაქტორი, რომელიც მშობელმა უნდა გაითვალისწინოს და ჩაატაროს ბავშვის გასინჯვა ზრდა-განვითარების სხვადასხვა ეტაპზე. გასინჯვის შედეგად, რამე საეჭვო მდგომარეობის გამოვლენის შემთხვევაში მიმართოს პედიატრს ან ორთოპედს. ბავშვის ან მოზარდის სხეულის ვიზუალური დათვალიერება ხდება შიშველ მდგომარეობაში, დღის სინათლეზე. კლინიკურად ხელით შეხებით და ჩივილებიდან გამომდინარე ვაფასებთ:

  • თავის ფორმას;
  • კისრის მოძრაობის ამპლიტუდა;
  • კიდურების ნაოჭების-ნაკეცების ასიმეტრია;
  • კიდურების თანაბარისიგრძის შედარება;
  • ბეჭის და თეძოს ძვლების ასიმეტრია;
  • კიდურების სისწორე;
  • სახსარში მოძრაობის ამპლიტუდა;
  • კიდურების და სახსრების ტკივილი;
  • სიარულის მანერის დარღვევა;
  • კოჭლობა;

- აუცილებელია თუ არა მასაჟები?

- მასაჟი არის სენსორული თერაპიის ფორმა, რომელიც საუკუნეების მანძილზე იყო გავრცელებული მთელს მსოფლიოში. ძველმა ინდურმა, აღმოსავლეთ აზიურმა და აფრიკულმა კულტურებმა პირველად შემოიღეს ყოველდღიური მასაჟის პრაქტიკა ჩვილებში, დაბადებიდან მალევე, რათა ხელი შეუწყოს წონის მატებას, კოორდინაციას, შეკავშირებას და გაზარდოს განვითარების უნარი. ის ბავშვს გადასცემს დაცულობისა და ნდობის განცდას, რაც ძალიან მნიშვნელოვანია სამყაროში ახალმოსულთათვის.

ბავშვებისთვის სამკურნალო თერაპიული ან სარეაბილიტაციო მასაჟი გამოსადეგია ისეთი მდგომარეობის დროს, როდესაც აქვთ სიმპტომების ფართო სპექტრი, დაწყებული სპორტული დაზიანებებით გამოწვეული კუნთოვანი ტკივილიდან, ნევროლოგიური მდგომარეობის ან შფოთვის დასახმარებლად. მასაჟი გავლენას ახდენს…

  • კუნთოვანი ტკივილის შემცირებაზე და ზრდის დაზიანების შეხორცების უნარს.
  • სხეულის ცნობიერების ამაღლებასა და ნევროლოგიურ განვითარებაზე.
  • კორტიზოლის (სტრესის ჰორმონის) და სისხლში გლუკოზის დონის შემცირებაზე;
  • ბავშვებში სტრესის შემცირებაზე და იმუნური სისტემისა და დაავადების წინააღმდეგობის უნარის გაძლიერებაზე;
  • მოტორული და კოგნიტური განვითარების სტიმულირებაზე (გაზრდილი სიფხიზლე, ასევე სიჩქარე და სიზუსტე).

- როდის უნდა მივიყვანოთ ჩვილი პირველად ორთოპედთან?

- ძვალ-სახსროვანი დეფორმაციების ოჯახური ისტორია უნდა მიუთითებდეს, რომ ჩვილი შეფასდეს პედიატრი ორთოპედის მიერ, მაშინაც კი, თუ პრენატალური სკრინინგის დროს არ გამოვლენილა რაიმე დარღვევა. სხვადასხვა ქვეყანაში მედიცინის მიმართულების პროტოკოლებიდან გამომდინარე ხდება ორთოპედის კონსულტაცია გარკვეული თანმიმდევრობით. სწორი რჩევა-დარიგების მისაღებად საქართველოში პირველადი გეგმიური ორთოპედიული ვიზიტი სჯობს განხორციელდეს არანაკლებ 3 თვის ასაკში.

ესაუბრა მარიამ ჩოქური

შეიძინე საბავშვო პროდუქტების ნაკრები ექსკლუზიურ ფასად ბმულზე 👇 bit.ly/3iF0YnF

შეიძლება დაინტერესდეთ

​შესაძლებელია თუ არა მეძუძური დედის კვებამ გამოიწვიოს ყაბზობა ჩვილებში? - თემაზე ექიმი-ნეონატოლოგი თინათინ ქურდაძე საუბრობს

​შესაძლებელია თუ არა მეძუძური დედის კვებამ გამოიწვიოს ყაბზობა ჩვილებში? - თემაზე ექიმი-ნეონატოლოგი თინათინ ქურდაძე საუბრობს

შესაძლებელია თუ არა მეძუძური დედის კვებამ გამოიწვიოს ყაბზობა ჩვილებში? -  თემაზე MomsEdu.ge-ს ექიმი-ნეონატოლოგი თინათინ ქურდაძე ესაუბრა.

- სტატისტიკურად რამდენად ხშირია ყაბზობა ჩვილებში?

კუჭ-ნაწლავის ტრაქტის პრობლემებს შორის, ერთ წლამდე ასაკის ბავშვებში, დაახლოებით 20-30%-ში გვხვდება ყაბზობა.

- რა იწვევს ჩვილებში ყაბზობას?

ჩვილებში ყაბზობა უფრო იმით განისაზღვრება, როგორ გამოიყურება დეფეკატი, ვიდრე რამდენად ხშირია ნაწლავთა მოქმედება. ყაბზობად მიიჩნევა - თუ განავალი მკვრივია და მაგარი კონსისტენციის, დეფეკაციას თან ახლავს ჩვილის ჭირვეულობა, ძლიერი ჭინთვები და დეფეკატის გაძნელებული ევაკუაცია ნაწლავიდან. რბილი დეფეკატი არაა შეკრულობის ნიშანი.

გამომწვევი მიზეზი შესაძლოა მრავალი იყოს:

1) კვებითი დარღვევები (ძირითადად ეხება ხელოვნურ კვებაზე მყოფ ბავშვებს და როდესაც ბავშვი გადადის შერეულ კვებაზე);

2) ნევროგენული დარღვევები (მაგალითად, ჰირშპრუნგის დაავადება, ზურგის ტვინის დაზიანება);

3) სხვადასხვა მედიკამენტის ხანგრძლივი და არარაციონალური მოხმარება;

4) მეტაბოლურ-ენდოკრინული დარღვევები;

5) კუჭ-ნაწლავის ტრაქტის სხვადასხვა ფუნქციური პათოლოგია;

მნიშვნელოვანია აღინიშნოს, რომ ჩვილები, რომლებიც იკვებებიან დედის რძით, იშვიათად აქვთ შეკრულობის პრობლემა, თუ რა თქმა უნდა, ჩვილს არ აქვს რომელიმე ზემოთ ჩამოთვლილი პათოლოგია.

- შესაძლებელია თუ არა შეკრულობა მეძუძური დედის კვებამ გამოიწვიოს?

არა, კვლევებით დასტურდება რომ დედის კვების რაციონი არ ახდენს გავლენას ჩვილის შეკრულობაზე. დედისთვის არ უნდა მოხდეს საკვები პროდუქტების არასაჭირო შეზღუდვა. თუ ჩვილს აქვს შებერილობა, დედა უნდა დააკვირდეს მის მიერ ბოსტნეულის შეზღუდვას (მაგალითად: კომბოსტო, ნიორი, ხახვი, პარკოსნები), თუ ექნება დადებითი გავლენა ჩვილის შებერილობაზე. თუმცა, ზოგადად ხილის ან ბოსტნეულის შეზღუდვა დედის საკვებ რაციონში არ არის რეკომენდებული.

რაც შეეხება ალერგიულ საკვებს, როგორიც არის ძროხის რძე, კვერცხი, თევზი, თხილეულობა, ციტრუსი საწყის ეტაპზე, ასევე, უნდა მოხდეს მათი მცირე რაოდენობით და უმჯობესია არაერთდროულად მიღება, რადგან მშობელი დააკვირდეს ჩვილს. კვლევებმა აჩვენა რომ ლაქტაციის პერიოდში რომელიმე საკვების (მათ შორის ალერგიულის) შეზღუდვას არ აქვს არსებითი გავლენა ჩვილის ჯანმრთელობაზე, თუმცა აღსანიშნია, რომ დედის დაბალანსებული და სასარგებლო კვება ძალიან მნიშვნელოვანია.

- როდის არის საშიში იშვიათი დეფეკაცია?

- ნაწლავთა მოქმედება, კონსისტენცია და ფერი ცვალებადია და დამოკიდებულია ბავშვის ასაკზე, კვების ტიპზე. სრულად ბუნებრივ კვებაზე მყოფ ბავშვებს ნაწლავთა მოქმედება შესაძლოა ყოველი კვების შემდეგ ჰქონდეთ, ან ძალიან იშვიათად, მაგალითად, 1-2 კვირაში ერთხელ. თუ ამ დროს ჩვილი არ ჭირვეულობს, მუცელი რბილია, შარდვა და წონის ნამატი - ნორმის ფარგლებში, დეფეკატი - რბილი, შეშფოთების საფუძველი არ გვაქვს. ზოგჯერ დედის რძე სრულად შეიწოვება, მისი შემადგენლობიდან გამომდინარე და მხოლოდ შარდის სახით გამოიყოფა. თუ ბავშვი იმყოფება შერეულ კვებაზე ან სრულად იღებს ფორმულას, დეფეკაცია შეიძლება ჰქონდეს 1-3-ჯერ დღეში, თუ დეფეკატი არაა მკვრივი და არ ახლავს ზემოთ ჩამოთვლილი სიმპტომატიკა არც ამ შემთხვევაში ვღელავთ, მაგრამ თუ ახალშობილს პირველი რამდენიმე დღის განმავლობაში არ აქვს ნაწლავთა მოქმედება (მეკონიუმი) ან დეფეკაციის აქტმა 48 საათს გადააჭარბა, დეფეკატის კონსიტენცია მკვრივია, ბავშვი ჭირვეულობს, დეფეკაციას თან ახლავს ტკივილი, მუცლის შებერილობა, ასეთ შემთხვევაში, აუცილებლად უნდა ჩავერიოთ და მივმართოთ ექიმს (პედიატრს/ნეონატოლოგს) დახმარებისთვის. არსებობს რამდენიმე სამედიცინო მდგომარეობა, რაც განსაკუთრებით საყურადღებოა და დროული ჩარევაა საჭირო.

პრევენციის გზებზე რომ ვისაუბროთ?

- ყაბზობა, პედიატრთან ვიზიტის ხშირი მიზეზია. შეკრულობის პრობლემის მოგვარება უმეტესად კვებით შეიძლება. ასევე, არსებობს გარკვეული ვარჯიშებიც (მაგალითად, „ველოსიპედი“). უპირატესობა უნდა მივანიჭოთ ძუძუთი კვებას, თუ რასაკვირველია დედის ფსიქო-ემოციური და სომატური მდგომარეობა გვიწყობს ხელს, რადგან ქალის რძე ბუნებრივ საფაღარათო საშუალებადაც კი ითვლება. თუ ახალშობილი სრულად ფორმულაზეა ან შერეულ კვებაზე და აღენიშნება ყაბზობა, ექიმმა ჩვილს უნდა შეურჩიოს სპეციალური კვება. როდესაც ბავშვი გადადის მყარ საკვებზე, რაციონი მდიდარი უნდა იყოს უჯრედისის შემცველი საკვებით. თუ აღნიშნული ღონისძიებების მიუხედავად ბავშვთან გამოხატული რჩება ყაბზობა, დაუყოვნებლად უნდა მიმართოთ ნეონატოლოგს/პედიატრს, რათა დაადგინოს გამომწვევი მიზეზი და სწორად შეირჩეს მკურნალობის ტაქტიკა.

- როგორ მოვაგვაროთ ეს პრობლემა და ზოგადად, რას ურჩევდით მშობლებს?

- როდესაც დადგებით მსგავსი გამოწვევის წინაშე, პირველ რიგში, შეინარჩუნეთ სიმშვიდე, განსაზღვრეთ რა შეიძლება ყოფილიყო ყაბზობის გამომწვევი მიზეზი. ვიდრე მიმართავთ პედიატრს, ერთჯერადად, შეგიძლიათ გამოიყენოთ საბავშვო გლიცერინის მიკროოყნა ან სანთელი (თუ ბავშვს არ აღენიშნება სწორი ნაწლავის ნახეთქი ან სისხლდენა) და შემდეგ აუცილებლად მიმართეთ ნეონატოლოგს/პედიატრს და რა თქმა უნდა, ყოველთვის გახსოვდეთ, რომ თქვენ ძალიან კარგი დედა ხართ, თქვენ არ ხართ „დამნაშავე“, როცა ბავშვი ჭირვეულობს, შეინარჩუნეთ სიმშვიდე, განსაზღვრეთ პრობლემები, გაითვალისწინეთ ზემოთ აღნიშნული რჩევები და იმოქმედეთ რაციონალურად.

ესაუბრა მარიამ ჩოქური

წაიკითხეთ სრულად