Baby Bag

ბავშვებში ბრაზის მართვის 8 ეფექტიანი მეთოდი

ბავშვებში ბრაზის მართვის 8 ეფექტიანი მეთოდი

მშობლებს ძალიან აფრთხობთ ბავშვებში აგრესიული ქცევის გამოვლინებები: ყვირილი, ფიზიკური ძალადობისკენ მიდრეკილება და უხეშობა. ზოგიერთი ბავშვი ძალიან მარტივად ღიზიანდება და აგრესიისკენ აშკარა მიდრეკილებას ავლენს. ჩვენს სტატიაში ბავშვებში ბრაზის მართვისთვის საჭირო რეკომენდაციებს გაგაცნობთ, რომელიც თქვენი შვილის აგრესიულ ქცევებს მნიშვნელოვნად შეამცირებს.

  • 1.ბავშვს ემოციებზე ხშირად ესაუბრეთ

ბავშვს, პირველ რიგში, გრძნობებისა და ემოციების შესახებ უნდა მიაწოდოთ ინფორმაცია. ბავშვების ბრაზის გამომწვევი მიზეზი ხშირად საკუთარი გრძნობების და განცდების ამოცნობის უუნარობაა. შესაძლოა, ბავშვის ბრაზი თქვენი ყურადღების მიქცევის სტრატეგია იყოს. თუ ბავშვს თავის ემოციებზე ხშირად გაესაუბრებით, ის მათ სახელდებას და ამოცნობას უკეთ შეძლებს.

  • 2.ბავშვს დამშვიდების შესაძლებლობა მიეცით

გაღიზიანებულ ბავშვთან ურთიერთობისას შესვენების აღება ძალიან მნიშვნელოვანია. როდესაც ბავშვი ბრაზობს, მასთან საუბარი პრობლემას კიდევ უფრო ამწვავებს. მოერიდეთ ბავშვთან კამათს და მის დამოძღვრას, როდესაც თქვენი შვილი გაღიზიანებულია. ვიდრე პრობლემის მოგვარებას გადაწყვეტთ, ბავშვს დამშვიდების შესაძლებლობა მიეცით. ბრაზი ბავშვს აშინებს. თუ ატყობთ, რომ ბავშვს ეშინია, მასთან იყავით და თანადგომა გამოუცხადეთ.

  • 3.ბავშვთან გადაჭარბებულ საუბარს მოერიდეთ

ბავშვთან საუბრის დაწყებამდე, დაელოდეთ, რომ ის დამშვიდდეს. გაბრაზებულ ბავშვს ინფორმაციის გადამუშავება ძალიან უჭირს. ბავშვთან საუბრისას მშვიდი ტონი შეინარჩუნეთ და რაც შეიძლება ცოტა ისაუბრეთ. გამოიყენეთ მოკლე წინადადებები და ერთი და იგივე ფრაზა ხშირად გაიმეორეთ. გამეორება ბავშვს თქვენი ნათქვამის უკეთ გაგებაში დაეხმარება.

  • 4.შეიმუშავეთ ბავშვის დამშვიდების გეგმა

ბავშვს ასწავლეთ, როგორი რეაქცია უნდა ჰქონდეს, როდესაც რამეზე ბრაზობს ან ფრუსტრაციას განიცდის. ბრაზის პოზიტიური განცდებით ჩანაცვლება ბავშვს დამშვიდებაში დაეხმარება. შესაძლოა, ბავშვს სპეციალური დასამშვიდებელი კუთხე ან ოთახი მოუწყოთ. ბავშვი გააფრთხილეთ, რომ მას აღნიშნულ კუთხეში თავის დამშვიდება შეუძლია, როდესაც გრძნობს, რომ ბრაზდება. ბავშვის დამშვიდებისთვის იდეალურია საყვარელი თოჯინით თამაში, მისთვის მოსაწონი წიგნის დათვალიერება.

  • 5.გამოიყენეთ რელაქსაციის სპეციალური ტექნიკები

გონების განტვირთვა ბრაზისგან გათავისუფლებისთვის იდეალური საშუალებაა. ბრაზის მენეჯმენტისთვის სპეციალური ტექნიკების შესწავლა ძალიან ეფექტიანია. ბავშვს რელაქსაციისთვის სპეციალური ფრაზების, სიტყვების სწავლება შეგიძლიათ, რომლებიც მას ყურადღებას გადაატანინებს. მცირეწლოვან ბავშვებს განსაკუთრებით ამშვიდებს საყვარელი მუსიკის მოსმენა ან საინტერესო წიგნის დათვალიერება. შედარებით უფროსი ასაკის ბავშვებისთვის კი კარგია მედიტაცია, სუნთქვითი ვარჯიშები და სეირნობა.

  • 6. არ მისცეთ ბავშვს საშუალება, რომ ტანტრუმით საწადელს მიაღწიოს

ბავშვები მარტივად აცნობიერებენ, რომ ტანტრუმის წყალობით მშობლების ყურადღების მიქცევას ახერხებენ. თუ ბავშვი ამას შეამჩნევს, ტანტრუმი მისი ცხოვრების განუყოფელი ნაწილი გახდება. ბავშვს ასწავლეთ, რომ ის აგრესიით ვერასდროს მიიღებს იმას, რაც სურს.

  • 7.ისწავლეთ ემპათიის გამოხატვა

თუ ბავშვი გაბრაზებულია, დაეხმარეთ მას, რომ სიბრაზის მიზეზებზე ღიად ისაუბროს. გაამხნევეთ თქვენი შვილი. თუ ბავშვი იგრძნობს, რომ თქვენთვის მისი განცდები მნიშვნელოვანია, ეს მას ძალიან დაეხმარება. ბავშვები ძალიან ბრაზობენ, როდესაც ხედავენ, რომ მათი გრძნობები მნიშვნელოვანი არ არის გარშემომყოფთათვის.

  • 8.შეაქეთ ბავშვი კარგი ქცევისთვის

ბავშვებს ყურადღება ძალიან სჭირდებათ. თქვენი შვილის კარგი ქცევა ყოველთვის უნდა შეამჩნიოთ და აღიაროთ კიდეც. თუ ბავშვს კარგი ქცევისთვის ხშირად შეაქებთ, ის ეცდება, რომ მსგავსი ქცევა ხშირად გაიმეოროს. მთავარია, რომ ქებაში არ გადააჭარბოთ, რადგან ეს ბავშვს კრიტიკასდმი ზედმეტად მგრძნობიარეს გახდის და მას შენიშვნის მიღება გაუჭირდება. შექება აუცილებლად დააბალანსეთ შენიშვნით, როდესაც ბავშვი ცუდად იქცევა.

მომზადებულია ​moms.com - ის მიხედვით

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

როგორ ვმართოთ ბრაზი, როდესაც ბავშვის ქცევა არ მოგვწონს? - თამარ გაგოშიძის რჩევები მშობლებს
​ნეიროფსიქოლოგმა თამარ გაგოშიძემ მშობლებს ბრაზის მართვასთან დაკავშირებით საინტერესო რჩევები მისცა და ბავშვთან ურთიერთობის სხვადასხვა სტრატეგია შესთავაზა:„ჩვეულებრივი სიტუაცია ავიღოთ: პატარა ბავშვი წუწ...

შეიძლება დაინტერესდეთ

„მინდა გესაუბროთ ერთი ძალიან გავრცელებული ფენომენის შესახებ, რომელიც შეიძლება ახლაც გაწუხებთ,“- გიორგი ღოღობერიძე

„მინდა გესაუბროთ ერთი ძალიან გავრცელებული ფენომენის შესახებ, რომელიც შეიძლება ახლაც გაწუხებთ,“- გიორგი ღოღობერიძე

ექიმმა გიორგი ღოღობერიძემ მოსახლეობაში გავრცელებული ფენომენის, კუნთების კრთომის შესახებ ისაუბრა და მისი გამომწვევი მიზეზები დაასახელა:

„მინდა გესაუბროთ ერთი ძალიან გავრცელებული ფენომენის შესახებ, რომელიც თქვენ შეიძლება გაწუხებდათ ოდესმე ან შეიძლება ახლაც გაწუხებთ. ეს არის კუნთების კრთომა. ალბათ, გამოგიცდია, როდესაც ფეხზე კუნთები თავისით შეიკუმშება. ამ კუნთების კრთომას გააჩნია როგორც სერიოზული გამომწვევი ფაქტორები, ასევე მარტივი მიზეზებიც. გეტყვი როგორ მოაგვარო ეს პრობლემა.“

გიორგი ღოღობერიძის თქმით, ფასციკულაცია მოსახლეობის 70%-ს აქვს:

„კუნთების უნებლიე კრთომას ფასციკულაცია ჰქვია. ეს აღენიშნება მოსახლეობის დაახლოებით 70%-ს. ფასციკულაციის მიზეზი შეიძლება იყოს ასაკი, სტრესი. სტრესში მიდრეკილება მეტია. ფიზიკური აქტივობის მერე ყველაზე ტიპურია კუნთების კრთომა. მეოთხე მიზეზია ბევრი კოფეინის მიღება, ასევე ენერგეტიკული სასმელების, ბრონქული ასთმის საწინააღმდეგო წამლების მიღება. ფასციკულაციების მიზეზი შეიძლება იყოს შფოთვა, ალკოჰოლი. შფოთვის დროს მომატებულია ნერვული სისტემის აღგზნებადობა.“

„თუ ასაკოვანი არ ხარ, ალკოჰოლს, კოფეინს არ მოიხმარ, სტრესში არ ხარ და კუნთების უნებლიე კრთომა მაინც გაწუხებს, მაშინ უნდა მოიქცე შემდეგნაირად: პირველ რიგში უნდა გამოირიცხოს ფარისებრი ჯირკვლის დაავადება. ფასციკულაციები ძალიან ხშირია იმ ადამიანებში, ვინც ალერგიის საწინააღმდეგო მედიკამენტებს სვამს. მე მინდა, რომ გითხრა მთავარი მიზეზი ფასციკულაციებისა. წამყვანი მიზეზი არის მაგნიუმის ნაკლებობა, როდესაც ფასციკულაციები ვითარდება. როდესაც ვიღაცას მაგნიუმი აკლდება, შეიძლება მას ჰქონდეს კუნთების უნებლიე შეკუმშვები, შესაძლოა იყოს ტრემორი, მიდრეკილება არითმიებისკენ. თუ შენ გაწუხებს ფასციკულაციები, დროებით თავი დაანებე კოფეინის მიღებას, ალკოჰოლის მიღებას, კარგად გამოიძინე. თუ ფასციკულაციები მაინც გრჩება, შეივსე მაგნიუმის რაოდენობა. სჯობს მაგნიუმი საკვებიდან მიიღო. ის ბევრია ავოკადოში, ბანანში, თხილში, ნუშის, გოგრის თესლში, მწვანე საკვებში. ჩვეულებრივი ბანალური ფასციკულაციები თითქმის ყველას გვაქვს. შეუძლებელია, ამ ვიდეოს უყურებდე და მსგავსი რამ ერთხელ მაინც არ გქონდეს გამოცდილი. თუ ფასციკულაციები ყველა მცდელობის შემდეგ მაინც რჩება, უნდა გაიკეთო ელექტრომიოგრაფია ნევროლოგთან კონსულტაციის შემდეგ, რომ დაადგინო ფასციკულაცია არის კეთილთვისებიანი თუ მის უკან დგას რაიმე სერიოზული დაავადება. შესაძლოა, ფასციკულაცია გამოწვეული იყოს გაფანტული სკლეროზით, სპინალური ატროფიებით და ა.შ. ფასციკულაციები შემთხვევათა 70%-ზე მეტში კეთილთვისებიანია,“- აღნიშნა გიორგი ღოღობერიძემ.

წყარო: ​Usmle მოსამზადებელი ცენტრი 

წაიკითხეთ სრულად