Baby Bag

„კოვიდის გადატანიდან ექვსი თვის განმავლობაში შეიძლება ბავშვს ჰქონდეს სუბფებრილური ტემპერატურა,“ - პედიატრი ინგა მამუჩიშვილი

„კოვიდის გადატანიდან ექვსი თვის განმავლობაში შეიძლება ბავშვს ჰქონდეს სუბფებრილური ტემპერატურა,“ - პედიატრი ინგა მამუჩიშვილი

პედიატრმა ინგა მამუჩიშვილმა ომიკრონით ინფიცირებულ ბავშვებში ღებინებისა და კუჭ-ნაწლავის გახშირებული მოქმედების სიმპტომის ხშირი გამოვლენის შესახებ ისაუბრა:

„ეს სიმპტომი ძალიან ხშირია და ხშირად ვირუსული ინფექცია ამ სიმპტომით იწყება. ბავშვს ეწყება ღებინება, გახშირებული ნაწლავთა მოქმედება, თავბრუსხვევა. ჯერ ტემპერატურა არ არის. ამიტომ მშობლები მიზეზად თვლიან წინა ან იმავე დღეს მიღებულ საკვებს. გვეუბნებიან, რომ არის კვებითი ინტოქსიკაცია. თუმცა, მეორე დღეს ან რამოდენიმე საათში, შესაძლოა, დაემთხვეს ტემპერატურაც. ეს არის ამ ვირუსული ინფექციის ერთ-ერთი სიმპტომი. ეს სიმპტომი რით არის მნიშვნელოვანი? თუ ბავშვს შეუპოვარი ღებინება აქვს, თუ ბავშვი სითხეს არ იღებს, ის აუცილებლად გადაყვანილი უნდა იყოს კლინიკაში. მთავარია, ბავშვმა არ დაკარგოს ის ძირითადი მიკროელემენტები, რომელიც აუცილებელია მისი ნორმალური ფუნქციონირებისთვის. თუ ბავშვს აქვს ღებინება, მაგრამ სითხეებს იღებს, მცირე ულუფებით საკვებს იღებს, ეს ისეთივე სიმპტომია და ისევე გაივლის, როგორც ტემპერატურული რეაქცია, ხველა და ა.შ.“

„მინდა კიდევ ერთხელ გავუსვა ხაზი, რომ ომიკრონი არ არის გრიპი და გრიპიც არ არის ომიკრონი. ხშირ შემთხვევაში ომიკრონი მიმდინარეობს გრიპის კლინიკური ნიშნების მსგავსად. ძალიან რთულია განასხვავო, ეს არის ომიკრონი თუ გრიპის ვირუსი, თუ არ არის ტესტირება ჩატარებული. ბავშვთა ასაკში გრიპის მიმდინარეობა არც ისე მარტივია. ომიკრონის შემთხვევაში ჩვენ არ ვიცით რა განვითარდება, იქნება თუ არა პოსტკოვიდური სინდრომი. კოვიდის დასრულების შემდეგ გარკვეული სიმპტომები ნარჩუნდება. სუბფებრილური ტემპერატურა შეიძლება ძალიან ხანგრძლივად შენარჩუნდეს და კოვიდის გადატანიდან ექვსი თვის განმავლობაშიც შეიძლება ჰქონდეს ბავშვს. შეიძლება იყოს წამოხველება, თავბრუსხვევა,“- აღნიშნულ საკითხზე ინგა მამუჩიშვილმა რადიო „ფორტუნას“ ეთერში ისაუბრა.

წყარო: ​რადიო „ფორტუნა“

შეიძლება დაინტერესდეთ

„ომიკრონით ინფიცირებისგან კატეგორიულად ვერ გვიცავს ვერც ფაიზერი და ვერც ნებისმიერი სხვა ვაქცინა,“ - ივანე ჩხაიძე

„ომიკრონით ინფიცირებისგან კატეგორიულად ვერ გვიცავს ვერც ფაიზერი და ვერც ნებისმიერი სხვა ვაქცინა,“ - ივანე ჩხაიძე

იმუნიზაციის მრჩეველთა ეროვნული ტექნიკური ჯგუფის ხელმძღვანელმა, იაშვილის საავადმყოფოს სამედიცინო დირექტორმა, პროფესორმა ივანე ჩხაიძემ „მედიაცენტრ მთავარში“ ომიკრონის შტამის წინააღმდეგ ვაქცინების ეფექტიანობაზე ისაუბრა:

„როდესაც ვლაპარაკობთ ვაქცინების არაეფექტიანობაზე, ვაქცინების ეფექტიანობის შეფასების ორი ძირითადი კრიტერიუმი არსებობს: გვიცავს თუ არა ინფიცირებისგან და გვიცავს თუ არა დაავადების მძიმე მიმდინარეობისგან. ომიკრონთან დაკავშირებით, შესაძლებელია უკვე დარწმუნებით ითქვას, რომ ვაქცინა ვერ გვიცავს ინფიცირებისგან. ფაიზერის ორი დოზის გაკეთების შემდეგ ინფიცირებისგან დაცვა 33%-ია ნაცვლად 95%-ისა, რაც ჰქონდა ფაიზერის ვაქცინას ჩინური, ვუჰანის ვირუსის შემთხვევაში.“

ივანე ჩხაიძის თქმით, ფაიზერის ვაქცინა ვაქცინირებული ადამიანების მძიმე დაავადებისგან დაცვას კვლავ აგრძელებს:

„ფაიზერის ვაქცინის ორი დოზა აგრძელებს ვაქცინირებული ადამიანების დაცვას მძიმე შემთხვევების განვითარებისგან. ინფიცირებისგან კატეგორიულად ვერ გვიცავს ვერც ფაიზერი და ვერც ნებისმიერი სხვა ვაქცინა. ფაიზერის 33% არის დღემდე არსებულ ვაქცინებს შორის ყველაზე მაღალი პროცენტი. სხვა ვაქცინებს ეს მაჩვენებელიც არ აქვს.“

„როდესაც ვლაპარაკობთ, რომ ვაქცინები ვერ გვიცავს, საუბარია პირველ რიგში, ინფიცირებისგან თავის დაცვაზე და არა მძიმე მიმდინარეობისა და საავადმყოფოებში მოხვედრისგან დაცვაზე,“ - აღნიშნა ივანე ჩხაიძემ.

წყარო:​ „მედიაცენტრი მთავარი“

წაიკითხეთ სრულად