Baby Bag

„შვილებთან აუცილებლად უნდა წამოიწიოს მამის ავტორიტეტი,“ - ფსიქოლოგი ნანა გოგიჩაშვილი ბავშვის აღზრდაში მამის როლის შესახებ

ფსიქოლოგმა ნანა გოგიჩაშვილმა ბავშვის აღზრდაში მამის მნიშვნელოვანი როლის შესახებ ისაუბრა:

„ძალიან დაბეჯითებით გეუბნებით, რომ ბავშვი არამარტო ხედავს, არამედ გრძნობს ოჯახში კეთილსაიმედო განწყობებია თუ პირიქით, ემოციურად დამუხტული სიტუაციაა. ამის იდენტიფიცირება შეიძლება როგორც ნახატებით, ასევე საუბრებით. ამის უამრავი ტექნიკა არსებობს. მაგალითად, ეტყვით: „მე და მამა...“ წინადადება მან უნდა დაამთავროს. „ერთხელ მამიკომ...“ მან უნდა დაამთავროს. ზღვა ინფორმაცია მოდის ისეთი, რომელზეც მშობელს წარმოდგენაც კი არ აქვს. შესაბამისად, მამის როლი უკიდურესად მნიშვნელოვანია. მამა არის არამხოლოდ ბიოლოგიური სქესის წარმომადგენელი ოჯახში, არამედ მზრუნველი, მფარველი. მამა აყალიბებს გარკვეულწილად წესებს ოჯახში. ფროიდი ამბობს, რომ მამის ხატს ქმნის დედა. ის კი არა: „მამაშენს ვინ ეკითხება, მე ვარ აქ მთავარი.“ შეიძლება სუბიექტურად ფიქრობდე ამას, მაგრამ შვილებთან აუცილებლად უნდა წამოიწიოს მამის ავტორიტეტი: „მამიკო გავახაროთ,“ „მამიკოს ვუთხრათ,“ „მამიკო მოგვეხმარება,“ „ მამიკოს არ ეწყინოს.“ აქ პოზიტიურ ჭრილში შემოდის მამის ხატი. რა თქმა უნდა, მამაც უნდა გვაძლევდეს ამის საშუალებას. დედაც და მამაც არის უსაზღვრო რესურსი ბავშვის განვითარების და რომელიმეს დეფიციტი არსებით დესტრუქციულ ცვლილებებს იწვევს ფსიქო-ემოციურ განვითარებაში.

„არავინ არ მინდა, მამიკოს ჩავეხუტო,“ - ეს მოსმენილიც მაქვს. ჩახუტება არის დაცულობა, უსაფრთხოება. კარენ ჰორნი პირდაპირ გვეუბნება, რომ ამ ასაკში თუ არ არის დაცულობისა და უსაფრთხოების განცდა, ყალიბდება ცხოვრებისადმი ბაზალური შიშები, რაც თავის მხრივ ნევროტული პიროვნების ფორმირებას უწყობს ხელს. უმამოდ გაზრდილ გოგონებს აქვთ საოცარი მიჯაჭვულობის მოთხოვნილება საწინააღმდეგო სქესთან. მან შეიძლება ოჯახი, მიუხედავად იმისა, რომ ის, ძალიან დესტრუქციული ოჯახი იყოს, სწორედ ამიტომ არ დაანგრიოს, რომ გვერდით კაცი უდგას და ამით ივსებს იმ დეფიციტს, რომელიც მას ჰქონდა ბავშვობაში,“- მოცემულ საკითხზზე ნანა გოგიჩაშვილმა საპატრიარქოს ტელევიზიის გადაცემაში „ერთსულოვნების დილა“ ისაუბრა.

წყარო: ​„ერთსულოვნების დილა“

შეიძლება დაინტერესდეთ

„მე აცრილი ვარ და ნუ გეშინია, ეს არის ძალიან არასერიოზული, არაკორექტული გამოთქმა, რომელსაც ხშირად ვისმენ ხოლმე,“ - პროფესორი ვერიკო ბაზიარი

„მე აცრილი ვარ და ნუ გეშინია, ეს არის ძალიან არასერიოზული, არაკორექტული გამოთქმა, რომელსაც ხშირად ვისმენ ხოლმე,“ - პროფესორი ვერიკო ბაზიარი

მეან-გინეკოლოგმა ვერიკო ბაზიარმა ორსულებში ვაქცინაციის ჩატარების მნიშვნელობასა და წესებზე ისაუბრა:

„გაჩნდა რეკომენდაცია „აცრები ნებისმიერ ტრიმესტრში.“ მას შემდეგ რაც დელტა შტამმა ამდენი ორსულის სიცოცხლე შეიწირა, ულაპარაკოდ გაჩნდა ეს რეკომენდაცია. თითქმის ყველა ვაქცინამ ჩააბარა ის გამოცდა, რომ გაკეთების მომენტში არანაირი გვერდითი მოვლენა არ ხდება, თუმცა ეს არ ნიშნავს იმას, რომ არ იქნებოდა ანაფილაქსიური შოკის შემთხვევები. გარდაცვალების შემთხვევებიც აუცილებლად იქნებოდა დაფიქსირებული. მე მიყვარს, როდესაც მეუბნებიან სიმართლეს.“

ვერიკო ბაზიარის თქმით, მედიცინაში დასკვნების გაკეთებას დრო და გამოცდილება სჭირდება:

„მედიცინაში მარტივი არ არის იმის თქმა, რომ ან კარგია, ან ცუდია. უბრალოდ ადამიანი არ უნდა მოატყუო. ​მე ამის მომხრე ვარ. მიაწოდეთ ადამიანს ინფორმაცია, რომ მან გააკეთოს ინფორმირებული არჩევანი. ეს არის ყველაზე კულტურული ურთიერთობა ადამიანთან. მომეცი ინფორმაცია და დამიტოვე არჩევანის უფლება მე. მე აცრილი ვარ და ნუ გეშინია, ეს არის ძალიან არასერიოზული, არაკორექტული გამოთქმა, რომელსაც მე ხშირად ვისმენ ხოლმე.“

„რაც შეეხება ორსულებს, მათი მეუღლეები ზედმიწევნით უნდა უფრთხილდებოდნენ თავიანთ თავს. ასეთ შემთხვევაში მე ვირჩევდი, რომ ქალბატონი აცრილიყო პირველი ტრიმესტრის შემდეგ. თუმცა არის რეკომენდაცია, რომ კი ბატონო, გაიკეთეთ პირველ ტრიმესტრში. ამაზე მონაცემები არ გვაქვს. ეს მონაცემი გაჩნდება მას შემდეგ, რაც პირველი აცრილი ორსული გააჩენს შვილს და თუნდაც პირველი სამი წლის კოგნიტურ და ფიზიოლოგიურ განვითარებას ვნახავთ. მაშინ შემიძლია ვთქვა, რომ ეს ნამდვილად ასეა. დღეს თავს შევიკავებ ვთქვა, რომ ნამდვილად ასეა, ნამდვილად ისეა. სასურველი ორსული ან ზედმიწევნით იცავდეს რეკომენდაციას, ან მეორე ტრიმესტრიდან აიცრას ნებადართული ვაქცინებით,“ - აღნიშნულ საკითხზე ვერიკო ბაზიარმა საპატრიარქოს ტელევიზიის გადაცემაში „ზღვარი მარინა კაჭარავასთან ერთად“ ისაუბრა.

წყარო: ​გადაცემაში „ზღვარი მარინა კაჭარავასთან ერთად“

წაიკითხეთ სრულად