საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე ონლაინ კაზინოების აკრძალვის ახალი ინიციატივის შესახებ ისაუბრა:
„სათამაშო ბიზნესი და ონლაინ კაზინოები - ვიცით, რომ ეს თითოეულ მოქალაქეს აწუხებს ძალიან. მილიარდ ხუთასი მილიონი ლარი გაედინება ქვეყნიდან ონლაინ კაზინოების მეშვეობით. ჩვენი ახალგაზრდები ყოველდღე თამაშობენ ონლაინ კაზინოში და აგებენ ფულს. მე ამის თაობაზე მქონდა საუბარი ეკონომიკურ გუნდთან. პირველ ეტაპზე წარმოვადგენთ საკანონმდებლო ინიციატივას, რომელიც გულისხმობს გადასახადების გაზრდას ონლაინ კაზინოების მფლობელებისთვის.“
ირაკლი ღარიბაშვილის თქმით, ონლაინ კაზინოების რეკლამა უნდა აიკრძალოს:
„პირველ ეტაპზე ჩვენ ვფიქრობთ, რომ გაიზარდოს გადასახადები, აიკრძალოს რეკლამა და 25 წლამდე ავწიოთ ბარიერი. მეორე ეტაპზე საერთოდ უნდა აიკრძალოს ონლაინ კაზინოები. ეს ხედვა მაქვს. მზად ვარ ღიად ვისაუბრო ამ თემაზე. მაქვს იმედი, რომ იქნება საზოგადოების მხარდაჭერაც.“
„ბოლო პერიოდში ლიბერალური გახდა კანონმდებლობა ნარკომანიის მიმართულებით. ჩვენი ახალგაზრდები ნაცვლად იმისა, რომ დაკავდნენ სპორტით, ისწავლონ, იმუშაონ, არიან დაკავებული მავნე ნივთიერების მოხმარებით. უნდა გამკაცრდეს ფსიქოტროპული მედიკამენტების გაყიდვაც. მე პირადად გავაკონტროლებ აღსრულების პროცესს,“ - განაცხადა ირაკლი ღარიბაშვილმა.
წყარო: ტელეკომპანია „მაესტრო“