Baby Bag

საქართველოში პირველად, მაღალტექნოლოგიური 3D ფიქსატორი „ნიუ ჰოსპიტალსშია“

საქართველოში პირველად, მაღალტექნოლოგიური 3D ფიქსატორი „ნიუ ჰოსპიტალსშია“

„ნიუ ჰოსპიტალსის“ ორთოპედიისა და ტრავმატოლოგიის ცენტრში პოსტ ტრავმული მკურნალობის ულტრათანამედროვე მეთოდი - 3D ფიქსატორი დაინერგა.

მაღალტექნოლოგიური 3D ფიქსატორი გამოიყენება მოტეხილობების, ამოვარდნილობების, კუნთების და მყესების დაზიანების, ასევე პოსტ ოპერაციული ან თერაპიული მკურნალობისთვის. იგი რიგ შემთხვევებში ანაცვლებს თაბაშირს და მკურნალობის პროცესს უფრო მოსახერხებელს ხდის ბავშვებისა და მოზრდილებისთვის.

თანამედროვე ფიქსატორის დანიშნულება სხეულის დაზიანებული ნაწილის სასურველ პოზიციაში დაფიქსირება, ტკივილის შემცირება და კუნთების სტაბილიზაციის ხელშეწყობაა. მისი გამოყენება, ტრადიციულ საშუალებებთან შედარებით, ზრდის მკურნალობის ეფექტურობას და აღდგენით პროცესს 15-20% აჩქარებს.

3D ფიქსატორის დიზაინი შემუშავებულია ესთეტიური ფაქტორის გათვალისნებით და უზრუნველყოფს პაციენტის გამოცდილებისა და ცხოვრების ხარისხის გაუმჯობესებას. 3D ფიქსატორი საკმაოდ მსუბუქია, რაც ამცირებს იმობილიზაციის საშუალებებთან დაკავშირებულ დისკომფორტს და მის გამოყენებას უფრო მოსახერხებელს ხდის. მისი ღიობები იმეორებს კიდურების ორგანულ ფორმებს და ამცირებს კანის გაღიზიანების ან ტკივილის რისკებს. მას არ გააჩნია წყალში გამოყენების შეზღუდვა, რაც შესაძლებელს ხდის წყალთან ნებისმიერი ტიპის შეხებას.

3D ფიქსატორის დამზადების პროცესი თითოეული პაციენტისთვის ინდივიდუალური, მარტივი და სრულად ავტომატიზებულია - რამდენიმე წუთში ხდება სხეულის დაზიანებული ნაწილის 100%-მდე სიზუსტით სკანირება და 3D ბეჭდვის ტექნოლოგიის გამოყენებით პერსონალური ფიქსატორის დამზადება.

3D ფიქსატორი პაციენტების მკურნალობისთვის გამოიყენება „მეიოს კლინიკასა“ და მსოფლიოს სხვა წამყვან სამედიცინო დაწესებულებებში. მისი წარმოების სრულ ჯაჭვს გააჩნია ISO ბიოთავსებადობის სტანდარტი. ასევე, სერტიფიცირებულია ევროპისა და აშშ-ის ორგანოების - Conformité Européenne (CE) და U.S. Food and Drug Administration (FDA) მიერ.

„ნიუ ჰოსპიტალსი“ ევროპული სტანდარტების მქონე, მრავალპროფილური სამედიცინო დაწესებულებაა, რომლის მიზანი უახლესი ტექნოლოგიების დანერგვა, მაღალკვალიფიციური სამედიცინო გუნდის მუდმივი განვითარება და ინოვაციური სერვისების მიწოდებაა, რათა ხელმისაწვდომი გახადოს თანამედროვე, მტკიცებულებებზე დაფუძნებული მედიცინა.

R.

შეიძლება დაინტერესდეთ

​5 საუკეთესო პროდუქტი გრიპისა და გაციების წინააღმდეგ

​5 საუკეთესო პროდუქტი გრიპისა და გაციების წინააღმდეგ
მშობლები ძალიან ღელავენ, როდესაც შვილებს გრიპის ან გაციების არასასიამოვნო სიმპტომებს ​შენიშნავენ. ბავშვის იმუნური სისტემის გაძლიერებაზე ზრუნვა მსგავსი უსიამოვნებების თავიდან აცილებაში დაგეხმარებათ. აუცილებელია პატარებს ხშირად მიაწოდოთ ისეთი საკვები პროდუქტები ან სითხეები, რომლებიც მათ გრიპისა და გაციების დამარცხებაში შეუწყობს ხელს, გარდა ამისა სწორი კვებით სეზონური ვირუსებისა და გრიპების პრევენციაც არის შესაძლებელი.

სოლიდური ძილის რეჟიმი და ჯანსაღი კვება ძლიერი იმუნური სისტემის მთავარ ქვაკუთხედს წარმოადგენს. გთავაზობთ იმ საკვები პროდუქტების ჩამონათვალს, რომელთა მირთმევა ბავშვებს გრიპისა და გაციების სწრაფად დამარცხებაში დაეხმარება.

იოგურტი

ბავშვის ორგანიზმი პრობიოტიკებით რეგულარულად უნდა მოამარაგოთ. პრობიოტიკი სასარგებლო ბაქტერიაა, რომელიც იმუნურ სისტემას აძლიერებს. ის მავნე მიკროორგანიზმებსა და ვირუსებს ორგანიზმიდან გამოდევნის და ნაწლავური ფლორის სიჯანსაღეს იცავს. იოგურტი და კეფირი ბავშვებისთვის ძალიან სასარგებლო პროდუქტთა რიცხვს მიეკუთვნება. თუ თქვენი შვილი მათ მიღებაზე კატეგორიულ უარს გიცხადებთ, დახმარებისთვის პედიატრს მიმართეთ. ის პრობიოტიკების ალტერნატიულ წყაროს შემოგთავაზებთ.

ტკბილი კარტოფილი

ტკბილი კარტოფილი გარდა იმისა, რომ საკვებად გემრიელია, დიდი რაოდენობით ვიტამინ A-საც შეიცავს, რომელიც თავის მხრივ, პირის ღრუს, სასუნთქი გზებისა და კუჭ-ნაწლავის ტრაქტის ჯანმრთელობისთვის უმნიშვნელოვანესი ვიტამინია. ნახევარი ფინჯანი ტკბილი კარტოფილი ბავშვისთვის საჭირო ვიტამინ A-ს დღიურ დოზას შეიცავს. ვიტამინ A-ს მაღალი შემცველობით გამოირჩევა შემდეგი პროდუქტებიც: სტაფილო, წითელი წიწაკა, მანგო და ატმის ჩირი.

ღორის და საქონლის ხორცი

ხორცი დიდი რაოდენობით ცილას შეიცავს. პროტეინს იმუნური სისტემის სიჯანსაღეზე უდიდესი გავლენის მოხდენის უნარი აქვს. ღორისა და საქონლის ხორცი თუთიის საკმაოდ მაღალი შემცველობითაც გამოირჩევა. ეს უკანასკნელი კი ორგანიზმში ლიმფოციტების წარმოების პროცესს უწყობს ხელს, რომელიც თავის მხრივ იმუნური სისტემის გაჯანსაღებას უზრუნველყოფს. თუთიას დიდი რაოდენობით შეიცავს კეშიუ და თურქული ბარდაც.

ქათმის ბულიონი

ბებიები არ ცდებიან, როდესაც დაბეჯითებით ამბობენ, რომ ბულიონს დასუსტებული ორგანიზმის გაჯანსაღების საოცარი უნარი აქვს. კვლევებით დასტურდება, რომ ქათმის ბულიონის რესპირატორული ვირუსული ინფექციების დასამარცხებლად გამოყენება ძალიან ეფექტურია.

თბილი სითხეები

ადამიანთა უმრავლესობა ერთხმად აღნიშნავს, რომ გაციების ან ვირუსული ინფექციების დროს თბილი სითხეების მიღება მათი ორგანიზმის საერთო მდგომარეობას მნიშვნელოვნად აუმჯობესებს. სითხეების დახმარებით სურდოს, ყელის ტკივილის, სისუსტისა და თავბრუსხვევის დამარცხება შეგიძლიათ. პატარებისთვის სასარგებლო თბილი სითხის მოსამზადებლად უკოფეინო ჩაი და მცირედი თაფლი გამოიყენეთ. მალევე დარწმუნდებით, რომ ბავშვს ყელის ტკივილი და ხველება შეუმცირდება.


ზემოთ ჩამოთვლილი პროდუქტები ბავშვს არამხოლოდ გაციების ან გრიპის დროს, არამედ ჩვეულებრივ დღეებშიც უნდა მისცეთ, რათა იმუნური სისტემა გაუძლიეროთ. ძლიერი იმუნიტეტის დახმარებით გრიპისა და გაციების პრევენციას მარტივად შეძლებთ.

ავტორი: ია ნაროუშვილი
წაიკითხეთ სრულად