Baby Bag

რა არის პოზიტიური ყურადღება და რატომ არის ის ბავშვისთვის მნიშვნელოვანი?

რა არის პოზიტიური ყურადღება და რატომ არის ის ბავშვისთვის მნიშვნელოვანი?

მშობელი შვილისადმი პოზიტიურ დამოკიდებულას სხვადასხვა ფორმით გამოხატავს. ის შვილს უღიმის, ნაზად უყურებს თვალებში, ეფერება, მას სასიამოვნო, დადებითი სიტყვებით ამხნევებს, მისი იდეების, აქტივობებისა და ინტერესების მიმართ აღტაცებას ვერ მალავს.

პოზიტიური ყურადღება ბავშვს ძალიან სჭირდება. მისთვის მნიშვნელოვანია, რომ თავს საჭირო ადამიანად გრძნობდეს. ბავშვი უნდა გრძნობდეს, რომ მას სხვებისთვის სიხარული და ბედნიერება მოაქვს. მშობლების მხრიდან გამოჩენილი პოზიტიური ყურადღება, დადებითი რეაქციები და დამოკიდებულებები ბავშვს თავს დაფასებულ, სრულფასოვან ადამიანად აგრძნობინებს.

ბავშვი საკუთარი თავის შესახებ წარმოდგენას წლების განმავლობაში იქმნის. ყველაფერი იმაზეა დამოკიდებული, თუ როგორ ექცევიან მას მშობლები და ის უფროსები, რომლებიც მისთვის მნიშვნელოვანი ადამიანები არიან. იმისთვის, რომ თქვენმა შვილმა თავი უსაფრთხოდ იგრძნოს, მისი შიშები ყოველთვის სათანადო არგუმენტების დახმარებით უნდა დაამარცხოთ, მას ახალ გარემოსთან ადაპტაციაში უნდა დაეხმაროთ და ყოველთვის მის გვერდით იყოთ, როდესაც ეს სჭირდება.

ყოველდღიური აქტივობების დროს მშობელსა და შვილს შორის ძლიერი ურთიერთკავშირი მყარდება. საფენის გამოცვლისას, კვების პროცესში ან ბავშვის სკოლაში წაყვანისას, თქვენ ბავშვს განსაკუთრებული ყურადღება უნდა დაუთმოთ. როდესაც ბანაობის შემდეგ ბავშვს პირსახოცით ამშრალებთ, მისი კოცნა და მოფერება პატარასთვის პოზიტიური გამოცდილებაა. ის გრძნობს, რომ მშობელი მისთვის ყველაფერს სიყვარულით აკეთებს.

ბავშვის ასაკს მნიშვნელობა არ აქვს. მის მიმართ სიყვარულისა და სითბოს გამოსახატად, შეგიძლიათ შემდეგი რეკომენდაციებით იხელმძღვანელოთ:

  • ბავშვს რაც შეიძლება ხშირად გაუღიმეთ.
  • გამოიჩინეთ ინტერესი ყველაფრისადმი, რასაც თქვენი შვილი აკეთებს.
  • ბავშვის საუბარს ყურადღებით და ინტერესით მოუსმინეთ.
  • შვილთან ერთად გარკვეული რიტუალები ჩამოაყალიბეთ.

პოზიტიური ყურადღების გამოხატვის სხვადასხვა გზა არსებობს, რომლებიც ბავშვის ასაკის მატებასთან ერთად იცვლება.

პოზიტიური ყურადღების გამოხატვა ჩვილი ბავშვებისადმი

ბავშვი დაბადებიდანვე გრძნობს, თუ რა დამოკიდებულება გაქვთ მისდამი, რას აკეთებთ და როგორ იქცევით. მართალია, ჩვილებს თქვენ მიერ ნათქვამი სიტყვების მნიშვნელობა არ ესმით, მაგრამ ისინი თქვენი საუბრის ტონს, მიმიკებს და ქცევებს ყურადღებით აკვირდებიან.

  • ატირებულ ბავშვს განსაკუთრებული ყურადღება მიაქციეთ, რათა დამშვიდდეს.
  • ჩვილის ღიმილს ყოველთვის ღიმილით უპასუხეთ.
  • ჩვილს ხშირად ესაუბრეთ.
  • ახალშობილს თქვენი გრძნობები ხშირად გაუმხილეთ.
  • ყურადღება მიაქციეთ, რა აინტერესებს ჩვილს. თუ მას ფერადი სათამაშო მიიზიდავს, ასწავლეთ, როგორ უნდა დაიჭიროს ის ხელში.

პოზიტიური ყურადღების გამოვლენა 1-3 წლამდე ასაკის ბავშვების მიმართ

ბავშვი ასაკის მატებასთან ერთად უკეთ იგებს, თუ რას ეუბნებით ან როგორ ეუბნებით.

  • ყოველთვის აღნიშნეთ თქვენი შვილის მოსაწონი ქცევა. აუხსენით ბავშვს, რომ ძალიან მოგწონთ, როდესაც ის კუბიკებით თამაშობს.
  • ბავშვის განცდების გაზიარება სცადეთ. მასთან ერთად იხტუნავეთ და ითამაშეთ.
  • როდესაც ბავშვს ესაუბრებით, მას პასუხის გაცემის შესაძლებლობა მიეცით. მაშინაც კი, თუ ბავშვს არ შეუძლია სრულფასოვნად საუბარი.

პოზიტიური ყურადღების გამოხატვა სკოლამდელი ასაკის ბავშვისადმი

სკოლამდელი ასაკის ბავშვისადმი პოზიტიური დამოკიდებულების გამოვლენა ძალიან ბევრი ფორმით შეგიძლიათ.

  • ბავშვისთვის საყვარელი აქტივობებით მასთან ერთად დაკავდით, კუბიკებით ითამაშეთ, ირბინეთ, ერთად დახატეთ ან იმღერეთ.
  • ბავშვის პოზიტიური ქცევა აუცილებლად წაახალისეთ. თუ თქვენი შვილი სადილის შემდეგ თეფშს ონკანში ჩადებს, შეაქეთ და უთხარით, რომ ის ძალიან გეხმარებათ.
  • დილით გაღვიძებისას ბავშვს ღიმილით შეეგებეთ, მას თვალებში უყურეთ და მოეფერეთ.

პოზიტიური ყურადღების გამოხატვა სკოლის ასაკის ბავშვისადმი

მართალია, სკოლაში წასვლის შემდეგ ბავშვის ცხოვრება უფრო მრავალფეროვანი ხდება, მაგრამ თქვენი სითბო, მოფერება და ყურადღება მისთვის ძალიან მნიშვნელოვანია.

  • როდესაც ბავშვს თქვენთან საუბარი სურს, მიატოვეთ საქმე, რომელსაც აკეთებთ და თქვენს შვილს მოუსმინეთ. შესაძლოა, სკოლის ამბების მოყოლა მან სახლში დაბრუნებისთანავე არ მოისურვოს და ამის შესახებ ძილის წინ გიამბოთ. ბავშვის ამბების მოსასმენად დრო ყოველთვის უნდა გამონახოთ.
  • როდესაც ბავშვი გესაუბრებათ, მას კითხვები დაუსვით, რათა თქვენი ინტერესი გამოხატოთ და საუბარი გამოაცოცხლოთ.
  • ბავშვის პოზიტიური ქცევები წაახალისეთ. შეაქეთ ის, თუ მან მეგობრისადმი ყურადღება და ემპათია გამოავლინა.

ყოველთვის პოზიტიურ განწყობაზე ვერ იქნებით და ეს სავსებით ნორმალურია. მთავარია, რომ ბავშვმა თქვენგან უმეტესად სითბო და სიყვარული იგრძნოს. თუ მშობელს ბავშვისთვის დრო არასდროს აქვს, ეს ბავშვზე ნეგატიურ ზეგავლენას ახდენს. ბავშვი მშობლის უყურადღებობას ადრეული ასაკიდანვე გრძნობს. ჩვილები სტრესის ნიშნებს ექვსი თვის ასაკიდან ავლენენ, როდესაც მშობლის ყურადღება აკლდებათ. მშობლის უყურადღებობა ბავშვის ჯანმრთელობასა და კეთილდღეობას უდიდეს ზიანს აყენებს.

მომზადებულია ​raisingchildren.net.au - ს მიხედვით

თარგმნა ია ნაროუშვილმა 

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

შეიძლება დაინტერესდეთ

6 მიზეზი, რის გამოც მოსიყვარულე მამები გონიერ შვილებს ზრდიან

6 მიზეზი, რის გამოც მოსიყვარულე მამები გონიერ შვილებს ზრდიან

მამებს, განსაკუთრებით კი მოსიყვარულე მამებს, შვილების ბედნიერების ხარისხზე უდიდესი გავლენის მოხდენა შეუძლიათ. მამასთან ერთად ცელქობა, ხმამაღლა სიცილი და თამაში ბავშვს არამხოლოდ ბედნიერებას ანიჭებს, არამედ მას გონიერ ადამიანადაც აყალიბებს.

  • მზრუნველი მამების შვილებს მაღალი IQ აქვთ

კონკორდიის უნივერსიტეტში ჩატარებული კვლევის თანახმად მამები ბავშვის კოგნიტურ და ქცევით განვითარებაზე მნიშვნელოვან გავლენას ახდენენ. კვლევაში მონაწილე ​ბავშვებს, რომლებსაც მზრუნველი და თბილი მამაები ჰყავდათ მაღალი ინტელექტის კოეფიციენტი ჰქონდათ. ამასთან მოსიყვარულე მამების ქალიშვილებს ფსიქოლოგიური და ქცევითი პრობლემები ნაკლებად აღენიშნებოდათ.

  • მოსიყვარულე მამების ქალიშვილები ჭკვიანები და აზარტულები არიან

მამები ქალიშვილების პროფესიულ არჩევანზეც დიდ გავლენას ახდენენ. მოსიყვარულე მამა ქალიშვილს სტიმულს აძლევს, რომ მან მაღალანაზღაურებად სამსახურში დაიწყოს მუშაობა. კვლევებით დგინდება, რომ გოგონები, რომლებსაც მზრუნველი მამები ჰყავთ, თამამად ირჩევენ იმ პროფესიებს, რომლებშიც მამაკაცები დომინირებენ. პროფესიონალი ათლეტი ქალები ხშირად გამოხატავენ მადლიერებას მამებისადმი, რომლებიც მათ მხარდაჭერას უცხადებდნენ და სტიმულს აძლევდნენ.

  • მზრუნველი მამების ვაჟები კრიმინალებისგან დისტანცირებულები არიან

მამები ვაჟიშვილების იდენტობის ჩამოყალიბებაში უდიდეს როლს ასრულებენ. კვლევებით დგინდება, რომ ​უმამოდ გაზრდილ ბიჭებს კრიმინალებად ჩამოყალიბების 3-ჯერ მეტი რისკი აქვთ.

  • მოსიყვარულე მამების შვილებს არაჯანსაღი მიჯაჭვულობის პრობლემა ნაკლებად აწუხებთ

ნარკოდამოკიდებული ადამიანების დიდი ნაწილი უმამო ოჯახში იზრდება, რაც კვლევებითაც დასტურდება. მზრუნველი მამები შვილებს არაჯანსაღი დამოკიდებულებების პრობლემებისგან იცავენ.

  • მზრუნველი მამების შვილებს მაღალი ემოციური ინტელექტი აქვთ

​მამასთან ერთად ცელქობა ბავშვისთვის უდიდესი სარგებლის მომტანია. სიცილი, ჟრიამული და ხმაური ბავშვს ემოციური ინტელექტის განვითარებაში ეხმარება. მამასთან ერთად მხიარულება და გართობა, რომელსაც რეგულარული ხასიათი აქვს, ბავშვს ემოციების რეგულაციასა და კონტროლში ეხმარება.

  • მოსიყვარულე მამების შვილებს მაღალი თვითშეფასება აქვთ

თავდაჯერებული მამები, რომლებიც შვილებზე ზრუნავენ, მათ კეთილდღეობაზე დადებითად ზემოქმედებენ. ბავშვები, რომლებსაც მამებთან თბილი დამოკიდებულება აქვთ, თავდაჯერებულ ადამიანებად ყალიბდებიან. მოსიყვარულე და მზრუნველი მამა კეთილი მეგობრის როლს ასრულებს, რომელიც შვილებს სწორ მიმართულებას უჩვენებს და მათ დასახმარებლად ყოველთვის მზად არის.

მომზადებულია ​brightside.me- ს მიხედვით

წაიკითხეთ სრულად