,,იმუნური სისტემა იმართება კუჭ-ნაწლავის ტრაქტით, ერთსახოვანია და განსჯას არ ექვემდებარება. შესაბამისად, რაციონალურ კვებას ძალიან დიდი მნიშვნელობა აქვს, განსაკუთრებით - ჩვენ ფაქიზად ვართ განწყობილი 2 წლამდე ასაკის ბავშვებთან", - ამის შესახებ პედიატრმა, ნინო კამკამიძემ ისაუბრა.
,,დიდი ფუფუნებაა, როდესაც ქალს შეუძლია, ექვს თვემდე ბავშვი ჰყავდეს ექსკლუზიურ ძუძუთი კვებაზე. თუ ეს ერთ წლამდე გაგრძელდება და კიდევ შემდგომ, უკეთესი. კვების რეჟიმი და რაციონი ჩვენ უნდა ჩამოვიყალიბოთ ისე, რომ თავის დროზე იყოს მზად საუზმეზე, სადილზე, ვახშამზე მისაღები საკვები, იქნება ეს დესერტი, თევზეული, ხორცეული თუ სხვა. ეს რეჟიმი ბავშვს ადრეული ასაკიდანვე უნდა ჩამოვუყალიბოთ. ხშირად გვესმი - ჩემს შვილს სოსისი უყვარს ან შემწვარი კარტოფილი, თუ არ აჭმევთ, არ ეყვარება. ამიტომ, აქცენტი გააკეთეთ ეკოლოგიურად სუფთა, ჯანსაღ პროდუქტზე. ეს არის შესაძლებელი, დაიცავით თავი არასასურველი პროდუქტებისგან.
რაც შეეხება იმუნურ სისტემას. მისი გაძლიერება ისევ და ისევ რაციონალური კვებითა და სწორი რეჟიმით ყალიბდება, არავითარ შემთვევაში - პრეპარატებით. ჰიპერვიტამინოზი, ანუ ვიტამინების კომპლექტად მიღება არანაირად არ იცავს არც ვირუსული ინფექციისგან, არც პნევმონიისგან, პირიქით, ჰიპერვიტამინონზი უფრო რთულად სამართავი დაავადებაა. კონკრეტულ შემთხვევაში, თუ რომელიმე ბავშვთან გვაქვს რაიმე ვიტამინის დეფიციტი, შეიძლება, იმის შევსება მოხდეს, მაგრამ არა ისე, რომ დაუნიშნავენ ხოლმე ვიტამინების კომპლექტს და ამით ცდილობენ სეზონური ვირუსების აცილებას. თუმცა, არსებობს გარკვეული მდგომარეობები, იგივე მეძუძურობა, როდესაც ქალმა ათასი კალორიით მეტი უნდა მიიღოს და დღის განმავლობაში ვერ ახერხებს შესაბამის კვებას. ასეთ შემთხვევებში შეიძლება მისთვის ვიტამინების დანიშვნა, რადგან მას არ აქვს სათანადო კვება. მაგრამ დამერწმუნეთ, თუ ის ნორმალურად იკვებება და იღებს იმ რაციონს, რაც მას მეძუძურობის პერიოდში სჭირდება, არ იქნება აუცილებელი ვიტამინების დანიშვნა.
ჩვენ უნდა ვისწავლოთ ჩვენი ორგანიზმის მოსმენა - წყალი გვწყურია, ვსვამთ და ა.შ. ეს რომ ვისწავლოთ ყველამ და ბავშვსაც ჩამოვუყალიბოთ ჯანსაღი კვების რეჟიმი, ეს იქნება სწორი დამოკიდებულება ბავშვის განვითარებაში", - აღნიშნა ნინო კამკამიძემ.
წყარო: ,,რადიო ფორტუნა"
