Baby Bag

,,ე.წ „განტვირთვის“ დღეებში ჩვენი ორგანიზმი ისვენებს ზედმეტი კალორაჟის და მავნე საკვების მონელებისგან'' - რა საკვების მიღება შეიძლება ასეთ დროს?

,,ე.წ „განტვირთვის“ დღეებში ჩვენი ორგანიზმი ისვენებს ზედმეტი კალორაჟის და მავნე საკვების მონელებისგან'' - რა საკვების მიღება შეიძლება ასეთ დროს?

მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგი თინათინ კაჭარავა ე.წ „განტვირთვის დღის“ შესახებ მოგაწვდით კომპეტენტურ ინფორმაციას. რას გულისხმობს ე.წ „განტვირთვის დღე“, რომელი პროდუქტებია დაშვებული ასეთ დროს, რა სიხშირით არის უსაფრთხო „განტვირთვის“ დღის გაკეთება და ვისთვის არის აკრძალული? - სწორედ ამ საკითხებს შეიტყობთ დღევანდელი სტატიიდან.

დავიწყოთ იქიდან, რომ დღევანდელი ცხოვრების რიტმიდან გამომდინარე, მოსახლოების დიდი ნაწილი ხშირად მიმართავს ე.წ სწრაფი კვების ობიექტებს, სადაც მოგეხსენებათ, საკვები არის მაღალკალორიული, ცხიმიანი, ძნელად მოსანელებელი, შედეგად ჩვენი კუჭნაწლავის სისტემა მუდმივად განიცდის დისკომფორტს. ასეთი საკვების მიღება გარდა გადამუშავების დროს გამოწვეული დისკომფორტისა, ჯერ ჭარბი წონის და შემდეგ უკვე დაავადება სიმსუქნის ჩამოყალიბების წინაპირობაა. აქედან გამომდინარე, ე.წ „განტვირთვის“ დღეებში ჩვენი ორგანიზმი ისვენებს ზედმეტი კალორაჟის და მავნე საკვების მონელებისგან, გადატვირთული საჭმლის მომნელებელი სისტემა მშვიდდება. „განტვირთვის“ დღეები ასევე ეფექტურია დიეტაზე მყოფი ადამიანისთვის, განსაკუთებით მაშინ, როცა დგება ე.წ „პლატოს“ (წონაში კლების შეჩერება) ეფექტი.

ახლა კი განვიხილოთ კონკრეტულად რას გულისხმობს „განტვირთვის“ დღე? - ასეთ დროს ადამიანი იღებს ერთი ან ორი სახის პროდუქტს მთელი დღის განმავლობაში. მონოდიეტით ანუ ერთი სახის პროდუქტით „განტვირთვის“ დღის დაცვა უფრო რთულია, ორგანიზმისთვის უფრო მოსახერხებელი და შედარებით იოლად გასაკეთებელია მთელი დღის განმავლობაში ორი სხვადასხვა სახის პროდუქტის მიღება, რომელიც საკმაო ეფექტურობითაც ხასიათდება. 

მთელი დღის განმავლობაში შესაძლებელია მივიღოთ: 500 მლ კეფირი ან მაწონი, დამატებული 500-700 გრამი ხილის ნაზავი (ვაშლი, ქლიავი, კივი) ან იგივე ოდენობის კიტრი. შესაძლებელია, მივიღოთ მხოლოდ რძის ნაწარმი: დაბალპროცენტიანი ხაჭო დაახლოებით 200-300 გრამი, მაწონი ან კეფირი 500 მლ. კიდევ ერთ-ერთი ვარიანტია: 300-400 გრ. ხორცი და დაახლოებით 1 კგ. კიტრი. ასევე შესაძლებელია ხილის და ბოსტნეულის ნაზავით „განტვირთვის“ დღის გაკეთება და ა.შ. 

ზოგადად, ნებისმიერი პროდუქტისგან შედგენილი „განტვირთვის“ დღე გულისხმობს დღის მანძილზე მისაღები პროდუქტების გადანაწილებას საათობრივად, დღეში 3-4 კვებაზე. ასეთი დღეების დროსაც ძალიან საყურადღებოა წყალმარილოვანი ბალანსის შენარჩუნება ორგანიზმში, რეკომენდებულია ჩვეულებრივ ონკანის წყალთან ერთად დამატებით 1 ლიტრამდე მინერალური წყლის მიღება. დღის მანძილზე ასევე დაშვებულია უშაქრო ყავა და ჩაი. ე.წ „განტვირთვის“ დღის გაკეთება დასაშვებია 7-10 დღეში ერთხელ, მაგრამ ხაზგასმით უნდა აღინიშნოს, რომ აღნიშნული ზოგადი რეკომენდაციები ეხება მხოლოდ პრაქტიკულად ჯანმრთელ ადამიანს და მისი გაკეთება ორგანიზმის ზოგადი მდგომარეობის შემოწმების გარეშე არასასურველია. 

ე.წ „განტვირთვის“ დღე აკრძალულია ნებისმიერი ქრონიკული დაავადების მქონე ადამიანისთვის, ორსული და მეძუძური ქალისთვის, ბავშვთა და მოზარდთა ასაკის თაობისთვის.

გისურვებთ ჯანმრთელობას!

ენდოკრინოლოგი თინათინ კაჭარავა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუ​ფი“)

შეიძლება დაინტერესდეთ

კალციუმის დეფიციტის სიმპტომები და შედეგები

კალციუმის დეფიციტის სიმპტომები და შედეგები

მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგი თინათინ კაჭარავა კალციუმის შესახებ მოგაწვდით კომპეტენტურ ინფორმაციას. რომელი საკვებია კალციუმით მდიდარი, დ ვიტამინის როლი კალციუმის ცვლის პროცესში, კალციუმის დეფიციტის სიმპტომები და შედეგები - სწორედ ამ საკითხებს შეიტყობთ დღევანდელი სტატიიდან.

კალციუმი არის საკვები ნივთიერება, რომელიც ყველა ცოცხალ ორგანიზმს სჭირდება. იგი არის მინერალი, რომელსაც სასიცოცხლო მნიშვნელობა აქვს ძვლების ჯანმრთელობისთვის და ასევე მონაწილეობს ორგანიზმისთვის ბევრ სხვა უმნიშვნელოვანეს პროცესში. 
კალციუმი აუცილებელია ტვინისა და სხეულის სხვა ნაწილებს შორის ჯანსაღი კომუნიკაციის შესანარჩუნებლად - ნერვული იმპულსების გადაცემა. ასევე მნიშვნელოვანია მისი როლი კუნთების მოძრაობაში, გულ-სისხლძარღვთა სისტემის ფუნქციონირებაში, სისხლის შედედების პროცესში. კალციუმის 99% ძვლებსა და კბილებშია მოთავსებული, 1% კი სისხლში ცირკულირებს
კალციუმის ცვლის პროცესზე ორგანიზმში პასუხისმგებელია ფარისბერი და ფარისებრახლო ჯირკვლები. ორგანიზმში კალციუმის რაოდენობის სათანადო დონეზე შესანარჩუნებლად სასურველია ვიკვებოთ კალციუმით მდიდარი საკვებით

ასეთი პროდუქტებია: 
  • რძის პროდუქტები
  • თევზი 
  • ხორცი
  • კვერცხი
  • მწვანე ბოსტნეული
  • თხილეული
  • მარცვლეული
  • ხილი. 

მინდა ხაზი გავუსვათ, რომ თუ ორგანიზმში არის დ ვიტამინის დეფიციტი, რომელიც პასუხისმგებელია ორგანიზმის მიერ კალციუმის ათვისებაზე, საკვებიდან მიღებული კალციუმის შეწოვა შეფერხებულია, ამიტომ მუდმივად ყურადღება უნდა მივაქციოთ და შევინარჩუნოთ დ ვიტამინის და კალციუმის ადეკვატური დონე ორგანიზმში (შემდგომ სტატიაში დ ვიტამინზე მოგაწვდით დეტალურ ინფორმაციას). 
განვიხილოთ, როგორია სიმპტომები კალციუმის დეფიციტის დროს. აქვე დავაფიქსიროთ, რომ თუ კალციუმის მცირედი დეფიციტი გვაქვს, შესაძლებელია, ჩივილი არც გამოვლინდეს. სისხლში კალციუმის გამოხატული დეფიციტის დროს კი ვლინდება ძვალსახსროვანი და ნერვული სისტემის ცვლილებები: ხდება კუნთების უნებლიე მტკივნეული შეკუმშვები, ხშირია კიდურების და სახის არეში დაბუჟების შეგრძნება, შესაძლოა, განვითარდეს კუნთების სპაზმი, მცირდება გულის წუთმოცულობა (გულის კუნთის კუმშვადობა, ასევე აღინიშნება ფსიქო-ემოციური სფეროს ცვლილებები (ემოციურობა, დეპრესიულობა). კალციუმის დეფიციტის ყველაზე გავრცელებული და ძირითადი ჩივილია ფრჩხილების მტვრევადობა, კანის სიმშრალე და თმის ცვენა, კარიესი, ოფლიანობა. კალციუმის დეფიციტის შედეგები ორგანიზმში შემდეგნაირია: ბავშვთა ასაკში - რაქიტი (ძვლების დეფორმაცია), მოზრდილთა ასაკში - ოსტეოპენია, ოსტეოპოროზი 
(ძვლის მინერალური სიმკვრივის დაქვეითება). გისურვებთ ჯანმრთელობას!
ენდოკრინოლოგ-ნუტრიციოლოგი თინათინ კაჭარავა

წაიკითხეთ სრულად