Baby Bag

„შვილებთან აუცილებლად უნდა წამოიწიოს მამის ავტორიტეტი,“ - ფსიქოლოგი ნანა გოგიჩაშვილი ბავშვის აღზრდაში მამის როლის შესახებ

ფსიქოლოგმა ნანა გოგიჩაშვილმა ბავშვის აღზრდაში მამის მნიშვნელოვანი როლის შესახებ ისაუბრა:

„ძალიან დაბეჯითებით გეუბნებით, რომ ბავშვი არამარტო ხედავს, არამედ გრძნობს ოჯახში კეთილსაიმედო განწყობებია თუ პირიქით, ემოციურად დამუხტული სიტუაციაა. ამის იდენტიფიცირება შეიძლება როგორც ნახატებით, ასევე საუბრებით. ამის უამრავი ტექნიკა არსებობს. მაგალითად, ეტყვით: „მე და მამა...“ წინადადება მან უნდა დაამთავროს. „ერთხელ მამიკომ...“ მან უნდა დაამთავროს. ზღვა ინფორმაცია მოდის ისეთი, რომელზეც მშობელს წარმოდგენაც კი არ აქვს. შესაბამისად, მამის როლი უკიდურესად მნიშვნელოვანია. მამა არის არამხოლოდ ბიოლოგიური სქესის წარმომადგენელი ოჯახში, არამედ მზრუნველი, მფარველი. მამა აყალიბებს გარკვეულწილად წესებს ოჯახში. ფროიდი ამბობს, რომ მამის ხატს ქმნის დედა. ის კი არა: „მამაშენს ვინ ეკითხება, მე ვარ აქ მთავარი.“ შეიძლება სუბიექტურად ფიქრობდე ამას, მაგრამ შვილებთან აუცილებლად უნდა წამოიწიოს მამის ავტორიტეტი: „მამიკო გავახაროთ,“ „მამიკოს ვუთხრათ,“ „მამიკო მოგვეხმარება,“ „ მამიკოს არ ეწყინოს.“ აქ პოზიტიურ ჭრილში შემოდის მამის ხატი. რა თქმა უნდა, მამაც უნდა გვაძლევდეს ამის საშუალებას. დედაც და მამაც არის უსაზღვრო რესურსი ბავშვის განვითარების და რომელიმეს დეფიციტი არსებით დესტრუქციულ ცვლილებებს იწვევს ფსიქო-ემოციურ განვითარებაში.

„არავინ არ მინდა, მამიკოს ჩავეხუტო,“ - ეს მოსმენილიც მაქვს. ჩახუტება არის დაცულობა, უსაფრთხოება. კარენ ჰორნი პირდაპირ გვეუბნება, რომ ამ ასაკში თუ არ არის დაცულობისა და უსაფრთხოების განცდა, ყალიბდება ცხოვრებისადმი ბაზალური შიშები, რაც თავის მხრივ ნევროტული პიროვნების ფორმირებას უწყობს ხელს. უმამოდ გაზრდილ გოგონებს აქვთ საოცარი მიჯაჭვულობის მოთხოვნილება საწინააღმდეგო სქესთან. მან შეიძლება ოჯახი, მიუხედავად იმისა, რომ ის, ძალიან დესტრუქციული ოჯახი იყოს, სწორედ ამიტომ არ დაანგრიოს, რომ გვერდით კაცი უდგას და ამით ივსებს იმ დეფიციტს, რომელიც მას ჰქონდა ბავშვობაში,“- მოცემულ საკითხზზე ნანა გოგიჩაშვილმა საპატრიარქოს ტელევიზიის გადაცემაში „ერთსულოვნების დილა“ ისაუბრა.

წყარო: ​„ერთსულოვნების დილა“

შეიძლება დაინტერესდეთ

„ძალიან დიდი მნიშვნელობა აქვს ღომი როგორ არის მომზადებული, მას აქვს თავისი მომზადების ტექნიკა,“ - ენდოკრინოლოგი ლაშა უჩავა

„ძალიან დიდი მნიშვნელობა აქვს ღომი როგორ არის მომზადებული, მას აქვს თავისი მომზადების ტექნიკა,“ - ენდოკრინოლოგი ლაშა უჩავა

ენდოკრინოლოგმა ლაშა უჩავამ ღომის სწორად მომზადების მნიშვნელობაზე ისაუბრა, რათა ის უფრო მარტივად მოსანელებელი იყოს:

„გააჩნია, ღომი როგორ არის მომზადებული. ამას აქვს ძალიან დიდი მნიშვნელობა. ღომს აქვს თავისი მომზადების ტექნიკა. ღომს უნდა დიდი ხანი ხარშვა, შემდეგ ე.წ. ჩაზელვა, რომელიც კარგა ხანს უნდა გრძელდებოდეს იმისთვის, რომ ფაფისებური მასა გახდეს. ეს ყოველივე განსაზღვრავს იმას, რომ ის მარტივად მოსანელებელია.“

ლაშა უჩავას თქმით, ღომი მარტივად მოსანელებელი არის იმ მხრივ, რომ მისი მიღების შემდეგ მალევე გვშივდება:

​ღომი მარტივად მოსანელებელია იმ კუთხით, რომ მალევე გვშივდება. ჩვენი ორგანიზმისთვის ღომი მარტივად მოსანელებელი არ არის, იმიტომ, რომ ის შეიცავს დიდი რაოდენობით ნახშირწყლებს. ეს გარკვეულწილად ნივთიერებათა ცვლაზე მოქმედებს. აქ ზომიერებას აქვს გადამწყვეტი მნიშვნელობა.“

„რადიკალური გადაწყვეტილება და მკვეთრი შეზღუდვა არ შეიძლება, იმიტომ, რომ დეპრესიულობისკენ წავალთ. ულუფები უნდა შევამციროთ. ვეცადოთ, გადავიდეთ უფრო მსუბუქ საკვებზე. ეს არის რძის ნაწარმი, მოხარშული ხორცი და ბოსტნეული. უკვე გებჟალიის დროც მოვიდა. დღესასწაული კი არა, იანვარი თვესასწაულად გვაქვს ქცეული,“ - აღნიშნულ საკითხზე ლაშა უჩავამ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

წაიკითხეთ სრულად