Baby Bag

საქართველო და ფინეთი დისტანციური სწავლების წარმატებით დანერგვის თვალსაზრისით ლიდერ ქვეყნებად დასახელდა

საქართველო და ფინეთი დისტანციური სწავლების წარმატებით დანერგვის თვალსაზრისით ლიდერ ქვეყნებად დასახელდა

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა კორპორაცია Microsoft-ის მიერ ორგანიზებულ ვირტუალური განათლების ტრანსფორმაციის პირველ სამიტში მიიღო მონაწილეობა, საზოგადოებას სიტყვით მიმართა და მათ COVID-19-ის პანდემიის ფონზე საქართველოს განათლების სისტემის წინაშე არსებული გამოწვევები და მათი გადაჭრის გზები გააცნო.

სამიტში მონაწილეობდნენ გაერთიანებული ერების განათლების, მეცნიერებისა და კულტურის ორგანიზაციისა (UNESCO), ეკონომიკური განვითარებისა და თანამშრომლობის საერთაშორისო ორგანიზაციის (OECD) წარმომადგენლები და განათლების სექტორში მოღვაწე 300-ზე მეტი ლიდერი.

სამიტის მოდერატორმა, ეკონომიკური განვითარებისა და თანამშრომლობის საერთაშორისო ორგანიზაცია OECD-ის განათლების დირექტორატის ხელმძღვანელმა ანდრეას შლაიხერმა მიხეილ ჩხენკელის გამოსვლის შემდეგ კიდევ ერთხელ ისაუბრა საქართველოს წარმატებულ მაგალითზე და COVID-19-ის კრიზისის პირობებში განათლების სისტემის ადაპტაციისა და დისტანციური სწავლების წარმატებით დანერგვის თვალსაზრისით, საქართველო და ფინეთი ლიდერ ქვეყნებად დაასახელა.

აღსანიშნავია, რომ ეკონომიკური განვითარებისა და თანამშრომლობის საერთაშორისო ორგანიზაციამ (OECD) 2020 წლის ანგარიშში, რომელიც COVID-19-ის პანდემიით განათლების სფეროში შექმნილი გამოწვევების დასაძლევად გამოაქვეყნა, 98 ქვეყანას შორის საქართველოს მთავრობის მიერ განათლების მიღების უწყვეტი პროცესის უზრუნველსაყოფად გადადგმული ნაბიჯები ერთ-ერთ საუკეთესო ნიმუშად შეაფასა. Microsoft-ის მიერ ორგანიზებულ სამიტზე სიტყვით გამოსვლისას მიხეილ ჩხენკელმა განვითარებისა და თანამშრომლობის საერთაშორისო ორგანიზაცია OECD-ის განათლების დირექტორატის ხელმძღვანელს ანდრეას შლაიხერს მადლობა კიდევ ერთხელ გადაუხადა.

შეიძლება დაინტერესდეთ

პედაგოგიური პრაქტიკის კვლევის ნიმუში

პედაგოგიური პრაქტიკის კვლევის ნიმუში

გთავაზობთ პედაგოგიური პრაქტიკის კვლევის ნიმუშს. კვლევა ხაშურის მუნიციპალიტეტის სოფელ ტკოცის საჯარო სკოლის დაწყებითი საფეხურის მასწავლებელმა, ლელა მეტრეველმა განახორციელა. ​Moms.ge-ს კვლევის ანგარიში სწორედ მან მიაწოდა. 

საკვლევი საკითხი იყო ეფექტური სტრატეგიების მნიშვნელოვნება წერის სწავლების პროცესში დაწყებითი საფეხურის მოსწავლეებთან. კვლევის მიზანი გახლდათ, იმ მეთოდებისა და სტრატეგიების დადგენა, რომლებიც დაეხმარებოდა მოსწავლეებს წერის სწავლების პროცესში გამოვლენილი ხარვეზების აღმოფხვრაში:

„კვლევაში ასახულია ჩემ მიერ განხორციელებული კვლევის შედეგად მოპოვებული შედეგები და დასკვნები, რომელთა ანალიზი იძლევა საშუალებას დავადგინოთ, როგორია მოსწავლეთა დამოკიდებულება წერის სხვადასხვა სტრატეგიისადმი, რამდენად განაპირობებს ეფექტურად შერჩეული მეთოდი წერის სწავლებისას მოსწავლეთა მოტივაციის ზრდას. კვლევის ანგარიში მოიცავს იმას, თუ რომელი მეთოდები და სტრატეგიებია ეფექტური წერის სწავლებისათვის დაწყებითი საფეხურის მოსწავლეებში. როგორ უნდა ვასწავლოთ წერა მოსწავლეებს? რომელია წერის სწავლების ყველაზე ეფექტური მეთოდები? ნამუშევარში განხილულია მეთოდოლოგია და მოცემულია კლევის შედეგების ანალიზი. კვლევის ანგარიშს თან ერთვის დანართის სახით კვლევისას გამოყენებული ტექსტები, მოსწავლეთა ნამუშევრები, ტესტის ნიმუშები, გამოკითხვის კითხვარი, გრაფიკული სქემები. ჩემს მოსწავლეებთან ჩატარებული კვლევის ანგარიშის შედეგად ჩამოყალიბებული დასკვნები და რეკომენდაციები, ვფიქრობ, საინტერესო იქნება, არა მარტო მესამე კლასის მასწავლებელთათვის, არამედ ზოგადად დაწყებითი საფეხურის პედაგოგებისთვის. მათი გათვალისწინებისა და სასწავლო პროცესში დანერგვის შედეგად ამაღლდება მოსწავლეთა მოტივაცია და გაიზრდება წერის სწავლების დონე დაწყებით კლასებში“, - აღნიშნულია ლელა მეტრეველის კვლევის შესავალში. 

იხილეთ კვლევა ბმულზე - ​ეფექტური სტრატეგიების მნიშვნელოვნება წერის სწავლების პროცესში დაწყებითი საფეხურის მოსწავლეებთან

ამავე თემაზე: ​როგორ უნდა განხორციელდეს პედაგოგიური პრაქტიკის კვლევა - მაგალითი

წაიკითხეთ სრულად