Baby Bag

„ბრონქული ასთმის პირველივე სიმპტომების გამოვლენისთანავე მშობელი უნდა მივიდეს ექიმთან,“ - ალერგოლოგი ბაია ბეზარაშვილი

ალერგოლოგი ბაია ბეზარაშვილი გადაცემაში „დილა ფორმულაზე“ ბრონქული ასთმით დაავადებული ადამიანების მზარდი რიცხვის შესახებ საუბრობს და აღნიშნავს, რომ ყოველწლიურად იზრდება იმ ბავშვების რიცხვი, რომლებიც ბრონქული ასთმით ავადდებიან:

„ბრონქული ასთმა ძალიან ვერაგი დაავადებაა. ერთ-ერთი ბრძენი ადამიანი ამბობდა, რომ ბრონქული ასთმის დროს ჩვენ შეგვიძლია მეოთხედი ძალით ვისუნთქოთ, მეოთხედი ძალით ვიაზროვნოთ, მეოთხედი ძალით ვიმოძრაოთ და მხოლოდ ასთმის შეტევა ვითარდება მთელი ძალით, ყოველგვარი მეოთხედების გარეშე. თანამედროვე განმარტებით ბრონქული ასთმა არის ქრონიკული ბრონქის ანთებით მიმდინარე დაავადება. მსოლფიოში 350 მილიონზე მეტი ადამიანია დაავადებული ბრონქული ასთმით. მათი რიცხვი ყოველდღიურად მატულობს. ძალიან სამწუხაროა ის ფაქტიც, რომ მატულობს ბრონქული ასთმით დაავადებული ბავშვების რაოდენობა. ყოველწლიურად მსოფლიოში 250 000 -მდე ადამიანი იღუპება ბრონქული ასთმით.“

ბაია ბეზარაშვილის თქმით, ბრონქული ასთმის კონტროლი თანამედროვე სამყაროში რთული არ არის:

„მიუხედავად იმისა, რომ ბრონქული ასთმა ძალიან ვერაგი დაავადებაა და მას ბევრი გართულება აქვს, თანამედროვე სამედიცინო რეკომენდაციებით და სამკურნალო საშუალებებით შესაძლებელია მისი კონტროლი. თუ ექიმსა და პაციენტს შორის შედგა კონტაქტი, მოხდა სწორი დიაგნოსტირება და რეკომენდაციების გათვალისწინება, მისი მართვა შესაძლებელია.“

ბაია ბეზარაშვილი აცხადებს, რომ მშობელმა ბავშვი ექიმთან პირველივე სიმპტომების გამოვლენისთანავე უნდა მიიყვანოს:

„პირველივე სიმპტომების გაჩენისთანავე მშობელი უნდა მივიდეს ექიმთან. რა სიმპტომები ახასიათებს ასთმას? როგორც ჰიპოკრატე ამბობდა, სულხუთვა, სუნთქვის გაძნელება, ქოშინი, შეტევითი ხასიათის ხველა. განსაკუთრებით ეს პრობლემები გამოხატულია ღამით და გამთენიისას. მწოლიარე მდგომარეობაში პაციენტი ვერ სუნთქავს სათანადოდ. ბრონქული ასთმის განვითარებას განაპირობებს სხვადასხვა გარემო ფაქტორები. თამბაქოს მოხმარება საოცრად მოქმედებს ასთმის განვითარებაზე, ასევე გენეტიკური განწყობა, ალერგენები, სტრესი და ვირუსები.“

„კლასიფიკაციის მიხედვით ასთმა იყოფა კონტროლირებად და არაკონტროლირებად ასთმად. კონტროლირებადად ითვლება ასთმა, თუ პაციენტს კვირაში ორზე მეტად არ უვითარდება შეტევა. მე ვერ ვეთანხმები ამაში მეცნიერებს. ძალიან ვინერვიულებდი ჩემს პაციენტებს კვირაში ორჯერ კი არა, თვეში ერთხელაც რომ ემართებოდეთ შეტევა, იმდენად კარგად შეიძლება იყოს ასთმა დღეს კონტროლირებადი. ძალიან მნიშვნელოვანია, რომ ნებისმიერი ალერგიული რეაქციის განვითარების დროს მივაკითხოთ ექიმს. ამ დროს ხდება სწორი დიაგნოსტირება, მკურნალობა და პრევენციის მეთოდების შემუშავებაც,“ - აღნიშნავს ბაია ბეზარაშვილი.

წყარო: ​დილა ფორმულაზე

არ დაგავიწყდეთ !!!

დაემატეთ ჯგუფში საბავშვო რეცეპტები

რაზე მიუთითებს ბავშვის განავალში სისხლის არსებობა და როგორ მივიტანოთ ეჭვი დაავადებაზე?
რაზე მიუთითებს ბავშვის განავალში სისხლის არსებობა და როგორ მივიტანოთ ეჭვი დაავადებაზე, - აღნიშნულ თემაზე პედიატრი თამარ ობგაიძე ​საუბრობს. გთავაზობთ მის ნათქვამს სიტყვა-სიტყვით?„პირველ რიგში, ნორ...

შეიძლება დაინტერესდეთ

„მინდა, მამებს ვუთხრა, რომ ზრუნვა არ არის მხოლოდ მატერიალური თვალსაზრისით ზრუნვა, ბავშვს სჭირდება მხარდაჭერა,“ - ფსიქოლოგი ნანა ჩაჩუა

„მინდა, მამებს ვუთხრა, რომ ზრუნვა არ არის მხოლოდ მატერიალური თვალსაზრისით ზრუნვა, ბავშვს სჭირდება მხარდაჭერა,“ - ფსიქოლოგი ნანა ჩაჩუა

ფსიქოლოგმა ნანა ჩაჩუამ სასკოლო ასაკის ბავშვთან ურთიერთობის წესების შესახებ ისაუბრა და მშობლებს ურჩია, რომ ბავშვის მიმართ სკოლისთვის მოსამზადებლად განსაკუთრებული მხარდაჭერა გამოხატონ:

„განსაკუთრებით მნიშვნელოვანია მამები, ის, თუ რას ეუბნება მამა ბავშვს ამ შემთხვევაში. ერთია, რომ ბავშვი ფიზიკურად უნდა მიუახლოვდეს სკოლას, მეორეა, რომ მშობლებმა თავიანთი გამოცდილება პოზიტიურად წარადგინონ ბავშვისთვის. ამავე დროს, წიგნები, რომლითაც ბავშვები იხელმძღვანელებენ, სასკოლო ნივთები, მათთან შემხებლობა უნდა ჰქონდეს ბავშვს. მშობლებმა უნდა წაიყვანონ ბავშვი, თავად აარჩევინონ სასკოლო ნივთები, ხელჩანთა, სამოსი, რომ ბავშვი იყოს ჩართული მზადებაში. ასეთ შემთხვევაში პირველი გაკვეთილი და სკოლასთან პირველი შეხება იქნება ჩვეულებრივი პროცესის ერთი ნაწილი.“

„მე მინდა, მამებს ვუთხრა, რომ ზრუნვა არ არის მხოლოდ მატერიალური თვალსაზრისით ზრუნვა, ყველაზე მნიშვნელოვანია, რომ ბავშვმა იგრძნოს მხარდაჭერა. ეს მხარდაჭერა უნდა იყოს ემოციური დონის, განცდიდან უნდა იყოს. როდესაც ბავშვს მამა ხელს მოჰკიდებს და ასე მიდიან სკოლაში, ეს ბავშვში უსაფრთხოების განცდას ბადებს. ბავშვი, რომელიც უსაფრთხოდ გრძნობს თავს, მას საკუთარი თავის მნიშვნელობა ეძლევა აქედან. ბავშვისთვის უსაფრთხოების განცდა მოდის პირდაპირ იქიდან, თუ რამდენად გამოხატავენ სიყვარულს მშობლები. მამებს ძალიან დიდი გულისყური სჭირდებათ ბავშვის სასკოლო პროცესთან დაკავშირებით. ძალიან კარგი იქნება, თუ დედა და მამა ერთდროულად იქნებიან ამ პროცესში ჩართული. განსაკუთრებით პირველად რომ მიდის ბავშვი სკოლაში, განსაკუთრებით სასურველია, რომ მშობლები ერთად მონაწილეობდნენ ამ დღეს პროცესში,“- აღნიშნულ საკითხზე ნანა ჩაჩუამ რადიო „იმედის“ ეთერში ისაუბრა.

წყარო: ​რადიო „იმედი“

წაიკითხეთ სრულად