Baby Bag

სახიფათოა თუ არა კონდიციონერი ბავშვის ჯანმრთელობისთვის? - ევგენი კომაროვსკის რეკომენდაციები მშობლებს

სახიფათოა თუ არა კონდიციონერი ბავშვის ჯანმრთელობისთვის? - ევგენი კომაროვსკის რეკომენდაციები მშობლებს

ზაფხულის დადგომასთან ერთად სახლში ტემპერატურა იმატებს. უფროსებს და ბავშვებს სიცხე ძალიან აწუხებთ. მშობლები სიცხის მიუხედავად კონდიციონერის ჩართვას ხშირად ერიდებიან, რადგან არ იციან, რამდენად უსაფრთხოა მისი გამოყენება იმ ოთახში, სადაც ბავშვი იმყოფება. ცნობილი პედიატრი ევგენი კომაროვსკი მშობლებს ურჩევს გასაგრილებლად კონდიციონერი გამოიყენონ, თუმცა გარკვეული წესების დაცვა აუცილებელია.

  • 1.კონდიციონერი დაკვირვებით შეარჩიეთ

სახლში მცირეწლოვანი ბავშვი თუ გყავთ, კონდიციონერის შეძენამდე აუცილებლად შეამოწმეთ აქვს თუ არა მას სიმძლავრისა და ჰაერის ნაკადის მიმართულების რეგულირების მექანიზმები.

  • 2.ყურადღებით გაეცანით ინსტრუქციას

კონდიციონერის ჩართვამდე ყურადღებით გაეცანით ინსტრუქციას და ის ზედმიწევნით კარგად დაიცავით. რეგულარულად გამოცვალეთ ფილტრები. თუ ტექნიკური მომსახურება დაგჭირდებათ, მიმართეთ მხოლოდ შესაბამის სპეციალისტებს.

  • 3.გააკონტროლეთ ჰაერის ტენიანობა

ჰაერის ტენიანობის კონტროლი აუცილებელია, როდესაც სახლში კონდიციონერი გაქვთ ჩართული. მისი მუშაობის პრინციპიდან გამომდინარე, ჰაერის გამოშრობის ალბათობა მაღალია. თუ ოთახში, რომელშიც კონდიციონერია ჩართული, ბავშვიც გყავთ, აუცილებლად გამოიყენეთ გიგრომეტრი და ჰაერის დამატენიანებელი.

  • 4.გაითვალისწინეთ კონდიციონერის მთავარი დანიშნულება

კონდიციონერის მთავარი ამოცანა სასიამოვნო გარემოს და ადეკვატური ტემპერატურის შექმნაა. ნუ ეცდებით სახლი მაცივრის რომელიმე განყოფილებას დაამსგავსოთ. თუ გარეთ ტემპერატურა 40 გრადუსზე მაღალია, არ არის აუცილებელი, რომ სახლში ტემპერატურა 18 გრადუსზე დაბლა დაიყვანოთ, 22-24 გრადუსი სავსებით საკმარისია.

  • 5.ჩართული კონდიციონერის წინ ბავშვს ნუ გააჩერებთ

ჩართული კონდიციონერის წინ ჰაერი აქტიურად მოძრაობს. ეს სივრცე, დაახლოებით, 2-3 მეტრის არეალშია. აღნიშნულ სივრცეში ბავშვს დიდხანს ნუ გააჩერებთ. არავითარ შემთხვევაში არ დადგათ ბავშვის საწოლი ამ ზონაში.

  • 6.ხშირად გაანიავეთ სახლი

კონდიციონერის გამოყენებისას არ უნდა დაივიწყოთ სახლის განიავების აუცილებლობა. ყოველდღიურად გამოაღეთ ფანჯრები და სახლი რეგულარულად გაანიავეთ.

  • 7.კონდიციონერის პულტი არ დადოთ ბავშვისთვის ხელმისაწვდომ ადგილას

ბავშვს არავითარ შემთხვევაში არ უნდა ჰქონდეს წვდომა კონდიციონერის პულტთან. მას უნდა აუხსნათ, რომ ეს დედიკოს და მამიკოს ნივთია და მისი გამოყენება სხვებისთვის არ შეიძლება. გახსოვდეთ, კონდიციონერის პულტი ბავშვს ერთი წუთითაც კი არ უნდა მისცეთ.

წყარო: ​goodhouse.ru

არ დაგავიწყდეთ !!!

Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთელობა

უსაფრთხოების 10 წესი, რომელიც ბავშვს აუცილებლად უნდა ასწავლოთ - ევგენი კომაროვსკი
​​ცნობილმა პედიატრმა ევგენი კომაროვსკიმ სოციალურ ქსელში პოსტი გამოაქვეყნა, რომელშიც მშობლებს უსაფრთხოების ის წესები გააცნო, რომელთა შესახებ ბავშვმა აუცილებლად უნდა იცოდეს. მართალია, მშობლებს სურთ, რომ...

შეიძლება დაინტერესდეთ

„ამ პრეპარატს უკვე ვადევნებთ თვალყურს, შესაძლოა, მალე მოხდეს მისი აღიარება და 2022 წელს გამოჩნდეს კლინიკური გამოყენებისთვის,“ - გიორგი კამკამიძე

„ამ პრეპარატს უკვე ვადევნებთ თვალყურს, შესაძლოა, მალე მოხდეს მისი აღიარება და 2022 წელს გამოჩნდეს კლინიკური გამოყენებისთვის,“ - გიორგი კამკამიძე

ალერგოლოგ-იმუნოლოგმა გიორგი კამკამიძემ პრეპარატ მოლნუპირავირის ეფექტიანობის შესახებ ისაუბრა. აღნიშნული პრეპარატი კოვიდ-19-ის საწინააღმდეგო ახალი ანტივირუსული მედიკამენტია, რომელზეც კვლევები აქტიურად ტარდება:

„ამ პრეპარატს უკვე ვადევნებთ თვალყურს. ძალიან სასიამოვნოა, რომ კვლევის ადრეულ ეტაპზე მან აჩვენა ისეთი კარგი შედეგები, რომ ​შესაძლებელია, მალე მოხდეს ამ პრეპარატის აღიარება ამერიკის FDA-ს მიერ. შეიძლება ველოდოთ, რომ ეს პრეპარატი გამოჩნდება უკვე 2022 წელს კლინიკური გამოყენებისთვის. რა აჩვენა ძირითადად ამ პრეპარატმა? მისი გამოცდა მიმდინარეობდა საშუალო და მსუბუქი სიმძიმის პაციენტებში. კვლევა იყო მიმართული იქითკენ, თუ რამდენს განუვითარდა მძიმე კოვიდი და რამდენი გარდაიცვალა. ეფექტი იყო 50 %-იანი რისკის შემცირება.“

გიორგი კამკამიძის თქმით, ანტივირუსულ პრეპარატებზე ფაიზერი და ასტრაზენეკაც მუშაობენ:

​პარალელურად მიმდინარეობს ფაიზერისა და ასტრაზენეკას კვლევები პრეპარატზე. ისინი ჩამორჩებიან დროში და არ არის დამაიმედებელი, რომ ახლო მომავალში მათ დაუშვებენ კლინიკური გამოყენებისთვის. თუ ისევ დავუბრუნდებით ჩვენ მიერ განხილულ პრეპარატს, ის არის ტაბლეტირებული ფორმით. აქამდე არსებული პრეპარატები იყო უკვე დამძიმებული პაციენტების მკურნალობისთვის. ეს არის ტაბლეტირებული პრეპარატი, რომელიც გამოიყენება შედარებით ადრეულ ეტაპზე, ინფიცირებიდან მეხუთე-მეექვსე დღემდე.“

​ვირუსის საწინააღმდეგო პრეპარატები მოქმედებენ ვირუსის უჯრედის შიგნით ჩამოყალიბების გარკვეულ ეტაპებზე. ისინი ბლოკავენ ვირუსის გამრავლების გარკვეულ ეტაპს. რაც შეეხება პრეპარატს, რომელზეც დღეს ვსაუბრობთ, მისი მოქმედებით ვირუსის ჩამოყალიბების პერიოდში ხდება შეცდომის დაშვება. შედეგად ყალიბდება არასიცოცხლისუნარიანი ვირუსი. მოლნუპირავირის მოქმედება სწორედ ეს არის,“ - აღნიშნულ საკითხზე გიორგი კამკამიძემ ტელეკომპანია „იმედის“ გადაცემაში „იმედის დილა“ ისაუბრა.

წყარო: ​„იმედის დილა“

წაიკითხეთ სრულად