Baby Bag

„მნიშვნელოვანია, რომ პოლიცისტური საკვერცხის სინდრომის დიაგნოსტირება მოზარდობის ასაკში მოხდეს, რათა ავირიდოთ შორეული გართულებები,“- მეან-გინეკოლოგი მადლენა ხვიჩია

მეან-გინეკოლოგმა მადლენა ხვიჩიამ პოლიცისტური საკვერცხის სინდრომისთვის დამახასიათებელი ნიშნები დაასახელა:

„პოლიცისტური საკვერცხის სინდრომის სიხშირე 5-დან 25%-მდეა. ეს ყველაფერი მოზარდობის ასაკიდან იღებს დასაბამს. მნიშვნელოვანია, რომ სწორედ ამ ასაკში მოხდეს მისი დიაგნოსტირება, რათა ავირიდოთ ის გართულებები შორეული, რაც ახასიათებს პოლიცისტური საკვერცხის სინდრომს.

კლინიკური პრაქტიკიდან გამომდინარე შემიძლია გითხრათ, რომ საქართველოში საკმაოდ ხშირია ამ პრობლემით მომართვიანობა. პირველი ნიშანი, რითაც ხშირად მოგვმართავენ, არის არარეგულარული მენსტრუალური ციკლი, არის მენსტრუათაშორისი ინტერვალის გახანგრძლივება 38 და მეტი დღის ინტერვალით. ასეთ პაციენტებს ასევე აღენიშნებათ ჭარბი სისხლიანი გამონადენი, მენსტრუალური დღეების გახანგრძლივება. მოზარდების შემთხვევაში ვსაუბრობთ 7 დღე და მეტი, ხოლო რეპროდუქციული ასაკის ქალბატონებში 8 დღე და მეტი შეიძლება იყოს.

მნიშვნელოვანი ნიშანია ანდროგენების სიჭარბით გამოწვეული აკნე, ჭარბთმიანობა, უხეში, გრძელი, შავი თმების არსებობა სხეულის იმ ნაწილზე, სადაც ქალბატონებისთვის არ არის დამახასიათებელი, სახეზე, სარძევე ჯირკვლების დვრილების გარშემო და მუცლის წინა ხაზზე. ასევე არის საკვერცხის სტრუქტურული ცვლილებები, ხდება კაფსულის გასქელება, მასში მრავლდება სითხური ჩანართები, რის გამოც მას ეძახდნენ პოლიცისტურ საკვერცხეს. საკვერცხის მოცულობა გაზრდილია. უნდა აღინიშნოს ჭარბი წონა, რომელიც პოლიცისტური საკვერცხის შემთხვევაში მოზარდების დაახლოებით 50%-ში აღინიშნება.

მოზარდობის პერიოდი გოგონებისთვის ძალიან მგრძნობიარეა. ეს კლინიკური ნიშნები: ჭარბთმიანობა, ჭარბი წონა, აკნე, ემოციური თვალსაზრისით მათთვის დამთრგუნველია და შეიძლება თვითშეფასება დაბლა დაწიოს. მომავალში ეს სერიოზულ ფსიქოლოგიურ პრობლემებთან, დეპრესიასთან არის დაკავშირებული,“- მოცემულ საკითხზე მადლენა ხვიჩიამ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“ 

შეიძლება დაინტერესდეთ

„მე შევეშვი ამ ბრენდებს, სახლში გაკეთებული საცხი მომწონს, კანის გამოკვებაში ძალიან მეხმარება,“ - მეცო-სოპრანო ნინო სურგულაძე თავის მოვლის წესების შესახებ

„მე შევეშვი ამ ბრენდებს, სახლში გაკეთებული საცხი მომწონს, კანის გამოკვებაში ძალიან მეხმარება,“ - მეცო-სოპრანო ნინო სურგულაძე თავის მოვლის წესების შესახებ

ქართველმა მეცო-სოპრანომ ნინო სურგულაძემ თავის მოვლის წესების შესახებ ისაუბრა, რომელსაც თავად იყენებს:

„რა თქმა უნდა, გენეტიკას მნიშვნელობა აქვს და თუ ამას კიდევ ხელს შევუწყობთ, გადასარევი იქნება. მე მყავს ძალიან კარგი მეგობარი, რომელიც სახლის პირობებში ამზადებს სახის მოვლის საშუალებას. მე შევეშვი ამ ბრენდებს. კი კარგია, მაგრამ მაინც ზედაპირულია ყველაფერი. სახლში გაკეთებული საცხი მომწონს. ჩემი კანის გამოკვებაში ძალიან მეხმარება. ალერგიებია ბევრი, ამიტომაც ვცდილობ, რომ მაქსიმალურად ბუნებრივისკენ ვიყო.“

ნინო სურგულაძის თქმით, მას ძალიან მოსწონს ალოეს გამოყენება ნიღბის ფორმით:

„მე ძალიან მომწონს ალოე ნიღბის ფორმით. მე ძალიან მეხმარება.ბებიაჩემს ჰქონდა არაჩვეულებრივი კანი. ყოველთვის მახსოვს, რომ სადილის კეთებისას კიტრის ნათალს იწყობდა სახეზე. მეც დავიდებდი ხოლმე. მართლა საოცარი კანი ჰქონდა. ჩვენ გარშემო მილიონი ბუნებრივი საშუალებაა, რომელიც შეგვიძლია გამოვიყენოთ. შეგვიძლია კვერცხის გული გამოვიყენოთ თმისთვის. კარტოფილი კარგია, როდესაც ჩაშავებული გაქვს თვალი, მიცდია და მართლა მოქმედებს. ძალიან მნიშვნელოვანია, რაც შეიძლება ბევრი წყალი.“

„არის მომენტი, როდესაც ქალი ოჯახს ქმნის ჩამოშლა და მოდუნება ხდება. არავითარ შემთხვევაში! პირიქით, ამ დროს უნდა იცოდე, რომ შეუძახო შენს თავს. კიდევ უფრო ლამაზად, უფრო მობილიზებულად უნდა გამოიყურებოდე, უფრო საქმიანი და ენერგიული უნდა იყო,“ - განაცხადა ნინო სურგულაძემ.

წყარო: ​„დილის შოუ“

წაიკითხეთ სრულად