Baby Bag

„ვინც ფიქრობთ, რომ შრომას არაფერი მნიშვნელობა არა აქვს, წაგებული პოზიციიდან იწყებთ და ვერსად ვერაფერს ვერ მიაღწევთ,“- დავით გადელია

„ვინც ფიქრობთ, რომ შრომას არაფერი მნიშვნელობა არა აქვს, წაგებული პოზიციიდან  იწყებთ და ვერსად ვერაფერს ვერ მიაღწევთ,“- დავით გადელია

ბოჭორიშვილის სახელობის კლინიკის გენერალური დირექტორი დავით გადელია სოციალურ ქსელში პოსტს აქვეყნებს, რომელშიც იმ ადამიანებს ეხმაურება, რომელთაც შრომის მნიშვნელობის გააზრება უჭირთ:

„წავუანდერძებ...

არა, ჯერ არაფერი მემუქრება.... თითქოს.. ძაან არ შეშინდეთ- ისე, ცოტათი.. ანდერძი, როგორც წესი მემკვიდრეებს ეკუთვნის- შვილებს, შვილიშვილებს.. სწორედ მათთან ჭირს ზუსტი სიტყვების მოძებნა, რომ ბოლომდე წაიკითხონ, ყალბ პათეთიკად არ მიიჩნიონ, ჭკუა ბებიაშენს დაარიგე!" - არ თქვან. არა, თუ ანდერძი ძალიან კონკრეტულია: ხუთოთახიან ბინას ვაკეში ვუტოვებ ამას", ლექსუსს- იმას", აგარაკს კი-..." კი ბატონო, ასეთი ანდერძი უფრო ადვილი წასაკითხია და რა დაძალება უნდა! ისე, კაცმა რომ თქვას, მცირექონებიანებმაც მართლა უნდა განვკარგოთ ქონება ანდერძით, წესრიგი რომ არ დაირღვეს ჩვენს მერე, მაგრამ ჩვენ ხომ არ ვაპირებთ სიკვდილს ხვალ-ზეგ!? ასეთი თადარიგიანობით ქართველობას ხომ არ ვუღალატებთ!!?...

მოკლედ, შვილებო- ჩემო, ჩემი მეგობრების, ნაცნობების, თანამემამულეების- ამ ჯერზე ანდერძად მხოლოდ სიტყვებს გიტოვებთ. თქვენი საქმეა, დამიჯერებთ თუ არა. თუმცა არ დავმალავ- ამაზე მეტად არაფერი მინდა თქვენს გონებას ჩაეჭიდოს და მეც სათქმელი სწორად ვთქვა:

- ბოლო თვეა, კლინიკის სტაფის არასამედიცინო ნაწილი, ერთი X-დღისთვის ვასრულებდით ინტერიერთან დაკავშირებულ დიდ ფართობის სამუშაოებს, ძალიან კრეატიული გადაწყვეტებით. სამუშაო მოითხოვდა ამ საქმეში მთლიანად, მთელი გულით გადავარდნას- სრულ ძალისხმევას, უმეტესად სამუშაო საათების უგულველყოფასაც. ასეთი საერთო საქმის კეთებისას ძალიან კარგად ჩანს ვინ რას აკეთებს, ვინ რამდენს დებს, ვინ საჩკაობს".. აი აქ მინდა ანდერძის პირველი პუნქტი ვთქვა: არ არსებობს იმაზე დიდი თანადგომის განცდა, ვიდრე ერთად საქმის კეთებისას ერთგულებაა! როცა იცი არ გიღალატებს, მხარს არ გამოგაცლის, თავს არ დაზოგავს მიზნისთვის... შეგიძლიათ ასეთ ადამიანს პატივი არ სცეთ, რაიმე სუბიექტური მიზეზის გამო სხვა ამჯობინოთ, როცა მისი დაწინაურების საშუალება გექნებათ? -მე არა მაგრამ ის..?" თუ შენ არა, შვილო, მაშინ რატომ გგონია მამების თაობა, ან ნებისმიერი სხვა თაობის ადამიანი, მაღალ პოზიციაზე მყოფი, შენზე უფრო ცუდი, ნაძირალა, დაუნახავი? კიდევ მეტი- ისეთი სულელი, რომ ადამიანს, რომელიც გულს დებს საქმეში, ფუქსავატი კაიბიძიანი" ამჯობინოს??

პუნქტი2. -კერძო ბიზნესში ეს სრულიად გამორიცხულია, მთელი ახალგაზრდობა სახელმწიფო სამსახურში ვიყავი და იმ დროსაც დიდი მნიშვნელობა ჰქონდა ნიჭს და შრომას. თუმცა, ჩაწყობაც ბევრი იყო. მაგრამ ახლა..

ახლა ვინც ფიქრობთ, რომ შრომას არაფერი მნიშვნელობა არა აქვს-„მაინც ვერავინ ვერაფერს დაინახავს" ან პირიქით- ვინ შეგვამჩნევს კაცო საჩკაობას, ამ ხელფასზე თავი რატონ უნდა მოვიკლა-ამოხტება პუნქტი 3:-ან მართლა არ აკეთებთ რამე ღირებულს, ან დარწმუნებით გეტყვით- წაგებული პოზიციიდან, უფრო ზუსტად- ჩასვრილი პოზიციიდან იწყებთ და ვერსად ვერაფერს ვერ მიაღწევთ!

პუნქტი4:რაც არ უნდა დიდ კომპანიაში იყოთ უმნიშვნელო პოზიციაზე, ჩათვალეთ რომ თქვენი ბიზნესი გაქვთ! ის რასაც აკეთებთ- ექთანი ხართ, თუ კალატოზი- თქვენი ბიზნესია! ბიზნესი, რომელზეც დამოკიდებულია თქვენი ფინანსური კეთილდღეობა და რაც უფრო გულმოდგინედ გააკეთებთ- მით უფრო კარგი ფინანსური წარმატება გელით!

ეს პუნქტები ძალიან დიდი ხნის გამოცდილია- მიწის მუშაზეც, ექიმზეც და მსახიობზეც. არ ვიცი, მარკიზ დე სადის მებაღე დაფასდა თუ არა (იყო კი კაი მებაღე?), მაგრამ რაც ბაზარზე თავისუფალი ნების მქონე სამუშაო ძალა გამოჩნდა- მას შემდეგ ნამდვილად მუშაობს ყველა ეს პუნქტი და შ რ ო მ ა ყოველთვის ფასდება!“ - აღნიშნავს დავით გადელია. 

შეიძლება დაინტერესდეთ

„ჰიპერაქტიურობაში იგულისხმება, რომ ბავშვი ძალიან ბევრს საუბრობს, არ შეუძლია ერთ ადგილზე წყნარად ჯდომა, ბევრს დარბის, მოძრაობს,“ - ნინო მარგველაშვილი

„ჰიპერაქტიურობაში იგულისხმება, რომ ბავშვი ძალიან ბევრს საუბრობს, არ შეუძლია ერთ ადგილზე წყნარად ჯდომა, ბევრს დარბის, მოძრაობს,“ - ნინო მარგველაშვილი

ნეიროფსიქოლოგმა ნინო მარგველაშვილმა ბავშვებში ყურადღების დეფიციტისა და ჰიპერაქტივობის სინდრომის გამოვლენის შესახებ ისაუბრა. მან მშობლებს საინტერესო რჩევები მისცა:

„როდესაც მშობელი ხედავს, რომ რაღაც ისე ვერ არის, როგორც უნდა იყოს ბავშვთან, ​ბავშვი ძალიან აქტიურია, მუდმივად სტარტზეა, ძალიან ბევრს ლაპარაკობს, ეჭრება საუბარში, არ არის ორგანიზებული, არ შეუძლია ერთ აქტივობაზე კონცენტრაცია, ჩემი რჩევა იქნება, რომ მშობელი მხოლოდ პედიატრს ნუ ენდობა. ამ შემთხვევაში მშობელმა პედიატრთან ერთად აუცილებლად უნდა მიიყვანოს ბავშვი ფსიქოლოგთან, რათა მოხდეს მისი უმაღლესი ფსიქიკური ფუნქციების შეფასება.“

ნინო მარგველაშვილმა ქცევის იმ გამოხატულებებზეც ისაუბრა, რაც ყურადღების დეფიციტისა და ჰიპერაქტივობის სინდრომის შემთხვევაში ზედაპირულად ვლინდება:

„ქცევის მთავარი გამოხატულება, რაც ჩანს ზედაპირზე, არის ის, რომ ​ბავშვი არის უყურადღებო, არ არის ორგანიზებული, ხშირად ავიწყდება მასწავლებლის ინსტრუქცია, კარგავს ნივთებს, არ შეუძლია, რომ ერთ აქტივობას ბოლომდე მიჰყვეს. ჰიპერაქტიურობაში იგულისხმება, რომ ბავშვი ძალიან ბევრს საუბრობს, არ შეუძლია ერთ ადგილზე წყნარად ჯდომა, მუდამ სურს, რომ თითებით რაღაც ითამაშოს, ფეხი რაღაცას მიადოს. ის ბევრს დარბის, მოძრაობს. იმპულსურობაში იგულისხმება, რომ ადამიანს არ აქვს თვითკონტროლის შესაძლებლობა. მას არ შეუძლია რიგის დაცვა. კლასში სანამ მასწავლებელი კითხვას დაასრულებს, მანამდე აქვთ პასუხი. ეს ყველაფერი არის ის, რაც ზედაპირზეა.“

„ქცევის პრობლემა ზედაპირია. ამის ქვეშ ძალიან ბევრ გამოწვევასთან აქვთ საქმე მშობლებსა და ბავშვს. ​ძალიან ხშირია ამ ბავშვებში სპეციფიკური დასწავლის დარღვევა. უმეტესად ეს არის მართლწერის პრობლემა, ბავშვებს უჭირთ საკუთარი აზრის ფურცელზე გადატანა, უძნელდებათ მათემატიკური კალკულაციები. ერთ-ერთი მთავარი, რასაც ფსიქოლოგი გამოიკვლევს, არის: აქვს თუ არა ბავშვს პრობლემა აღმასრულებელ ფუნქციებში. ეს არის ის, რაც ყველაზე ბოლოს მწიფდება ჩვენს თავის ტვინში. ეს არის მიზნის დასახვა და მისი მიყოლა, რომ როდესაც ახალი სტიმული შემოდის, გადავლახოთ, იმიტომ, რომ მიზნისკენ მივდივართ. სამწუხაროდ, ასეთ ბავშვებს უჭირთ მიზნის ბოლომდე მიყოლა. მათ ასევე აქვთ დროის შეგრძნების პრობლემა. უჭირთ, რომ სწორად შეაფასონ დრო. ხშირად დეტალებს არ აქცევენ ყურადღებას. მათ ძალიან უჭირთ დავალების დაწყება. ყველაფერს აკეთებენ, რომ გადაავადონ დავალების დაწყება. ბავშვი ექვს ან შვიდ სიმპტომს მაინც უნდა აკმაყოფილებდეს, სხვადასხვა გარემოში უნდა ვლინდებოდეს ქცევა და ეს აუცილებლად უნდა უშლიდეს ხელს ყოველდღიურ ფუნქციონირებაში, რომ დაისვას ყურადღების დეფიციტისა და ჰიპერაქტივობის სინდრომის დიაგნოზი,“ - აღნიშნულ საკითხებზე ნინო მარგველაშვილი საქართველოს პირველი არხის გადაცემაში „კომუნიკატორი“ ისაუბრა.

წყარო: ​„კომუნიკატორი“

წაიკითხეთ სრულად