Baby Bag

ბუასილი ორსულობის დროს - როგორ მოვიქცეთ სახლის პირობებში ტკივილის შესამსუბუქებლად?

ბუასილი ორსულობის დროს - როგორ მოვიქცეთ სახლის პირობებში ტკივილის შესამსუბუქებლად?
დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. დღეს მეან-გინეკოლოგი და ქირურგი ეკა ბუკია მოგაწვდით კომპეტენტურ ინფორმაციას ჰემოროიდულ დაავადებზე ანუ ბუასილზე ორსულობის დროს.

​რა არის ჰემოროიდული დაავადება?

ჰემოროიდულ დაავადებაში მოიაზრება სწორი ნაწლავის და ანუსის ვენების ვარიკოზული გაგანიერება. ძალიან ხშირად ხდება ბუასილის განვითარება ორსულებში, განსაკუთრებით მესამე ტრიმესტრში, ასევე ორსულობის შემდეგ.

არსებობს 2 ტიპის ჰემოროიდული დაავადება - გარეგანი და შინაგანი. გარეგანი ბუასილის შემთხვევაში გაგანიერებული ვენები მდებარეობს ანუსის გარეთა მხარეს. შინაგანის შემთხვევაში კი ბუასილის კვანძები განლაგებულია სწორი ნაწლავის შიგნით. შესაბამისად, სიმპტომები არის სხვადასხვა:

  • სისხლიანი გამონადენი დეფეკაციის შემდეგ
  • მტკივნეული დეფეკაცია
  • ქავილი
  • წვა
  • შეშუპება


​როგორც წესი, ეს ჩივილები გვხვდება გარეგანი ჰემოროიდული დაავადების დროს. შინაგანი ჰემოროიდული დაავადების შემთხვევაში შესაძლოა, სიმპტოები არ იყოს გამოხატული. ასევე გარეგანი ბუასილის დროს შესაძლოა, იყოს თრომბი, რაც მეტად მტკივნეულია და ანთებადი. შინაგანი ბუასილის დროს შესაძლებელია დეფეკაციის შემდეგ კვანძის გარეთ გამოსვლა, რაც გამოიწვევს სისხლდენას და ძლიერ დისკომფორტს.

რა მიზეზები იწვევს ბუასილის გაჩენას?

ორსულთა 50%-ს უვითარდება ჰემოროიდული დაავადება. ორსულობის დროს განვითარებული ჰემოროიდული დაავადების მიზეზია სისხლის მოცულობის გაზრდა, რაც იწვევს ვენების გაგანიერებას, ასევე, საშვილოსნოს ზეწოლა ანუსის მიმდებარე ვენებზე და ყაბზობა (შეკრულობა).

შესაძლებელია თუ არა ბუასილისგან განკურნება მშობიარობის შემდეგ?

შესაძლოა, მშობიაროების შემდეგ ჰემოროიდული დაავადება სრულად ალაგდეს მედიკამენტოზური მკურნალობის ჩატარების გარეშე, ვინაიდან ჰორმონების დონე, სისხლის მოცულობა უბრუნდება ნორმალურ დონეს, მცირდება წნევა მუცლის არეში.

როგორ უნდა მოვიქცეთ სახლის პირობებში მდგომარეობის შესამსუბუქებლად?

არის სხვადასხვა საშუალება, რომლებიც შეგიმცირებთ ტკივილს სახლის პირობებში.

უნდა დაიცვათ შემდეგი ნორმები:

  • საპირფარეშოში გამოიყენეთ რბილი ქაღალდი, რომ არ იყოს ძლიერი მექანიკური დაზიანება
  • დღეში რამდენჯერმე მიიღეთ თბილი წყლის აბაზანა 10 წუთის განმავლობაში, მჯდომარე მდგომარეობაში
  • შეგიძლიათ დღეში რამდენჯერმე დაზიანებულ ადგილზე მიიდოთ ყინული რამდენიმე წუთით
  • ეცადეთ, ხშირად იმოძრაოთ და არ იჯდეთ ერთ ადგილზე, რომ არ მოხდეს ზეწოლა ანუსზე
  • მიიღეთ დიდი რაოდენობით წყალი
  • იკვებეთ უჯრედისით მდიდარი საკვებით, რომ განავლოვანი მასები არ იყოს მკვრივი.

​რაც შეეხება მედიკამენტოზურ მკურნალობას, უნდა მიმართოთ პროქტოლოგს, რომ მოხდეს დიაგნოზის სწორი ვერიფიცირება და დანიშნულების მიღება. არ დაიწყოთ თვითმკურნალობა, ვინაიდან ყველა მედიკამენტი ბუასილის მკურნალობისთვის არ არის უსაფრთხო ორსულობისას და ძუძუთი კვების დროს.

​უფრო რთულ შემთხვევებში კეთდება ჰემოროიდექტომია - ოპერაციული ჩარევა.

როგორ უნდა მოვიქცეთ ორსულობისას ჰემოროიდული დაავადების პრევენციისთვის?

  • პირველ რიგში, უნდა მიიღოთ უჯრედისით მდიდარი საკვები, ხილი, ბოსტნეული, დიდი რაოდენობით წყალი, რომ არ იყოს მყარი განავლოვანი მასები, ეცადეთ დეფეკაცია გქონდეთ რეგულარულად
  • მოერიდეთ დიდი ხნის განმავლობაში მჯდომარე პოზას
  • მოერიდეთ გაჭინთვას და ყველა იმ მდომარეობას, რომელიც გამოიწვევს მუცლის ღრუში წნევის მატებას.

​გისურვებთ ჯანმრთელობას !

შეიძლება დაინტერესდეთ

,,გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას ორსულის ჯანმრთელობას" - მეან-გინეკოლოგი

,,გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას ორსულის  ჯანმრთელობას" - მეან-გინეკოლოგი

,,​რასაკვირველია, დიდი მნიშვნელობა აქვს, რომ ორსული იყოს ჯანმრთელი. მაგრამ აქვე მინდა, ხაზი გავუსვა, რომ რაც უნდა ჯანმრთელი იყოს ის, სეზონური, გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას მის ჯანმრთელობას", - ამის შესახებ მეან-გინეკოლოგმა, მედიცინის დოქტორმა, ნოდარ ზალდასტანიშვილმა ,,პირველი არხის" გადაცემაში ,,პირადი ექიმი მარი მალაზონია" ისაუბრა. 

,,ვირუსი გავრცელდება ზედა სასუნთქ, ქვედა სასუნთქ გზებში.  დიდია ალბათობა, რომ ჯანმრთელი ორსული უფრო ადვილად დაამარცხებს ამ ვირუსს, ვიდრე - საწყისი, ფონური დაავადების მქონე ორსულობის შემთხვევაში - უნდა აღინიშნოს, რომ ეს ფონური დაავადებებია დიაბეტი, გულსისხლძარღვთა პრობლემები, სასუნთქი სისტემის პრობლემები, რომლებიც შეიძლება, ჰქონდეს ორსულს. ვადებთან მიმართებით, რასაკვირველია, ორგანოგენეზის პროცესში უფრო შეასაძლოა, იყოს მეტი საფრთხე გრიპის ვირუსთან მიმართებით, ეს არის პირველი, მეორე ტრიმესტრის დასაწყისი. 

ძალიან ხშირად აღწერილია შემთხვევები, როდესაც გრიპის ვირუსმა შესაძლოა, გამოიწვიოს ორსულობის დროზე ადრე დასრულება ან შესაძლოა, ნაადრევი მშობიარობა - გააჩნია, რა ვადაზე განვითარდება ინფექცია. აღწერილია შემთხვევები, რომ თუ ადრეულ ვადებშია გრიპის ვირუსით დაინფიცირება, შესაძლოა, იყოს მაღალი ტემპერატურა - ამ დროს შესაძლოა, ნაყოფთან მიმართებით განვითარდეს გარკვეული პრობლემები; ეს არის განვითარების პრობლემები, განსაკუთრებით, ნერვული  სისტემის მხრივ. არის მთელი რიგი კვლევები, რაც არ არის მტკიცებითი მედიცინით დადასტურებული. რასაკვირველია, ადრეულ პერიოდში უფრო არის შესაძლებელი, არსებობდეს საფრთხე ან შემდგომ უკვე ახალშობილთან მიმართებით. მაგრამ ნაყოფის სიმახინჯის გამომწვევი გრიპის ვირუსი არ არის, თუმცა, რასაკვირველია, აქვე მინდა, აღვნიშნო, რომ ყველა ორსულს - როგორც ჯანმრთელს, ისე არაჯანმრთლებს, სეზონის პერიოდში  ვურჩევთ გრიპის ვაქცინაციას. ასევე, მნიშვნელოვანია, თავი შეიკავოთ საზოგადოებრივი თავშეყრის ადგილებისგან, დაიცვათ ჰიგიენა, ხშირად გაანიავოთ ოთახი", - აღნიშნავს ნოდარ ზალდასტანიშვილი.

წყარო: ,,​პირადი ექიმი მარი მალაზონია"


წაიკითხეთ სრულად