Baby Bag

მსოფლიოს სხვადასხვა ქვეყნის 12 საახალწლო ტრადიცია, რომელსაც იღბალი მოაქვს

მსოფლიოს სხვადასხვა ქვეყნის 12 საახალწლო ტრადიცია, რომელსაც იღბალი მოაქვს
2019 წელი უკანასკნელ დღეებს ითვლის და ყველანი ახალი წლის მოლოდინში ვართ. 2020 წლის დადგომას შეგიძლიათ სხვადასხვა საინტერესო აქტივობით შეხვდეთ. ადამიანების ნაწილს საახალწლო განწყობის შექმნაში ხმაურიან წვეულებაზე წასვლა ეხმარება, ზოგიერთს კი ოჯახურ გარემოში საღამოს მშვიდად გატარება უფრო იზიდავს. არ აქვს მნიშვნელობა, როგორ გსიამოვნებთ ახალ წელთან შეხვედრა. მთავარია, გახსოვდეთ, რომ განწყობა, რომელიც პირველ იანვარს გექნებათ მომდევნო თვეების მანძილზეც გაგყვებათ. ამიტომ, ეცადეთ 2020 წელს ხალისიანად და ენერგიულად ​შეხვდეთ.

ზოგიერთი კულტურის წარმომადგენლებს მტკიცედ სწამთ, რომ თქვენი იღბალი, ჯანმრთელობა და კეთილდღეობა მთლიანად არის დამოკიდებული იმაზე, თუ რას აკეთებთ და როგორ განწყობაზე ხართ ღამის 12 საათზე, როდესაც ახალი წელი შემობრძანდება. ჩვენს სტატიაში მსოფლიოს სხვადასხვა ქვეყნის 12 საახალწლო ტრადიციას გაგაცნობთ, რომელთა დახმარებით ადამიანები თავიანთი ცხოვრებიდან ბოროტ სულებს განდევნიან და იღბალს იზიდავენ. ისინი იმედოვნებენ, რომ ახალი წელი ბარაქიანი და წარმატების მომტანი იქნება. საახალწლო რიტუალებს ადამიანები სიყვარულის პოვნის იმედითაც ატარებენ. არ აქვს მნიშვნელობა, ცრურწმენების გჯერათ თუ არა, იმედი ვიქონიოთ, რომ 2020 წელი ოცნებების ასრულებაში დაგეხმარებათ.

ყურადღებით გაეცანით სხვადასხვა კულტურის წარმომადგენლების საახალწლო რიტუალებს. შესაძლოა, რომელიმემ ისე მოგხიბლოთ, რომ მისი ჩატარება ყოველწლიურ ტრადიციად გექცეთ.

• ყურძნის 12 მარცვლის მირთმევა

'ესპანეთში ახალი წლის დადგომას საკმაოდ უცნაური ტრადიციით ხვდებიან. ღამის 12 საათზე ადამიანები ყურძნის 12 მარცვალს მიირთმევენ. თითოეული მარცვალი მომავალი წლის ერთ თვეს აღნიშნავს. ადამიანები იმედოვნებენ, რომ მათთვის ყოველი თვე სიხარულის და იღბლის მომტანი აღმოჩნდება. თუ რიტუალები გიზიდავთ, სცადეთ ესპანელებს მიბაძოთ. ყურძნის მირთმევით იღბალს თუ ვერ მოიზიდავთ, ახალ წელს ჯანსაღი პროდუქტის მირთმევით მაინც დაიწყებთ.

• საყვარელი ადამიანის კოცნა

შესაძლოა, აღნიშნული ტრადიციის შესახებ აქამდეც გსმენიათ. როდესაც 12 საათი დადგება, იმ ადამიანს უნდა აკოცოთ, რომელიც გიყვართ. აღნიშნული რიტუალი გერმანული და ბრიტანული ფოლკლორიდან იღებს სათავეს. გერმანელი და ბრიტანელი ხალხის რწმენით, ადამიანი, რომელსაც 12 საათზე შეეხებით, მომდევნო წლის ხასიათს მთლიანად განსაზღვრავს. სწორედ ამიტომ, მხოლოდ იმ ადამიანს უნდა აკოცოთ, რომელიც ყველაზე მეტად გიყვართ.

• სკამიდან ჩამოხტომა

დანიელ ხალხს მტკიცედ სწამს, რომ თუ შუაღამის 12 საათზე სკამზე ახვალთ და შემდეგ ძირს ჩამოხტებით, ახალი წელი იღბლის და წარმატების მომტანი იქნება. სკამიდან შესრულებული ნახტომი ბოროტ ძალებს აფრთხობს და ადამიანი ახალ დროში გადაყავს. თუ აღნიშნული ტრადიციის მიმდევარი გახდებით, ეცადეთ, ნახტომი ფრთხილად შეასრულოთ, რათა სერიოზული დაზიანებები არ მიიღოთ.

• ბარდის, ღორის ხორცისა და ბრინჯის კერძის დაგემოვნება

ამერიკელების ნაწილი 12 საათზე აუცილებლად მიირთმევს ბარდით, ღორის ხორცითა და ბრინჯით მომზადებულ საახალწლო კერძს. ისინი ფიქრობენ, რომ აღნიშნული კერძის წყალობით მომდევნო წლის მანძილზე სიმშვიდე არ მოაკლდებათ და იღბალიც გაანებივრებთ. თუ რომელიმე ზემოთ დასახელებული ინგრედიენტი არ მოგწონთ, შეგიძლიათ, კერძი თქვენი გემოვნებით შეცვალოთ.

• ცარიელი ჩემოდნებით სეირნობა

კოლუმბიაში ადამიანები ხელში ცარიელ ჩემოდანს იმარჯვებენ და ღამით სასეირნოდ მიდიან. ისინი ფიქრობენ, რომ აღნიშნული რიტუალის წყალობით მომავალი წელი საინტერესო თავგადასავლებითა და მოგზაურობებით იქნება სავსე.

• პიტნის გოჭის ნაკეთობის გატეხვა

ნიუ-იორკში პიტნისგან დამზადებული გოჭის ნაკეთობის შეძენა შეგიძლიათ, რომელიც დღესასწაულების სეზონზე ყველა მაღაზიაში იყიდება. ადამიანები პიტნის გოჭს მცირე ზომის ჩაქუჩით ტეხავენ და ნაკეთობის მომცრო ნაჭერს მიირთმევენ. ისინი ფიქრობენ, რომ აღნიშნული ტრადიცია იღბლისა და წარმატების მომტანია.

• კარისა და ფანჯრების გაღება

ძველი წლის გასაცილებლად და ახლის გულთბილად დასახვედრად ფილიპინების მოსახლეობას ერთ-ერთი საუკეთესო ტრადიცია აქვს. ისინი სახლის კარს და ფანჯრებს აღებენ, რათა სახლიდან ნეგატიური ენერგია განდევნონ და პოზიტიურს ოჯახში შემოსვლის საშუალება მისცენ.

• ყვითელი, წითელი, თეთრი და მწვანე საცვლების ტარება

ლათინური ამერიკის ქვეყნებში ადამიანებს სჯერათ, რომ გარკვეული ფერის საცვლების ტარებას მათთვის იღბლის მოტანა შეუძლია. ყვითელი და მწვანე საცვლები დოვლათის მომტანია, წითელი სიყვარულს გაპოვნინებთ, ხოლო თეთრი სიმშვიდის მოპოვებაში დაგეხმარებათ.

• თეთრი ტანსაცმლის ჩაცმა

ბრაზილიაში ადამიანები ახალ წელს თეთრ ტანსაცმელში გამოწყობილები ხვდებიან. ისინი ღამის 12 საათზე სანაპიროსთან მიდიან, რათა ოკეანის ტალღებს გაეთამაშონ. თითოეულ ტალღასთან შეჯახებისას ადამიანები ერთ სურვილს იფიქრებენ. თეთრი ტანსაცმელი მათ იღბლისა და სიმშვიდის მოპოვებაში ეხმარებათ.

• ფანჯრიდან წყლის გადასხმა

პუერტო-რიკოში ადამიანებს სწამთ, რომ ახალი წლის ღამეს ფანჯრიდან წყლის გადასხმა სახლიდან ბოროტ სულებს განდევნის. მართალია, აღნიშნული ტრადიცია მათი ფანჯრების ქვეშ მოსეირნე ადამიანებისთვის იღბლის მომტანად ვერ ჩაითვლება, მაგრამ თავად ტრადიციის მიმდევართათვის ის ბედნიერების და სიკეთის მომტანი რიტუალია. პუერტო-რიკოში ადამიანების ნაწილი სახლში შაქარსაც აბნევს, რათა კეთილი სულები მიიზიდოს.

• დაფერფლილი სურვილები შამპანიურის ჭიქაში

რუსეთში ადამიანები თავიანთ სურვილებს ფურცელზე წერენ, შემდეგ აღნიშნულ ფურცელს წვავენ, ფერფლს კი შამპანიურით სავსე ჭიქაში ყრიან. შუაღამემდე ისინი შამპანიურს სვამენ და იმედოვნებენ, რომ მომავალ წელს მათი ყველა სურვილი ასრულდება.

• სურვილების შენახვა ქილაში

ამერიკაში ადამიანები სურვილებს ფურცელზე წერენ, შემდეგ კი სპეციალურ ქილაში ინახავენ. მომდევნო წელს ისინი შენახულ სურვილებს ხელახლა კითხულობენ და ამოწმებენ, რამდენად მოახერხეს დასახული მიზნების მიღწევა. 

მომზადებულია goodhousekeeping.com-ის მიხედვით
თარგმნა ია ნაროუშვილმა 

შეიძლება დაინტერესდეთ

„ეს საახალწლო ტრადიცია მაქვს, რომ განვმარტოვდები ორი წუთით, მიზნად ვისახავ, რას გავაკეთებ,“ - სალომე ბაკურაძე

„ეს საახალწლო ტრადიცია მაქვს, რომ განვმარტოვდები ორი წუთით, მიზნად ვისახავ, რას გავაკეთებ,“ - სალომე ბაკურაძე

მომღერალმა სალომე ბაკურაძემ ახალი 2022 წლის მიმართ მისი მოლოდინების შესახებ ისაუბრა და აღნიშნა, რომ იმედიანად არის განწყობილი:

„ძლივს, რა კარგი იყო, რომ გამახსენდა სამუშაო რეჟიმი. ისევ კონცერტები, ისევ ჩქარობ, ისევ გეგმავ, ისევ ბევრი ტანსაცმელი მანქანაში. ამან ძალიან გამახარა და დამიბრუნა რწმენა, რომ 2022 წელი ნამდვილად იქნება გარდამტეხი და ნელ-ნელა დავუბრუნდებით ჩვეულ რეჟიმს. ახალ წელს შევხვდი სიმღერით, შუშხუნა ღვინით ხელში. დავთვალე ათიდან ერთამდე.“

სალომე ბაკურაძის თქმით, პანდემიის გამო არსებული შეზღუდვების პირობებში ცხოვრების ეტაპი მისთვის ძალიან რთულ პერიოდთან ასოცირდება:

​ურთულესი პერიოდი იყო. ძალიან მძიმე იყო, მით უმეტეს, ჩემთვის. მივხვდი, რომ მხოლოდ კარგ ხასიათზე ვართ საჭირო, მეტი უფუნქციოები ვართ. რჩები საყვარელი საქმისა და შემოსავლების გარეშე.“

„მე უკვე ვგრძნობ, რომ ეს წელი ბევრად უკეთესი იქნება. ეს საახალწლო ტრადიცია მაქვს, რომ განვმარტოვდები ორი წუთით, მოკლე ექსკურსს ვაკეთებ, მიზნად ვისახავ რაღაცებს, რასაც გავაკეთებ. რაც უფრო კონკრეტულია ხოლმე ეს მიზნები, მით უფრო ერთ წელიწადში ესწრება,“ - აღნიშნულ საკითხზე სალომე ბაკურაძემ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად