Baby Bag

სახიფათოა თუ არა კონდიციონერი ბავშვის ჯანმრთელობისთვის? - ევგენი კომაროვსკის რეკომენდაციები მშობლებს

სახიფათოა თუ არა კონდიციონერი ბავშვის ჯანმრთელობისთვის? - ევგენი კომაროვსკის რეკომენდაციები მშობლებს

ზაფხულის დადგომასთან ერთად სახლში ტემპერატურა იმატებს. უფროსებს და ბავშვებს სიცხე ძალიან აწუხებთ. მშობლები სიცხის მიუხედავად კონდიციონერის ჩართვას ხშირად ერიდებიან, რადგან არ იციან, რამდენად უსაფრთხოა მისი გამოყენება იმ ოთახში, სადაც ბავშვი იმყოფება. ცნობილი პედიატრი ევგენი კომაროვსკი მშობლებს ურჩევს გასაგრილებლად კონდიციონერი გამოიყენონ, თუმცა გარკვეული წესების დაცვა აუცილებელია.

  • 1.კონდიციონერი დაკვირვებით შეარჩიეთ

სახლში მცირეწლოვანი ბავშვი თუ გყავთ, კონდიციონერის შეძენამდე აუცილებლად შეამოწმეთ აქვს თუ არა მას სიმძლავრისა და ჰაერის ნაკადის მიმართულების რეგულირების მექანიზმები.

  • 2.ყურადღებით გაეცანით ინსტრუქციას

კონდიციონერის ჩართვამდე ყურადღებით გაეცანით ინსტრუქციას და ის ზედმიწევნით კარგად დაიცავით. რეგულარულად გამოცვალეთ ფილტრები. თუ ტექნიკური მომსახურება დაგჭირდებათ, მიმართეთ მხოლოდ შესაბამის სპეციალისტებს.

  • 3.გააკონტროლეთ ჰაერის ტენიანობა

ჰაერის ტენიანობის კონტროლი აუცილებელია, როდესაც სახლში კონდიციონერი გაქვთ ჩართული. მისი მუშაობის პრინციპიდან გამომდინარე, ჰაერის გამოშრობის ალბათობა მაღალია. თუ ოთახში, რომელშიც კონდიციონერია ჩართული, ბავშვიც გყავთ, აუცილებლად გამოიყენეთ გიგრომეტრი და ჰაერის დამატენიანებელი.

  • 4.გაითვალისწინეთ კონდიციონერის მთავარი დანიშნულება

კონდიციონერის მთავარი ამოცანა სასიამოვნო გარემოს და ადეკვატური ტემპერატურის შექმნაა. ნუ ეცდებით სახლი მაცივრის რომელიმე განყოფილებას დაამსგავსოთ. თუ გარეთ ტემპერატურა 40 გრადუსზე მაღალია, არ არის აუცილებელი, რომ სახლში ტემპერატურა 18 გრადუსზე დაბლა დაიყვანოთ, 22-24 გრადუსი სავსებით საკმარისია.

  • 5.ჩართული კონდიციონერის წინ ბავშვს ნუ გააჩერებთ

ჩართული კონდიციონერის წინ ჰაერი აქტიურად მოძრაობს. ეს სივრცე, დაახლოებით, 2-3 მეტრის არეალშია. აღნიშნულ სივრცეში ბავშვს დიდხანს ნუ გააჩერებთ. არავითარ შემთხვევაში არ დადგათ ბავშვის საწოლი ამ ზონაში.

  • 6.ხშირად გაანიავეთ სახლი

კონდიციონერის გამოყენებისას არ უნდა დაივიწყოთ სახლის განიავების აუცილებლობა. ყოველდღიურად გამოაღეთ ფანჯრები და სახლი რეგულარულად გაანიავეთ.

  • 7.კონდიციონერის პულტი არ დადოთ ბავშვისთვის ხელმისაწვდომ ადგილას

ბავშვს არავითარ შემთხვევაში არ უნდა ჰქონდეს წვდომა კონდიციონერის პულტთან. მას უნდა აუხსნათ, რომ ეს დედიკოს და მამიკოს ნივთია და მისი გამოყენება სხვებისთვის არ შეიძლება. გახსოვდეთ, კონდიციონერის პულტი ბავშვს ერთი წუთითაც კი არ უნდა მისცეთ.

წყარო: ​goodhouse.ru

არ დაგავიწყდეთ !!!

Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთელობა

უსაფრთხოების 10 წესი, რომელიც ბავშვს აუცილებლად უნდა ასწავლოთ - ევგენი კომაროვსკი
​​ცნობილმა პედიატრმა ევგენი კომაროვსკიმ სოციალურ ქსელში პოსტი გამოაქვეყნა, რომელშიც მშობლებს უსაფრთხოების ის წესები გააცნო, რომელთა შესახებ ბავშვმა აუცილებლად უნდა იცოდეს. მართალია, მშობლებს სურთ, რომ...

შეიძლება დაინტერესდეთ

„პანდემიის დროს აცრის ჩატარება თქვენი პირდაპირი ვალდებულებაა,“ - დავით ლოლაძის მიმართვა საქართველოს მოქალაქეებს

„პანდემიის დროს აცრის ჩატარება თქვენი პირდაპირი ვალდებულებაა,“ - დავით ლოლაძის მიმართვა საქართველოს მოქალაქეებს

ზოგადმა ქირურგმა დავით ლოლაძემ მოსახლეობას ვაქცინაციისკენ მოუწოდა და  საზოგადოებრივი ჯანმრთელობის შესახებ საქართველოს კანონიდან ამონარიდი გააცნო, რომელიც მოქალაქეებს პანდემიის პირობებში პროფილაქტიკური ღონისძიებების ჩატარებაზე უარის თქმის უფლებას არ აძლევს:

„საქართველოს ტერიტორიაზე მყოფი ყველა ადამიანის უფლებაა უარი თქვას პროფილაქტიკური ღონისძიებების ჩატარებაზე, თუ საქმე არ ეხება ეპიდემიას ან პანდემიას. მე ახლა წაგიკითხეთ მონაკვეთი საქართველოს კანონიდან საზოგადოებრივი ჯანმრთელობის შესახებ. ნაცნობებო, მეგობრებო, კოლეგებო, ​პანდემიის დროს აცრის ჩატარება თქვენი პირდაპირი ვალდებულებაა. შეიძლება არაფრად ჩააგდოთ ჩემი ან რომელიმე ჩვენგანის ნათქვამი. მაგრამ ეს კანონით გათვალისწინებული წესია.“

დავით ლოლაძის თქმით, როდესაც ჩვენი თავისუფლება სხვას უზღუდავს სიცოცხლის უფლებას, იქ უკვე კანონის ენა შემოდის:

„შენი თავისუფლება მთავრდება იქ, სადაც იწყება სხვისი უფლებები. როდესაც თქვენი თავისუფლება სხვას უზღუდავს ყველაზე უზენაეს, ანუ სიცოცხლის უფლებას, აქ შემოდის კანონის ენა. წარმოიდგინეთ, რომ ყოველ დილით ხედავთ ავტობუსს, რომელიც კლდეში იჩეხება. ეს ავტობუსი ადამიანებით არის სავსე. ამ ავტობუსში დაახლოებით 70 ადამიანი ეტევა, იმდენივე, რამდენ სიცოცხლესაც თითქმის ყოველდღიურად ვკარგავთ. წარმოიდგინეთ, რომ ა​მ ავტობუსში სხედან ჩვენი მეგობრები, ჩვენი ოჯახის წევრები, ხშირ შემთხვევაში, შეიძლება ეს იყოს ჩვენი შვილები და ჩვენც. დავიჯერო, ასე მშვიდად გააგრძელებდით ამ შემთხვევის ყურებას, ყოველდღიურად ავტობუსი რომ ხევში იჩეხებოდეს?! ალბათ, იმოქმედებდით."

„დროა, ახლაც ვიმოქმედოთ ყველამ და მივიღოთ ერთადერთი სწორი გადაწყვეტილება:​ ავიცრათ და დავასრულოთ პანდემია,“- აღნიშნულ საკითხზე დავით ლოლაძემ ტელეკომპანია „ფორმულას“ გადაცემაში „ჯანმრთელობის ფორმულა“ ისაუბრა.

წყარო: ​„ჯანმრთელობის ფორმულა“

წაიკითხეთ სრულად