Baby Bag

რა არის საშვილოსნოს გარე ორსულობა და როგორია მისი მკურნალობა?

რა არის საშვილოსნოს გარე ორსულობა და როგორია მისი მკურნალობა?

დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. დღეს მეან-გინეკოლოგი და ქირურგი ეკა ბუკია საშვილოსნოს გარე ორსულობაზე მოგაწვდით კომპეტენტურ ინფორმაციას.

რა არის საშვილოსნოს გარე ორსულობა?
ჩვეულებრივ, ნორმალური ორსულობის დროს კვერცხუჯრედის განაყოფიერება ხდება კვერცხსავალ მილში, შემდეგ კი მილის საშუალებით განაყოფიერებული კვერცხუჯრედი გადადის საშვილოსნოს ღრუში, სადაც ხდება მისი ჩანერგვა და შემდგომი განვითარება. საშვილოსნო გარე ორსულობის დროს განაყოფიერებული კვერცხუჯრედის მიმაგრება ხდება საშვილოსნოს გარეთ. არსებობს საშვილოსნოს გარე ორსულობის რამდენიმე სახე:
  • კვერცხსავალი მილის
  • საკვერცხის
  • მუცლის ღრუს
  • საშვილოსნოს ყელი.

​ყველაზე ხშირი ფორმაა კვერცხსავალი მილის ორსულობა.

​ორსულობის სადიაგნოსტიკო სწრაფი ტესტი ყველა ზემოთ აღნიშნულ შემთხვევაში იქნება დადებითი.

​განაყოფიერებულ კვერცხუჯრედს არ შეუძლია ზრდა-განვითარება საშვილოსნოს ღრუს გარდა სხვა მიდამოში.

​საშვილოსნოს გარე ორსულობის რისკ-ფაქტორებია:
  • დედის ასაკი 35 წელი და ზემოთ
  • პაციენტებში, ვისაც გადატანილი აქვთ მცირე მენჯის ღრუს ორგანოებზე ქირურგიული ჩარევა
  • პაციენტებში, ვისაც გადატანილი აქვთ ქირურგიული ჩარევა მუცლის ღრუს ორგანოებზე
  • მრავალი აბორტი
  • მცირე მენჯის ღრუს ორგანოების ანთებითი ავადმყოფობები
  • ენდომეტრიოზი
  • ქირურგიული სტერილიზაცია (კვერცხსავალი მილების გადაკვანძვის მიუხედავად დამდგარი მილის ორსულობა)
  • კვერცხსავალ მილებზე გადატანილი ოპერაცია
  • კვერცხსავალი მილების ლორწოვანის დაზიანება, რაც აფერხებს კვერცხუჯრედის გადაადგილებას საშვილოსნოს ღრუსკენ
  • საშვილოსნოს შიდა კონტრაცეპტივის „სპირალის“ გამოყენება დიდი ხნის განმავლობაში
  • ორალური კონტრაცეპტივების ხანგრძლივი გამოყენება
  • სქესობრივი გზით გადამდები ინფექციები
  • ანამნეზში გარე ორსულობა
  • კვერცხუჯრედის პათოლოგია (ქრომოსომული ანომალიები)
  • საშვილოსნოსა და დანამატების ონკო დაავადებები

​რა სიმპტომებია დამახასიათებელი საშვილოსნოს გარე ორსულობისთვის?
უფრო ხშირად გამოხატული სიმპტომებია:
  • შეტევითი ხასიათის ტკივილი მუცლის ქვედა არეში
  • მცირე ან ძლიერი სისხლიანი გამონადენი საშოდან
  • თავბრუსხვევა
  • ზეწოლის შეგრძნება სწორ ნაწლავზე

​როგორ ხდება საშვილოსნოს გარე ორსულობის დიაგნოსტირება?
საშვილოსნოს გარე ორულობის დიაგნოსტირება ხდება ვაგინალური ექოსკოპიითა და სისხლში ქორიონული გონადოტროპინის დონის განსაზღვრით.

​როგორია საშვილოსნოს გარე ორსულობის მკურნალობა?
საშვილოსნოს გარე ორსულობის ნებისმიერი ფორმა წარმოადგენს ქალის ჯანმრთელობისთვის საშიშ მდგომარეობას და საჭიროებს დაუყოვნებლივ ოპერაციულ მკურნალობას. ზემოთ აღნიშნული ჩივილებისა და სიმპტომების არსებობის შემთხვევაში დაუყოვნებლივ მიმართეთ ექიმს.
კვერცხსავალი მილის ზოგიერთი ფორმის დროს (რაც დამოკიდებულია ორსულობის ვადასა და მდებარეობაზე) შესაძლებელია მედიკამენტოზური მკურნალობის ჩატარება. რაც ხდება მხოლოდ ექიმის გადაწყვეტილებითა და მეთვალყურეობით.
გისურვებთ ჯანმრთელობას!

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფ​ი“)

შეიძლება დაინტერესდეთ

,,გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას ორსულის ჯანმრთელობას" - მეან-გინეკოლოგი

,,გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას ორსულის  ჯანმრთელობას" - მეან-გინეკოლოგი

,,​რასაკვირველია, დიდი მნიშვნელობა აქვს, რომ ორსული იყოს ჯანმრთელი. მაგრამ აქვე მინდა, ხაზი გავუსვა, რომ რაც უნდა ჯანმრთელი იყოს ის, სეზონური, გრიპის ვირუსით ინფიცირებამ შესაძლოა, ძალიან დიდი საფრთხე შეუქმნას მის ჯანმრთელობას", - ამის შესახებ მეან-გინეკოლოგმა, მედიცინის დოქტორმა, ნოდარ ზალდასტანიშვილმა ,,პირველი არხის" გადაცემაში ,,პირადი ექიმი მარი მალაზონია" ისაუბრა. 

,,ვირუსი გავრცელდება ზედა სასუნთქ, ქვედა სასუნთქ გზებში.  დიდია ალბათობა, რომ ჯანმრთელი ორსული უფრო ადვილად დაამარცხებს ამ ვირუსს, ვიდრე - საწყისი, ფონური დაავადების მქონე ორსულობის შემთხვევაში - უნდა აღინიშნოს, რომ ეს ფონური დაავადებებია დიაბეტი, გულსისხლძარღვთა პრობლემები, სასუნთქი სისტემის პრობლემები, რომლებიც შეიძლება, ჰქონდეს ორსულს. ვადებთან მიმართებით, რასაკვირველია, ორგანოგენეზის პროცესში უფრო შეასაძლოა, იყოს მეტი საფრთხე გრიპის ვირუსთან მიმართებით, ეს არის პირველი, მეორე ტრიმესტრის დასაწყისი. 

ძალიან ხშირად აღწერილია შემთხვევები, როდესაც გრიპის ვირუსმა შესაძლოა, გამოიწვიოს ორსულობის დროზე ადრე დასრულება ან შესაძლოა, ნაადრევი მშობიარობა - გააჩნია, რა ვადაზე განვითარდება ინფექცია. აღწერილია შემთხვევები, რომ თუ ადრეულ ვადებშია გრიპის ვირუსით დაინფიცირება, შესაძლოა, იყოს მაღალი ტემპერატურა - ამ დროს შესაძლოა, ნაყოფთან მიმართებით განვითარდეს გარკვეული პრობლემები; ეს არის განვითარების პრობლემები, განსაკუთრებით, ნერვული  სისტემის მხრივ. არის მთელი რიგი კვლევები, რაც არ არის მტკიცებითი მედიცინით დადასტურებული. რასაკვირველია, ადრეულ პერიოდში უფრო არის შესაძლებელი, არსებობდეს საფრთხე ან შემდგომ უკვე ახალშობილთან მიმართებით. მაგრამ ნაყოფის სიმახინჯის გამომწვევი გრიპის ვირუსი არ არის, თუმცა, რასაკვირველია, აქვე მინდა, აღვნიშნო, რომ ყველა ორსულს - როგორც ჯანმრთელს, ისე არაჯანმრთლებს, სეზონის პერიოდში  ვურჩევთ გრიპის ვაქცინაციას. ასევე, მნიშვნელოვანია, თავი შეიკავოთ საზოგადოებრივი თავშეყრის ადგილებისგან, დაიცვათ ჰიგიენა, ხშირად გაანიავოთ ოთახი", - აღნიშნავს ნოდარ ზალდასტანიშვილი.

წყარო: ,,​პირადი ექიმი მარი მალაზონია"


წაიკითხეთ სრულად