Baby Bag

ლოლის სიურპრიზის პოპულარულ თოჯინებს მშობლები ბოიკოტს უცხადებენ

ლოლის სიურპრიზის პოპულარულ თოჯინებს მშობლები ბოიკოტს უცხადებენ

ლოლის სიურპრიზის ახალი თოჯინების ჩაცმულობამ მშობლების აღშფოთება და გაღიზიანება გამოიწვია. დედები ხმამაღლა აცხადებენ, რომ ლოლის სათამაშოებს ამიერიდან შვილებისთვის არასდროს შეიძენენ.

მშობლები ბავშვებისთვის სათამაშოების შერჩევისას ყოველთვის უდიდესი სიფრთხილით გამოირჩევიან. ისინი ყურადღებით აკვირდებიან, რითი თამაშობენ მათი შვილები. ყველა დედა ცდილობს, რომ ბავშვმა მისი ასაკისა და განვითარების დონის შესაფერისი თოჯინებით ითამაშოს. არავის სურს, რომ სათამაშომ ბავშვს რაიმე სახის ზიანი მიაყენოს და მასზე ნეგატიურად იმოქმედოს.

ლოლის სიურპრიზის თოჯინები ბავშვებში უდიდესი პოპულარობით სარგებლობს. პატარა გოგონებს, ზოგჯერ ბიჭებსაც, ლოლის თოჯინებით თამაში ძალიან უყვართ. ბავშვებს თოჯინასთან თამაში, მისი ჩაცმა და მასთან ერთად გართობა შეუძლიათ. მათი ნაწილი ინტერაქციულია. ზოგიერთი თოჯინა წყალში ჩასმისას ტირის, ახველებს ან სხვა სახის აქტივობას ახორციელებს. კომპანიამ ისეთი თოჯინებიც გამოუშვა, რომლებიც წყალში ჩადების შემდეგ ფერს იცვლიან.

ლოლის სიურპრიზის ერთ-ერთი უახლესი თოჯინა კი წყალში ჩასმის შემდეგ ტანსაცმლით იმოსება. მთავარი პრობლემა იმაში მდგომარეობს, რომ თოჯინის ტანსაცმელი ქალის სექსუალური თეთრეულის ანალოგია.

მშობლების უდიდესი ნაწილი ლოლის თოჯინის ახალ ტანსაცმელს პროტესტს უცხადებს. ისინი თვლიან, რომ მცირეწლოვანი ბავშვებისთვის მსგავს ტანსაცმელში გამოწყობილი თოჯინით თამაში შეუფერებელი და სახიფათოა.

მშობლების დიდი ნაწილი თოჯინის მეტისმეტად გამოკვეთილ ანატომიურ აგებულებასაც იწუნებს და ამბობს, რომ აღნიშნული თოჯინა მცირეწლოვანი ბავშვებისთვის შესაფერისი არ არის. სოციალური მედია აღშფოთებული მშობლების კომენტარებმა მოიცვა. ისინი აცხადებენ, რომ აღნიშნული ბრენდის თოჯინებს არასდროს შეიძენენ და მას ბოიკოტს უცხადებენ.

მომზადებულია ​moms.com - ის მიხედვით

თარგმნა ია ნაროუშვილმა 


არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

შეიძლება დაინტერესდეთ

,,ბავშვების ჯანჯღარით, ზედმეტი რწევით დაძინება აბსოლუტურად მიუღებელია''

,,ბავშვების ჯანჯღარით, ზედმეტი რწევით დაძინება აბსოლუტურად მიუღებელია''
რა უარყოფით ზეგავლენას ახდენს ბავშვზე ჯანჯღარით დაძინება და როგორი უნდა იყოს ძილის წინა რუტინა, რათა ბავშვს სწორი ძილის რეჟიმი ჩამოუყალიბდეს? - ამ თემაზე ​MomsEdu.ge-ს ესაუბრა ბავშვთა ნევროლოგი ნინო თარხნიშვილი.

- ქალბატონო ნინო, ხშირად მშობლები პატარებს ჯანჯღარით აძინებენ, რამდენად მიზანშეწონილია ეს ბავშვის ჯანმრთელობისთვის?

- ბავშვების ჯანჯღარით, ზედმეტი რწევით დაძინება აბსოლუტურად მიუღებელია, განსაკუთრებით ჩვილ ბავშვთა ასაკში. აღნიშნულ ასაკში კისრის კუნთები სუსტია, ხოლო თავის ტვინი მყიფე. თუ ბავშვი ძლიერად ირყევა, მყიფე ტვინი იწყებს წინ და უკან მოძრაობას თავის ქალის შიგნით, რაც იწვევს სისხლჩაქცევის განვითარებას - ეს მდგომარეობა ცნობილია ე.წ. ნანჯღრევი ბავშვის სინდრომის სახელწოდებით ( Shaken baby syndrome). სამწუხაროდ, აღნიშნული მოქმედება ხორციელდება მშობლების ან/და აღმზრდელების მიერ, როდესაც ცდილობენ მტირალი ბავშვის გაჩუმებას და რეალურად წარმოადგენს ძალადობის ფაქტს. ამ ტიპის დაზიანება ვითარდება არა მხოლოდ მიზანმიმართული ნჯღრევა-რყევით, არამედ თავის დარტყმით ან მიჯახებით რაიმე მყარ ზედაპირზე. 6 თვემდე ასაკის ბავშვებში ტიპიურად ვითარდება სუბდურული ან/და სუბარაქნოიდული ჰემატომა და ბილატერალური რეტინული ჰემორაგია, შესაძლებელია თანხლებული იყოს სხვადასხვა ლულოვანი ძვლების მოტეხილობით.

- შესაძლოა თუ არა ჯანჯღარით დაძინებამ შეაფერხოს ბავშვის სწორი განვითარება და რაიმე დაუზიანოს?

- მშობლებს და აღმზრდელებს აუცილებლად უნდა ახსოვდეთ, რომ თუნდაც მცირე რყევამ შეიძლება გამოიწვიოს თავის ტვინის შეუქცევადი დაზიანება, შესაძლებელია ფატალური გამოსავალიც - ლეტალობა საშუალოდ 20-25 %-ია. ბავშვებს შესაძლებელია განუვითარდეთ ნაწილობრივი ან სრული სიბრმავე, ლეთარგია, აგზნება, რესპირაციული პრობლემები, ცნობიერების დათრგუნვა. საბოლოო გამოსავალი დამოკიდებულია ტვინის დაზიანების ხარისხზე და შემდგომში შესაძლებელია გამოიხატოს განვითარების შეფერხება, დასწავლისა და ქცევის პრობლემები, ეპილეფსიური გულყრები, მძიმე უნარშეზღუდულობა/ცერებრული დამბლა, ჰიდროცეფალია, სმენის დაკარგვა.

სასიცოცხლოდ მნიშვნელოვანია აღნიშნული საკითხის შესახებ ინფორმაციის ფართოდ გავრცელება, განსაკუთრებით ახალგაზრდა მშობლებმა აუცილებლად უნდა იცოდნენ ბავშვის ძლიერი რყევის რისკებისა და საფრთხის შესახებ.

- ეტლით რწევაზე რომ ვისაუბროთ...

- რაც შეეხება ძილის დროს ეტლით რწევას, მსუბუქი რწევა დასაშვებია, თუმცა აუცილებლად უნდა გვახსოვდეს რისკების შესახებ. ძილის სწორი რეჟიმის ჩამოყალიბება ძალიან მნიშვნელოვანია, განვახორციელოთ ჩვილობის ასაკიდან და შევეცადოთ მივაჩვიოთ თანდათანობით დამოუკიდებლად დაძინებას, ძილის შებრუნებას. სასურველია ძილის განრიგი იყოს რეგულარული, დავნერგოთ ე.წ. ძილის რუტინა - თანმიმდევრული მოქმედებები, ძილის წინა პერიოდში.

  • 6 თვის ასაკიდან უნდა შევეცადოთ კვება ამოვიღოთ ძილის წინ რუტინული აქტივობებიდან;
  • საძინებელში უნდა იყოს ხელსაყრელი გარემო - სუსტი სინათლე, სიგრილე, სიმშვიდე;
  • ბავშვი დასაძინებლად უნდა დაწვეს მაშინ, როდესაც ეძინება, მაგრამ ფხიზელ მდგომარეობაში;
  • შევეცადოთ ბავშვმა დამოუკიდებლად დაიძინოს;
  • საჭიროა დილით დღის სინათლის შეღწევადობა საძინებელ ოთახში;
  • თუ მშობლისთვის რთულია ბავშვის ტირილისა და პროტესტის მიმართ იყოს ტოლერანტული, თანდათან უნდა შეაჩვიოს ბავშვი დამოუკიდებლად დაძინებას;
  • საჭიროების შემთხვევაში შესაძლებელია ფსიქოლოგის ჩართულობაც.

ესაუბრა მარიამ ჩოქური


წაიკითხეთ სრულად