Baby Bag

როდის და რა ეკუთვნის უფასოდ ორსულს? - რა უნდა ვიცოდეთ სახელმწიფო პროგრამით გათვალისწინებული 8 უფასო ვიზიტის შესახებ

როდის და რა ეკუთვნის უფასოდ ორსულს? - რა უნდა ვიცოდეთ სახელმწიფო პროგრამით გათვალისწინებული 8 უფასო ვიზიტის შესახებ
დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. რა უნდა ვიცოდეთ სახელმწიფო პროგრამით გათვალისწინებული 8 უფასო ვიზიტის შესახებ, როდის და რა ეკუთვნის უფასოდ ორსულს? - დღეს მეან-გინეკოლოგი და ქირურგი ეკა ბუკია ამ თემებზე მოგაწვდით კომპეტენტურ ინფორმაციას.
დავიწყოთ იმით, რომ ორსულთა უფასო ვიზიტების პროგრამა ყველა კლინიკას არ აქვს. ამიტომ ეს უფასო ვიზიტები ეკუთვნის გარკვეულ კლინიკებს, რომლებიც ჩართულები არიან საყოველთაო ჯანდაცვის ამ პროექტში. აქედან გამომდინარე, უნდა შეარჩიოთ პროგრამაში ჩართული კლინიკა, თუ გსურთ უფასო 8 ვიზიტით ისარგებლოთ. ასევე უნდა გაითვალისწინოთ ის, რომ პროგრამაში მოსახვედრად აღრიცხვაზე უნდა დადგეთ ორსულობის 12 კვირის ვადამდე და უნდა იყოთ საქართველოს მოქალაქე.
პირველი ვიზიტი -13 კვირის ორსულობის ვადამდე
უფასოდ გეკუთვნით:
  • მეან-გინეკოლოგის კონსულტაცია
  • სისხლის საერთო ანალიზი
  • შარდის კულტურალური გამოკვლევა
  • სისხლის ჯგუფისა და რეზუს-კუთვნილების განსაზღვრა
  • რეზუს-ანტისხეულებზე ტესტირება რეზუს-უარყოფითი სისხლის კუთვნილების ქალებში
  • სკრინინგული ტესტები (B ჰეპატიტის ვირუსი, C-ჰეპატიტის ვირუსი, აივ ინფექცია და სიფილისი)
  • ულტრაბგერითი გამოკვლევა (აუცილებელია კისრის ნაოჭის ზომის განსაზღვრა, რაც წარმოადგენს დაუნის სინდრომის ერთ ერთ მარკერს)
მეორე ვიზიტი - ორსულობის-18-20 კვირაზე
უფასოდ გეკუთვნით:
  • მეან-გინეკოლოგის კონსულტაცია
  • ულტრაბგერითი გამოკვლევა
მესამე ვიზიტი - ორსულობის 26 კვირაზე
უფასოდ გეკუთვნით:
  • მეან-გინეკოლოგის კონსულტაცია
  • შარდში პროტეინურიის განსაზღვრა
  • ჰემოგლობინის განსაზღვრა სისხლში
  • რეზუს-ანტისხეულებზე ტესტირება რეზუს-უარყოფითი სისხლის კუთვნილების ქალებში
  • სკრინინგი გესტაციურ დიაბეტის გამოვლენის მიზნით
მეოთხე ვიზიტი - ორსულობის 30 კვირაზე
უფასოდ გეკუთვნით:
  • მეან-გინეკოლოგის კონსულტაცია
  • შარდში პროტეინურიის განსაზღვრა


​მეხუთე ვიზიტი - ორსულობის 34 კვირაზე

უფასოდ გეკუთვნით:

  • მეან-გინეკოლოგის კონსულტაცია
  • შარდში პროტეინურიის განსაზღვრა
მეექვსე ვიზიტი - ორსულობის 36 კვირაზე
უფასოდ გეკუთვნით:
  • მეან-გინეკოლოგის კონსულტაცია
  • შარდში პროტეინურიის განსაზღვრა
  • ჰემოგლობინის განსაზღვრა სისხლში
მეშვიდე ვიზიტი - ორსულობის 38 კვირაზე
უფასოდ გეკუთვნით:
  • მეან-გინეკოლოგის კონსულტაცია
  • შარდში პროტეინურიის განსაზღვრა
მერვე ვიზიტი - ორსულობის 40 კვირაზე
უფასოდ გეკუთვნით:
  • მეან-გინეკოლოგის კონსულტაცია
  • შარდში პროტეინურიის განსაზღვრა
გარდა ამისა, თქვენი გინეკოლოგი თუ ჩათვლის საჭიროდ, დაგინიშავთ დამატებით ფასიან ვიზიტებსა და კვლევებს (ორსულისა და ნაყოფის მდგომარეობიდან გამომდინარე საჭიროების შემთხვევაში).

​ასევე პროგრამა ითვალისწინებს გენეტიკური პათოლოგიების ადრეულ გამოვლენას ორსულებში, რაც მოიცავს:
  • გენეტიკურ პათოლოგიებზე სკრინიგულ გამოკვლევას სამმაგი ტესტ სისტემით
  • სკრინიგით ვერიფიცირებული ორსულების ინვაზიურ კვლევას - ამნიოცენტეზს -კარიოტიპირების მეთოდით.
ვინ საჭიროებს სამმაგი სკრინინგის ჩატარებას?
ამ კვლევას საჭიროებენ ის ორსულები, რომელთაც აქვთ ჩვენება, კერძოდ კი:
  • ქრომოსომული პათოლოგიების არსებობა ერთ ერთ მშობელთან ან ოჯახის წევრთან
  • გენური პათოლოგიის გარსებობა ერთ ერთ მშობელთან ან ოჯახის წევრთან
  • ნაადრევი ბავშვის დაბადება თანდაყოლილი განვითარების მანკით
  • ანამნეზში მკვდარშობადობა
  • ჩვეული აბორტი (3-ზე მეტი)
  • ქალის ასაკი 35 და მეტი
  • ორსულს აქვს ინსულინდამოკიდებული შაქრიანი დიაბეტი
  • ინფექციების მწვავე ფორმები: ციტომეგალოვირუსის და ტოქსოპლაზმოზის მწვავე ფორმები, სიფილისი, წითურა
  • ტერატოგენული მოქმედების ქიმიური აგნეტები
  • ნაყოფის ულტრაბგერითი გამოკვლევით განვითარების მანკის ნიშის აღმოჩენა
  • ერთ-ერთი მშობლის ნარკომანია
  • ერთ-ერთი მშობლის ალკოჰოლიზმი
  • ხელოვნური განაყოფიერება
  • ტერატოგენული მოქმედების მედიკამენტები - ანტიკოლვუნსანტები, იზოტრეტინოინი, ვარფარინი, ციტოსტატიკები.
  • მაიონიზებელი რადიაცია
რა ვადაზეა საჭირო სამმაგი სკნრინიგ ტესტის ჩატარება და როგორ ხდება?
ტესტი ტარდება ორსულობის 16-18კვ. ვადაზე. ხდება ვენიდან სისხლის აღება.
კონკრეტულად რას მოიცავს სამმაგი სკრინიგ ტესტი?
სამმაგი სკრინიგ ტესტი განსაზღვრავს 3 ჰორმონის დონეს ორსული ქალის სისხლში:
  • თავისუფალი ქორიონული გონადოტროპინი
  • ალფაფეტოპროტეინი
  • თავისუფალი ესტრიოლი
როდის კეთდება ამნიოცენტეზი და რა პროცედურას მოიცავს?

​ამნიოცენტეზი არის დიაგნოსტიკური კვლევა, რომელიც ტარდება იმ შემთხვევაში, თუ სკრინინგის ადრეულ ეტაპზე ნახულობენ რაიმე ცვლილებას, მაგალითად, 12 კვირის ვადაზე კისრის ნაოჭის ზომის ცვლილებაა, ან რაიმე ცვლილება სამმაგი სკრინიგ ტესტის შედეგებში. ამ შემთხვევაში ხდება სანაყოფე სითხის აღება ექოსკოპიის კონტროლით, მუცლის წინა კედლიდან შეჰყავთ ნემსი, რომლის საშუალებით ხდება სითხის აღება.


​გისურვებთ ჯანმრთელობას!

შეიძლება დაინტერესდეთ

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

არსებობს მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება. რამდენად მართებულია და რამდენი უნდა იყოს ორსულობებს შორის შუალედი? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი, რეპროდუქტოლოგი დიანა ჭანუყვაძე.

- არსებობს მოსაზრება, რომ განაყოფიერება არ ხდება მშობიარობის შემდგომ, სანამ მენსტრუაციული ციკლი აღდგება, ლაქტაციის პერიოდში. რამდენად მართებულია?

- დიახ, არსებობს ასეთი მითი, რომ სანამ ჩვილს ძუძუთი კვებავთ, ორსულობა არ დადგება, თუმცა სიმართლე ის არის, რომ თქვენ შეგიძლიათ დაორსულდეთ ბავშვის დაბადებიდან 3 კვირის შემდეგ, მაშინაც კი, თუ ძუძუთი კვებავთ და მენსტრუაცია არ დაგწყებიათ. თუ არ გსურთ მშობიარობის შემდეგ მალევე დაორსულება, მნიშვნელოვანია გამოიყენოთ რაიმე სახის კონტრაცეფცია, ყოველი სქესობრივი კავშირის დროს, მათ შორის, პირველის ჩათვლით.

ძუძუთი კვება ხშირად თრგუნავს ოვულაციას, მაგრამ ეს ყოველთვის ასე არ არის. ქალებს, რომლებიც ექსკლუზიურად ძუძუთი კვებავენ ჩვილს, 6 თვის განმავლობაში, ნაკლებად აქვთ ოვულაცია ამ პერიოდში, ვიდრე ქალებს, რომლებიც ძუძუთი არ კვებავენ თავიანთ ჩვილს - კონტრაცეფციის ამ მეთოდს უწოდებენ ლაქტაციურ ამენორეას. ამ მეთოდის ერთ-ერთი მთავარი გამოწვევაა მისი სწორად გამოყენება, ჩვილის კვება 3-4 საათში ერთხელ. თუ კვებათა შორის შუალედს არ დაიცავთ, მეთოდი ნაკლებად ეფექტური იქნება.

Planned Parenthood-ის მიხედვით, ლაქტაციური ამენორეა დაახლოებით 98%-ით ეფექტურია, როდესაც ამ მეთოდს ბავშვის დაბადებიდან პირველი 6 თვის განმავლობაში სწორად იყენებთ. მშობიარობიდან 6 თვის შემდეგ ის ნაკლებად ეფექტური ხდება.

- თავდაცვის საშუალებებზე რომ ვისაუბროთ...

- აღსანიშნია, რომ 100%-ით არცერთი კონტრაცეფციული საშუალება არ იცავს ორსულობისგან, მნიშვნელოვანია თითოეული მეთოდის სწორად შერჩევა და გამოყენება, რომ მისი კონტრაცეფციული მოქმედება მაქსიმალურად იყოს გამოყენებული. მშობიარობის შემდეგ ნებისმიერ დროს, შეგიძლიათ გამოიყენოთ შემდეგი კონტრაცეფციული საშუალებები:

• მამაკაცის პრეზერვატივი;
• ქალის პრეზერვატივი;
• იმპლანტი;
• მხოლოდ პროგესტოგენის შემცველი აბები - მინი პილი;
• შეგიძლიათ აირჩიოთ IUD (საშვილოსნოს შიდა საშუალება), ბავშვის დაბადებიდან 48 საათის განმავლობაში. თუ IUD არ ჩაიდგმევა 48 საათის განმავლობაში, რეკომენდებულია დაელოდოთ მშობიარობიდან დაახლოებით 4 კვირის გასვლას.

თუ ბავშვს არ კვებავთ ძუძუთი და თქვენმა გინეკოლოგმა ჩაგიტარათ კონსულტაცია, რის საფუძველზეც გაიგეთ, რომ არ გაქვთ უკუჩვენება კომბინირებულ ჰორმონალურ პრეპარატებზე, შეგიძლიათ დაიწყოთ:

• კომბინირებული აბები;
• ვაგინალური რგოლი;
• კონტრაცეპტული პლასტირი.
ხოლო თუ ძუძუთი კვებავთ, ჯანმრთელობის გარკვეული დარღვევები გაქვთ ან სისხლის შედედების მომატებული რისკი, ჩვეულებრივ გირჩევთ გადადოთ კომბინირებული აბების, რგოლის ან პლასტირის გამოყენება.

- ახდენს თუ არა ზეგავლენას ორგანიზმზე მშობიარობიდან მოკლე პერიოდში ხელახალი ორსულობა და რა მხრივ?

- მშობიარობის შემდგომ ხელახალი დაორსულება, რა თქმა უნდა, შესაძლებელია, თუმცა ასოცირდება გაზრდილ რისკებთან, როგორებიც არის:

• ნაადრევი მშობიარობა;
• თანდაყოლილი პათოლოგიები;
• ნაყოფის ზრდაში ჩამორჩენა და მასის დეფიციტი;
• დედის ანემია;
• მშობიარობის წინ პლაცენტის ნაწილობრივი ან სრული აცლა.

გარდა ამისა, CDC-ის ბოლო დროინდელი მონაცემებით, მშობიარობიდან 18 თვეზე ადრე და 60 თვეზე მეტი ინტერვალის შემთხვევაში დაორსულება შეიძლება ასოცირებული იყოს აუტიზმის განვითარების გაზრდილ რისკთან. კავშირი უფრო გამოკვეთილია აუტიზმის მძიმე ფორმების დროს (​https://www.cdc.gov/ncbddd/autism/features/time-between-births.html).

მშობიარობის შემდგომ მალევე ორსულობამ შესაძლოა ქალს არ მისცეს საკმარისი დრო, რომ მოხდეს ორგანიზმის აღდგენა, როგორც ფიზიკურად, ასევე ფსიქოლოგიურად. მაგალითად, ორსულობამ და ძუძუთი კვებამ შეიძლება გამოიწვიოს ქალის ორგანიზმში სხვადასხვა ვიტამინების და მიკროელემენტების დეფიციტი (რკინა, ფოლიუმის მჟავა, კალციუმი და ა.შ), მშობიარობის შემდგომი დეპრესია და ა.შ.

- რამდენი უნდა იყოს ორსულობებს შორის შუალედი?

- ორსულობის და ჯანმრთელობის რისკის გართულებების შესამცირებლად, კვლევების მიხედვით გვირჩევენ, რომ ორსულობებს შორის შუალედი იყოს 18-დან 24 თვემდე, მაგრამ 5 წელზე ნაკლები. დედის ასაკი 35 წლის ზევით ასოცირდება გაზრდილ რეპროდუქციულ რისკებთან, მათ შორის, უნაყოფობასთან, ქრომოსომულ ანომალიებთან და მშობიარობის არასასურველ შედეგებთან. საჭიროა რისკის და სარგებლის დაბალანსება 35 წელზე მეტი ქალების ორსულობის გადადებასა და ორსულობათა შორის შემცირებულ შუალედებს შორის.

რისკები და რეკომენდაციები არ ვრცელდება წყვილებზე, რომლებსაც ჰქონდათ სპონტანური აბორტი. თუ ჯანმრთელი ხართ და მზად ხართ, არ არის საჭირო ხანგრძლივი შუალედი ორსულობებს შორის.

ბავშვის გაჩენის დროის არჩევა წყვილის პირადი გადაწყვეტილებაა. შემდეგი ორსულობის დაგეგმვისას თქვენ და თქვენმა პარტნიორმა შეიძლება გაითვალისწინოთ სხვადასხვა ფაქტორი, ჯანმრთელობის რისკებისა და სარგებელის. სანამ არ მიიღებთ გადაწყვეტილებას, როდის გააჩინოთ შემდეგი შვილი, ექიმის რეკომენდაციით გამოიყენეთ თქვენთვის მისაღები ჩასახვის საწინააღმდეგო საშუალებები.

ესაუბრა მარიამ ჩოქური
წაიკითხეთ სრულად