Baby Bag

„ადგილზე რომ მივედით, საკმაოდ მძიმე სურათი დაგვხვდა - ახალშობილი, რომელიც არ სუნთქავდა...“

„ადგილზე რომ მივედით, საკმაოდ მძიმე სურათი დაგვხვდა - ახალშობილი, რომელიც არ სუნთქავდა...“

6 მაისის მორიგეობა ერთ-ერთი ყველაზე დრამატული და ემოციური აღმოჩნდა თბილისის სასწრაფო სამედიცინო დახმარების 1017 ბრიგადის წევრებისათვის (უფროსი ექიმი გურანდა მეტრეველი, უმცროსი ექიმი მარიამ ნიკოლაძე და მძღოლი იოსებ მურალაშვილი). რომ არა მათი პროფესიონალიზმი, მშობიარობა, შესაძლოა, ფატალური შედეგით დასრულებულიყო.

ყველაფერი კი 112-ის ოპერატორის მიერ გადმოცემული მორიგი მისამართით დაიწყო. გამოძახების მოტივი - მშობიარობა ბინაზე. როგორც გაირკვა, ნაადრევად დაბადებული ჩვილი არ სუნთქავდა. ოჯახის წევრების თქმით, ნაყოფი 36 კვირის იყო და მშობიარობის დაწყებას დედა არ ელოდა.

„ადგილზე რომ მივედით, საკმაოდ მძიმე სურათი დაგვხვდა. ცალკე ახალშობილი, რომელიც არ სუნთქავდა და პანიკაში მყოფი ოჯახის წევრები. პირველ რიგში, ახალშობილ გოგონას ჩავუტარეთ ყველა საჭირო მანიპულაცია, რათა მას სუნთქვა დაეწყო. ვიდრე ტირილს დაიწყებდა, მეგონა, საათები გავიდა. გადავჭერით ჭიპლარი, გავაკეთეთ ყველაფერი, რაც ასეთ დროს არის საჭირო და, პარალელურად, ჰოსპიტალიზაციისთვის დავიწყეთ მზადება. ჩვილი სულ რაღაც 1 კილოსა და 700 გრამს იწონიდა - ისეთი პატარა და უმწეო იყო. სასწრაფოდ გადავიყვანეთ დედა-შვილი უახლოეს პროფილურ კლინიკაში. ვერ წარმოიდგენთ, როგორი განცდა მქონდა. პატარასთან ერთად, მეც ხელმეორედ დავიბადე. ეს საოცარი გრძნობაა. ამ დღეს ვერც ერთი ჩვენგანი ვერ დაივიწყებს“, - ამბობს უფროსი ექიმი გურანდა მეტრეველი.

პატარა გოგონა, რომელსაც მარიამი დაარქვეს, ჯერჯერობით ისევ კლინიკაში რჩება, თუმცა, როგორც ექიმები ამბობენ, მის სიცოცხლეს საფრთხე აღარ ემუქრება და ძალიან მალე სახლში გაწერენ.

„ყოველდღე ვკითხულობ მათ ამბავს. ეს პატარა გოგონა ძალიან შემიყვარდა. როგორც კი გამოიყვანენ საავადმყოფოდან, აუცილებლად უნდა მოვინახულო დედაც და შვილიც. თქვენ ვერც კი წარმოიდგენთ, როგორი ბედნიერი ვარ, რომ მისი სიცოცხლის შენარჩუნება შევძელით“,- აღნიშნავს გურანდა მეტრეველი.

შეიძლება დაინტერესდეთ

„დედის ფსიქიკური წონასწორობის შენარჩუნებისთვის ერთი აუცილებელი პირობის დაცვაა საჭირო,“ - ევგენი კომაროვსკი

„დედის ფსიქიკური წონასწორობის შენარჩუნებისთვის ერთი აუცილებელი პირობის დაცვაა საჭირო,“ - ევგენი კომაროვსკი

ცნობილი პედიატრი ევგენი კომაროვსკი სოციალურ ქსელში პოსტს აქვეყნებს, რომელშიც დედების ფსიქიკური წონასწორობის მნიშვნელობაზე საუბრობს. ევგენი კომაროვსკი აღნიშნავს, რომ ოჯახური კონფლიქტების უმთავრეს მიზეზს დედების ზედმეტი გადაღლა და ქრონიკული სტრესი წარმოადგენს. ცნობილი პედიატრის პოსტს უცვლელად გთავაზობთ:

თითოეული ოჯახი ბავშვის დაბადებისას ერთსა და იმავე სირთულეებს აწყდება. ​ბავშვზე ზრუნვის ტვირთი უმეტესად დედას აწვება ზურგზე. ყოველდღიური სირთულეები, ძილის უკმარისობა, პირადი და სოციალური ცხოვრების არარსებობა სტრესს აძლიერებს, რასაც ხშირად წყვილები ოჯახურ კონფლიქტებამდე მიჰყავს.

დედების სტრესის უმთავრეს მიზეზს ყოველდღიური, რუტინული საზრუნავით დატვირთვა და საკუთარ თავზე ზრუნვის შეუძლებლობა წარმოადგენს. ნეგატიური ემოციები გროვდება. ეს ყოველივე ბავშვის მშობლებს შორის ურთიერთობის ხარისხზე აისახება. სტრესული გარემო ოჯახის ფუნდამენტს აზიანებს და ბავშვის სიმშვიდესა და უსაფრთხოებასაც ზიანს აყენებს.

​დედის ფსიქიკური წონასწორობის შენარჩუნებისთვის ერთი აუცილებელი პირობის დაცვაა საჭირო. დედას აუცილებლად უნდა ჰქონდეს დრო საკუთარ თავზე ზრუნვისთვის. დედამ საკუთარ თავს კვირაში რამდენიმე საათი უნდა დაუთმოს. მამისა და ოჯახის სხვა ზრდასრული წევრების უმთავრეს ამოცანას დედის საჭიროებების დაკმაყოფილება უნდა წარმოადგენდეს. მამამ და ოჯახის სხვა წევრებმა ყველაფერი უნდა გააკეთონ იმისთვის, რომ დედის ბაზისური მოთხოვნილებების დაკმაყოფილება შეძლონ.

თუ ოჯახი შეძლებს და რეგულარულად გამოყოფს დროს დედისთვის, რათა მან საკუთარ თავზე ზრუნვა და საკუთარი მოთხოვნილებების დაკმაყოფილება მოახერხოს, ეს დადებითად ​იმოქმედებს დედის ემოციურ მდგომარეობასა და შეგრძნებებზე. გარდა იმისა, რომ თავისუფალი დროის გამონახვა დედაზე ახდენს დადებით ზეგავლენას, ის ძალიან კარგად მოქმედებს ბავშვის მშობლების ურთიერთობაზეც.

​წყარო 

წაიკითხეთ სრულად