Baby Bag

რა არის პოზიტიური ყურადღება და რატომ არის ის ბავშვისთვის მნიშვნელოვანი?

რა არის პოზიტიური ყურადღება და რატომ არის ის ბავშვისთვის მნიშვნელოვანი?

მშობელი შვილისადმი პოზიტიურ დამოკიდებულას სხვადასხვა ფორმით გამოხატავს. ის შვილს უღიმის, ნაზად უყურებს თვალებში, ეფერება, მას სასიამოვნო, დადებითი სიტყვებით ამხნევებს, მისი იდეების, აქტივობებისა და ინტერესების მიმართ აღტაცებას ვერ მალავს.

პოზიტიური ყურადღება ბავშვს ძალიან სჭირდება. მისთვის მნიშვნელოვანია, რომ თავს საჭირო ადამიანად გრძნობდეს. ბავშვი უნდა გრძნობდეს, რომ მას სხვებისთვის სიხარული და ბედნიერება მოაქვს. მშობლების მხრიდან გამოჩენილი პოზიტიური ყურადღება, დადებითი რეაქციები და დამოკიდებულებები ბავშვს თავს დაფასებულ, სრულფასოვან ადამიანად აგრძნობინებს.

ბავშვი საკუთარი თავის შესახებ წარმოდგენას წლების განმავლობაში იქმნის. ყველაფერი იმაზეა დამოკიდებული, თუ როგორ ექცევიან მას მშობლები და ის უფროსები, რომლებიც მისთვის მნიშვნელოვანი ადამიანები არიან. იმისთვის, რომ თქვენმა შვილმა თავი უსაფრთხოდ იგრძნოს, მისი შიშები ყოველთვის სათანადო არგუმენტების დახმარებით უნდა დაამარცხოთ, მას ახალ გარემოსთან ადაპტაციაში უნდა დაეხმაროთ და ყოველთვის მის გვერდით იყოთ, როდესაც ეს სჭირდება.

ყოველდღიური აქტივობების დროს მშობელსა და შვილს შორის ძლიერი ურთიერთკავშირი მყარდება. საფენის გამოცვლისას, კვების პროცესში ან ბავშვის სკოლაში წაყვანისას, თქვენ ბავშვს განსაკუთრებული ყურადღება უნდა დაუთმოთ. როდესაც ბანაობის შემდეგ ბავშვს პირსახოცით ამშრალებთ, მისი კოცნა და მოფერება პატარასთვის პოზიტიური გამოცდილებაა. ის გრძნობს, რომ მშობელი მისთვის ყველაფერს სიყვარულით აკეთებს.

ბავშვის ასაკს მნიშვნელობა არ აქვს. მის მიმართ სიყვარულისა და სითბოს გამოსახატად, შეგიძლიათ შემდეგი რეკომენდაციებით იხელმძღვანელოთ:

  • ბავშვს რაც შეიძლება ხშირად გაუღიმეთ.
  • გამოიჩინეთ ინტერესი ყველაფრისადმი, რასაც თქვენი შვილი აკეთებს.
  • ბავშვის საუბარს ყურადღებით და ინტერესით მოუსმინეთ.
  • შვილთან ერთად გარკვეული რიტუალები ჩამოაყალიბეთ.

პოზიტიური ყურადღების გამოხატვის სხვადასხვა გზა არსებობს, რომლებიც ბავშვის ასაკის მატებასთან ერთად იცვლება.

პოზიტიური ყურადღების გამოხატვა ჩვილი ბავშვებისადმი

ბავშვი დაბადებიდანვე გრძნობს, თუ რა დამოკიდებულება გაქვთ მისდამი, რას აკეთებთ და როგორ იქცევით. მართალია, ჩვილებს თქვენ მიერ ნათქვამი სიტყვების მნიშვნელობა არ ესმით, მაგრამ ისინი თქვენი საუბრის ტონს, მიმიკებს და ქცევებს ყურადღებით აკვირდებიან.

  • ატირებულ ბავშვს განსაკუთრებული ყურადღება მიაქციეთ, რათა დამშვიდდეს.
  • ჩვილის ღიმილს ყოველთვის ღიმილით უპასუხეთ.
  • ჩვილს ხშირად ესაუბრეთ.
  • ახალშობილს თქვენი გრძნობები ხშირად გაუმხილეთ.
  • ყურადღება მიაქციეთ, რა აინტერესებს ჩვილს. თუ მას ფერადი სათამაშო მიიზიდავს, ასწავლეთ, როგორ უნდა დაიჭიროს ის ხელში.

პოზიტიური ყურადღების გამოვლენა 1-3 წლამდე ასაკის ბავშვების მიმართ

ბავშვი ასაკის მატებასთან ერთად უკეთ იგებს, თუ რას ეუბნებით ან როგორ ეუბნებით.

  • ყოველთვის აღნიშნეთ თქვენი შვილის მოსაწონი ქცევა. აუხსენით ბავშვს, რომ ძალიან მოგწონთ, როდესაც ის კუბიკებით თამაშობს.
  • ბავშვის განცდების გაზიარება სცადეთ. მასთან ერთად იხტუნავეთ და ითამაშეთ.
  • როდესაც ბავშვს ესაუბრებით, მას პასუხის გაცემის შესაძლებლობა მიეცით. მაშინაც კი, თუ ბავშვს არ შეუძლია სრულფასოვნად საუბარი.

პოზიტიური ყურადღების გამოხატვა სკოლამდელი ასაკის ბავშვისადმი

სკოლამდელი ასაკის ბავშვისადმი პოზიტიური დამოკიდებულების გამოვლენა ძალიან ბევრი ფორმით შეგიძლიათ.

  • ბავშვისთვის საყვარელი აქტივობებით მასთან ერთად დაკავდით, კუბიკებით ითამაშეთ, ირბინეთ, ერთად დახატეთ ან იმღერეთ.
  • ბავშვის პოზიტიური ქცევა აუცილებლად წაახალისეთ. თუ თქვენი შვილი სადილის შემდეგ თეფშს ონკანში ჩადებს, შეაქეთ და უთხარით, რომ ის ძალიან გეხმარებათ.
  • დილით გაღვიძებისას ბავშვს ღიმილით შეეგებეთ, მას თვალებში უყურეთ და მოეფერეთ.

პოზიტიური ყურადღების გამოხატვა სკოლის ასაკის ბავშვისადმი

მართალია, სკოლაში წასვლის შემდეგ ბავშვის ცხოვრება უფრო მრავალფეროვანი ხდება, მაგრამ თქვენი სითბო, მოფერება და ყურადღება მისთვის ძალიან მნიშვნელოვანია.

  • როდესაც ბავშვს თქვენთან საუბარი სურს, მიატოვეთ საქმე, რომელსაც აკეთებთ და თქვენს შვილს მოუსმინეთ. შესაძლოა, სკოლის ამბების მოყოლა მან სახლში დაბრუნებისთანავე არ მოისურვოს და ამის შესახებ ძილის წინ გიამბოთ. ბავშვის ამბების მოსასმენად დრო ყოველთვის უნდა გამონახოთ.
  • როდესაც ბავშვი გესაუბრებათ, მას კითხვები დაუსვით, რათა თქვენი ინტერესი გამოხატოთ და საუბარი გამოაცოცხლოთ.
  • ბავშვის პოზიტიური ქცევები წაახალისეთ. შეაქეთ ის, თუ მან მეგობრისადმი ყურადღება და ემპათია გამოავლინა.

ყოველთვის პოზიტიურ განწყობაზე ვერ იქნებით და ეს სავსებით ნორმალურია. მთავარია, რომ ბავშვმა თქვენგან უმეტესად სითბო და სიყვარული იგრძნოს. თუ მშობელს ბავშვისთვის დრო არასდროს აქვს, ეს ბავშვზე ნეგატიურ ზეგავლენას ახდენს. ბავშვი მშობლის უყურადღებობას ადრეული ასაკიდანვე გრძნობს. ჩვილები სტრესის ნიშნებს ექვსი თვის ასაკიდან ავლენენ, როდესაც მშობლის ყურადღება აკლდებათ. მშობლის უყურადღებობა ბავშვის ჯანმრთელობასა და კეთილდღეობას უდიდეს ზიანს აყენებს.

მომზადებულია ​raisingchildren.net.au - ს მიხედვით

თარგმნა ია ნაროუშვილმა 

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

შეიძლება დაინტერესდეთ

„ბავშვს ზღვიდან ამოსვლის შემდეგ ერთხელ მაინც აუცილებლად უნდა გადავავლოთ წყალი,“ - პედიატრი თემურ მიქელაძე

„ბავშვს ზღვიდან ამოსვლის შემდეგ ერთხელ მაინც აუცილებლად უნდა გადავავლოთ წყალი,“ - პედიატრი თემურ მიქელაძე

პედიატრმა თემურ მიქელაძემ ზაფხულში ბავშვთა და მოზარდთა ჰიგიენის წესების შესახებ ისაუბრა, რომლებიც აუცილებლად უნდა დავიცვათ. მან აღნიშნა, რომ კანის გამოშრობის თავიდან ასაცილებლად, ბავშვები სითხეებით უნდა დავტვირთოთ:

„მაღალი ტემპერატურის დროს, როდესაც ​ბავშვები მიდიან ზღვის კურორტებზე, კანი შეიძლება გამოშრეს. ეს შეიძლება მოხდეს მთაშიც, რა თქმა უნდა. ექიმებმა მშობლებს რეკომენდაცია უნდა მივცეთ სითხეებით დატვირთვით დავატენიანოთ თუ ზოგ შემთხვევაში გამოვიყენოთ დამატენიანებელი. ზაფხულის პერიოდში ჩვენ დამატენიანებელ საშუალებებს ვერიდებით. პირველ რიგში, არის მაინც გარუჯვა. გარუჯვისთვის აუცილებელია ბავშვები დავიცვათ პირდაპირი მოქმედების მზის სხივებისგან. აუცილებელია სპეციალური დამცავი საშუალებების გამოყენება, განსაკუთრებით იმ ბავშვებში, რომლებსაც ჭრელი აქვთ კანი, უფრო მეტად თეთრები არიან.“

თემურ მიქელაძის თქმით, მოუვლელი კანი მარტივად შეიძლება დაინფიცირდეს:

„თუ კანი არ იქნა მოვლილი, შეიძლება ის დაინფიცირდეს. იყოს სხვადასხვა ჩირქოვანი ინფექციების, სტაფილო ან სტრეპტოდერმების წყარო, რომელთა მომართვიანობა, როგორც წესი, ზაფხულის პერიოდში იზრდება. კანის გამონაყარი მაინც ასოცირდება ზღვის კურორტებთან ან მტკნარი წყლის კურორტებთან. აქ აუცილებელია, რომ ეს სანაპიროები მაქსიმალურად იყოს მოვლილი.“

თემურ მიქელაძემ აღნიშნა, რომ დაბინძურებული ზღვის სანაპიროები ხშირად ხდება ენტეროვირუსებითა და ნაწლავთა ვირუსული ინფექციებით დაავადების მიზეზი:

„ბოლო პერიოდში საქართველოში ზღვის სანაპიროები უკვე მოვლილი ხდება. 5-10 წლის წინ იყო კატასტროფული მდგომარეობა. სანაპიროზე იყო ფეკალიები, ბავშვის საფენები. ხანდახან ეს ახლაც არის, რა თქმა უნდა. ​განსაკუთრებით ეს ეხება ურეკის სანაპიროს. სწორედ აქედან მოდიან პაციენტები ნაწლავთა ვირუსული ინფექციებით, ენტეროვირუსული ინფექციებით, კანის ჩირქოვანი დაზიანებებით. კანის ჩირქოვანი დაზიანების ძირითადი გამომწვევი სტრეპტოკოკია. სტრეპტოკოკმა შეიძლება დააზიანოს თირკმელები, გული, ნუშურა ჯირკვლები.“

„კიდევ ერთხელ ვიმეორებ, რომ აუცილებელია პირადი ჰიგიენური ნორმების დაცვა ასეთ კურორტებზე. ბავშვს ზღვიდან ამოსვლის შემდეგ ერთხელ მაინც აუცილებლად უნდა გადავავლოთ წყალი. ​ხშირად უნდა იბანაოს ბავშვმა ზაფხულის პერიოდში, დილას ან საღამოს მაინც გამდინარე წყლით და არა რეზერვუარში დაგროვილი წყლით. ბავშვს უნდა გადავავლოთ თბილი წყალი. არც ცხელი და არც უკიდურესად ცივი არ უნდა იყოს წყალი,“ - აღნიშნულ საკითხებზე თემურ მიქელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

წაიკითხეთ სრულად