Baby Bag

„მე გასწავლით ძალიან გემრიელი, მძიმე, სველი, ბევრი ქიშმიშით, არომატული პასკის მომზადებას,“- თათია თექთურმანიძე

„მე გასწავლით ძალიან გემრიელი, მძიმე, სველი, ბევრი ქიშმიშით, არომატული პასკის მომზადებას,“- თათია თექთურმანიძე

პროექტ „მასტერშეფის“ მონაწილემ, მოდელმა თათია თექთურმანიძემ სოციალურ ქსელში გამომწერებს პასკის მომზადების საკუთარი რეცეპტი გააცნო:

„მე გასწავლით ძალიან გემრიელი, მძიმე, სველი, ბევრი ქიშმიშით, არომატული პასკის მომზადებას, რომელიც ამავდროულად ძალიან მარტივად მოსამზადებელია. დარწმუნებული ვარ, ბევრ თქვენგანს შეუყვარდება ეს რეცეპტი. ამისთვის ჩვენ დაგვჭირდება: 500 გრამი გაცრილი ფქვილი, ქიშმიში გემოვნების მიხედვით, 250 გრამი შაქარი, 5 ცალი კვერცხის გული, 150 გრამი გამდნარი კარაქი, 40 გრამი ნედლი საფუარი, 20 გრამ ზეთში გახსნილი სუნელები, 300 მილილიტრი რძე.

რძეში ჩავყაროთ 3 სუფრის კოვზი ფქვილი. კარგად გადავურიოთ და მოცემული მასა მოვათავსოთ დაბალ ცეცხლზე. ვურიოთ მუდმივად, მანამ, სანამ მასა არ შესქელდება. ქვაბიდან მასა გადავიტანოთ მიქსერში. გავაგრილოთ და როდესაც სასიამოვნოდ თბილი გახდება, მხოლოდ შემდგომ დავუმატოთ საფუარი. შემდეგ ეტაპობრივად დავუმატოთ შაქარი, კვერცხის გული, გამდნარი კარაქის მხოლოდ ნახევარი, 1 ჩაის კოვზი მარილი, ვანილი და 20 გრამ ზეთში გახსნილი სუნელები. ყველაფერი კარგად გადავურიოთ. ყველა ინგრედიენტის არევის შემდეგ, ეტაპობრივად ვამატებთ ფქვილს და თან ვურევთ. ცომი რომ გამზადდება, გადმოვიტანოთ სამუშაო მაგიდაზე. სამუშაო მაგიდას უნდა წავუსვათ ზეთი. გადმოვიტანოთ ცომი. ხელებზეც წავისვათ ზეთი და დავიწყოთ ცომის მოზელვა. თავიდან ცომი ცოტა მიგეწეპებათ ხელებზე, მაგრამ არაუშავს, ასეც უნდა იყოს. გამდნარი კარაქი, რომელიც ბოლომდე არ გამოვიყენეთ, უნდა შევაზილოთ ცომს. მზა ცომი არის ელასტიური, აღარ ეწეპება ხელს. ცომი უნდა მოვათავსოთ ჯამში იმისთვის, რომ კარგად ამოვიდეს, გადიდდეს ორჯერ ან სამჯერ.

ცომს ცელოფანი გადავაკრათ და მოვათავსოთ 40 გრადუსამდე გამთბარ ღუმელში. სამსაათ-ნახევარში ცომი სამჯერ გადიდდება. ხელი კვლავ დავისველოთ ზეთში. ჯამში კარგად მოვურიოთ ცომს. ჩავყაროთ ცომში ქიშმიში. ვაკრავთ ცომს ცელოფანს და ისევ ვდგამთ თბილ ღუმელში, მანამ სანამ ისევ ორჯერ არ გადიდდება. გადაზელილი ცომი ბევრად სწრაფად ამოვა და დასჭირდება მხოლოდ 2 საათი. ცომი გადავიტანოთ ფორმებში და მოვათავსოთ თბილ ღუმელში. ერთ საათში ცომი ამოვა და მზად არის გამოსაცხობად. 170 გრადუსამდე გახურებულ ღუმელში სულ რაღაც 35 წუთში გამოცხვება ულამაზესი პასკა. გამოცხობის წინ პასკას გადაუსვით კვერცხის გულისა და არაჟნის ნაზავი, რომ პრიალა ზედაპირი ჰქონდეს. თუ გინდათ, რომ მიიღოთ ასეთი პასკა, არ უნდა იჩქაროთ. დააცადეთ პასკას სამჯერ ამოსვლა."

წყარო: ​tatia_teqturmanidze

შეიძლება დაინტერესდეთ

„გაყინვის მეთოდი არის უპირატესი შენახვის სხვა მეთოდებთან შედარებით,“ - სურსათის უვნებლობის საერთაშორისო კონსულტანტი მზია კუზნეცოვა

სურსათის უვნებლობის საერთაშორისო კონსულტანტი მზია კუზნეცოვა გადაცემაში „დილა ფორმულაზე“ გაყინული პროდუქტების შესახებ საუბრობს და აღნიშნავს, რომ შენახვის ეს მეთოდი სხვა მეთოდებთან შედარებით უპირატესია:

„დავიწყოთ იმით, თუ რა მოსდის პროდუქტს გაყინვის პროცესში. გაყინვა საუკუნეების მანძილზე გამოყენებული მეთოდია ხილისა და ბოსტნეულის შესანახად. გაყინვის მეთოდი უფრო ცხოველური პროდუქტებისთვის გამოიყენება, თუმცა ბევრი ამ მეთოდით ხილსა და ბოსტნეულსაც ინახავს. გაყინვის მეთოდი დაფუძნებულია პროდუქტში არსებული წყლის ნაწილაკების ფიზიკური მდგომარეობის ცვლილებაზე. წყალი გადადის მყარ მდგომარეობაში. სხვა თვისებები ამ დროს პროდუქტში არ იცვლება. ყველა ის თვისება, რაც იცვლება დამოკიდებულია იმ ყინულის კრისტალების რაოდენობაზე, რომელიც გაყინვის პროცესში წარმოიქმნება. გაყინვის მეთოდი არის უპირატესი შენახვის სხვა მეთოდებთან შედარებით. ამას აღიარებს ბევრი საერთაშორისო ორგანიზაცია, რომელიც სურსათის უვნებლობის მიმართულებით მუშაობს. გაყინვა უფრო მეტად განაპირობებს პროდუქტში საწყისი თვისებების: გემოს, სუნის, ფერის და სტრუქტურის შენარჩუნებას, ვიდრე შენახვის ნებისმიერი სხვა მეთოდი.“

მზია კუზნეცოვას თქმით, დიდი მნიშვნელობა აქვს პროდუქტის გაყინვის მეთოდს:

„ძალიან დიდი მნიშვნელობა აქვს, თუ როგორ გავყინავთ პროდუქტს. პროდუქტი რაც შეიძლება სწრაფად უნდა გაიყინოს. პროდუქტის შიდა ტემპერატურამ ძალიან მალე მინუს თვრამეტ გრადუსს უნდა მიაღწიოს. სწრაფი გაყინვის დროს წარმოიქმნება დიდი რაოდენობით და წვრილი კრისტალები, ნელი გაყინვის დროს, პირიქით, ცოტა და დიდი კრისტალები. დიდი კრისტალები იწვევს უჯრედის კედლის დაზიანებას, იცვლება პროდუქტის სტრუქტურა და ტექსტურა ირღვევა. ამას ვიზუალურადაც ვამჩნევთ, რადგან გალღობის შემდეგ პროდუქტი იშლება.“

მზია კუზნეცოვა აღნიშნავს, რომ გაყინვისას ვიტამინები უფრო ნაკლებად იშლება, ვიდრე კონსერვირების დროს:

„განსაკუთრებით მგრძნობიარეა C ვიტამინი, ის ადვილად იშლება, მაგრამ ის იშლება მანამდე, ვიდრე გავყინავთ. როდესაც ის მოდის შეხებაში ლითონის ზედაპირთან, C ვიტამინის 10 % იკარგება. კონსერვირების პროცესში ადგილი აქვს თერმულ დამუშავებას. პროდუქტი როდესაც თერმულად მუშავდება, ვიტამინები გაცილებით სწრაფად იშლება, ვიდრე დაბალ ტემპერატურაზე. გაყინვისას ნელდება ქიმიური რეაქციები, ნელდება უჯრედული მეტაბოლური რეაქციები, ნელდება მიკროორგანიზმების ზრდა, შესაბამისად ვიტამინებიც უფრო ნაკლებად იშლება, ვიდრე მოხარშვის და კონსერვირების დროს. გაყინვამდე პროდუქტი უნდა მომზადდეს. ის უნდა გაირეცხოს, მოსცილდეს ყველა დაზიანებული ნაწილი. ამის შემდეგ, სასურველია, რომ პროდუქტი გაშრეს, რათა გაყინვის პროცესში დიდი კრისტალები არ წარმოიქმნას. შემდეგ ის უნდა მოვათავსოთ პროდუქტან შემხებლობაში დაშვებულ მასალაში, მაგ. ზიპ პარკებში. ზიპ პარკი პროდუქტის გასაყინად იდეალური საშუალებაა. ამ დროს ჩვენ შეგვიძლია მაქსიმალურად გამოვტუმბოთ ჰაერი პროდუქტიდან, რაც ხარისხის შენარჩუნებას უწყობს ხელს.“

მზია კუზნეცოვას თქმით, გაყინვამდე პროდუქტების აგრესიულ დამუშავებას უნდა მოვერიდოთ:

„რაც უფრო ნაკლებად აგრესიულ პროცედურებს ჩავრთავთ მომზადების პროცესში, მით უკეთ შეინახება პროდუქტი. მოწალვა და შეწვა დაკავშირებულია თერმულ დამუშავებასთან. რაც შეეხება სხვადასხვა პროდუქტის ერთად შენახვას, ყველა პროდუქტს აქვს შენახვის სხვადასხვა ვადა. ამიტომ, სასურველია, რომ არ ავურიოთ პროდუქტები ერთმანეთში და მიქსები არ შევინახოთ. საერთაშორისო გაიდლაინებით, სახლის პირობებში გაყინული პროდუქტების შენახვის ვადა არის საშუალოდ სამიდან თორმეტ თვემდე. სეზონიდან სეზონამდე პროდუქტების მეტი წილი ინახება. გალღვობის შემდეგ ხილი შეგიძლიათ მიირთვათ ცოცხლად. კიდევ ერთხელ ავღნიშნავ, რომ მას დაკარგული ექნება თავისი სტრუქტურა. ხილს უფრო მეტად ეკარგება სტრუქტურა, ვიდრე ბოსტნეულს, რადგან ის უფრო ფაქიზია, ვიდრე ბოსტნეული და ადვილად ზიანდება გაყინვის დროს. ნებისმიერი პროდუქტი, რომელსაც მაცივარში ყინავთ, აუცილებლად ულუფებად უნდა გაიყინოს, რადგან უკვე გამლღვალი პროდუქტების ხელახლა გაყინვა არის კატეგორიულად აკრძალული. გალღვობის დროს მიკროფლორა იღვიძებს, მიკროორგანიზმები მრავლდებიან და შემდგომი გალღვობისას პროდუქტი უკვე დაბინძურებული გამოდის.“

„დაჩირების დროს პროდუქტიდან ხდება წყლის წართმევა, გაყინვის დროს კი წყალი ნარჩუნდება და გადადის სხვა მდგომარეობაში. როგორც გაყინული, ასევე ჩირი პროდუქტი არის სასარგებლო, განსხვავებით კონსერვებისგან. კონსერვები შენახვის მეთოდებში ყველაზე დაბალი პრიორიტეტისაა და ყველაზე ნაკლებად უნდა გამოვიყენოთ. ვერ ვიტყოდით რომ ჩირსა და გაყინულ პროდუქტს შორის რომელი უფრო კარგია, ორივე სასარგებლო პროდუქტია. შენხვის მეთოდებს შორის გაყინვა შეგვიძლია ავირჩიოთ, როგორც კარგი მეთოდი. ჩემი აზრით, ზამთარში სასათბურე პირობებში მოყვანილ პროდუქტებთან შედარებით გაყინულ პროდუქტებში უფრო მეტი სასარგებლო თვისებებია,“- აღნიშნავს მზია კუზნეცოვა.

წყარო: ​დილა ფორმულაზე 

წაიკითხეთ სრულად