Baby Bag

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა, წელიწადში რამდენჯერ გაციება არის ნორმა და შეესაბამება თუ არა სიმართლეს მოსაზრება, რომ აცრა იწვევს აუტიზმს - ამ და სხვა აქტუალურ საკითხებზე ​MomsEdu.ge​-ს ცნობილი პედიატრი თემურ მიქელაძე  ესაუბრა.

- ბატონო თემურ, ვაქცინაციასთან დაკავშირებით საზოგადოების გარკვეულ ნაწილში კვლავ არსებობს მცდარი შეხედულება - აცრა იწვევს აუტიზმს და ა.შ.  რას ეტყოდით მშობლებს, რომლებიც არ ცრიან შვილებს?

- პირველ რიგში გეტყვით, რომ აცრა არ იწვევს აუტიზმს. ჩემი პირადი კონტროლის ქვეშ, 22 წლის განმავლობაში, გაკეთებულა დაახლოებით რამდენიმე ასეული ათასი დოზა ვაქცინებისა და არ დაფიქსირებულა არცერთი შემთხვევა, რომ ვაქცინას გამოეწვია აუტიზმი. მათ შორის, აუტიზმის მქონე ბავშვებიც ჩვეულებრივად იცრებიან. მქონია აუტიზმის მქონე ბავშვების შემთხვევებიც, რომლებიც საერთოდ არ არიან აცრილები.
 
მშობლებს ვეტყვი, რომ წითელას, დიფტერიის, ყივანახველის, ტეტანუსის და სხვა ინფექციების თავიდან ასაცილებლად აუცილებელია გეგმიური და დროული ვაქცინაცია. სახელმწიფოს შემოაქვს მაღალი ხარისხის ევროპული წარმოების ვაქცინები და მე პირადად, ვცრი ჩემს შვილებსაც. ჩვენ გვაქვს ერთ-ერთი ყველაზე სრულყოფილი გეგმიური ვაქცინაციის ეროვნული კალენდარი.

- საყოველთაო გრიპის აცრა რა ასაკიდან შეიძლება, გავუკეთოთ ბავშვს?

- გრიპის აცრა ბავშვს შეიძლება, ჩავუტაროთ 6 თვის ასაკიდან. გარდა ამისა, აცრა სასურველია, ჩაუტარდეს რისკ-ჯგუფის მქონე პაციენტებს. ესენია - 5 წლამდე ასაკის ხშირად მოავადე და სკოლამდელ დაწესებულებაში მყოფი ბავშვები, 65 წელს გადაცილებული ასაკის მქონე პირები, ორსულები, სამედიცინო პერსონალი, სხვადასხვა ქრონიკული პათოლოგიის მქონე პირები. 

გრიპის ვირუსს გააჩნია ანტიგენური სტრუქტურის სწრაფი ცვლილება ამიტომ ყოველ წელს კეთდება ახალი ანტიგენური სტრუქტურის ვაქცინები. აუცრელ პაციენტებს გრიპის ვირუსის დროს უმეტეს შემთხვევაში უტარდებათ სიმპტომური მკურნალობა. ზოგჯერ ჩვენ ვიყენებთ ანტივირუსულ პრეპარატებსაც.

- რას ურჩევდით მშობელს, რომლის შვილიც ბაღში დადის და ხშირად ავადობს, ვირუსების დროს ატაროს თუ არა ბავშვი ბაღში და წელიწადში რამდენჯერ გაციება არის ნორმა?

- აუცილებელია, განვმარტოთ რას ნიშნავს ხშირად ავადობა; 6 წლამდე ჯანმრთელმა ბავშვებმა წლის განმავლობაში შეიძლება, სხვადასხვა ვირუსული ინფექციებით იავადონ 6-10-მდე და ეს ნორმაა. ასაკის მატებასთან ერთად სიხშირე მცირდება და მოზრდილი ავადდება წლის განმავლობაში 2-3-ჯერ. ვირუსული ინფექციის მქონე ბავშვმა გამოჯანმრთელებამდე არ უნდა იაროს ბაღში. აქვე აღვნიშნავ, რომ მშობლებმა ბავშვებს თვითნებურად არ უნდა უმკურნალონ. განსაკუთრებით, თუ ეს ეხება სხვადასხვა ბაქტერიულ და მძიმე ინფექციებს.

- როგორ გავაკაჟოთ ბავშვები ზამთარში?

- ზამთარში ცურვაზე შეიძლება ბავშვების ტარება, თუმცა აუცილებელია, დაცული იყოს ჰიგიენური ნორმები. მე პირადად, ჰიპერრეაქტიული ბრონქების მქონე პაციენტებს ციგურაობაზე ვურჩევ ხოლმე სიარულს.

ესაუბრა თამარ კიკალიშვილი 

შეიძლება დაინტერესდეთ

„კვირაში ერთხელაც რომ გაიზომოთ წნევა და აღმოჩნდეს, რომ მაღალია, უნდა მიმართოთ ზომებს,“ - კარდიოლოგი ზურაბ ფაღავა

„კვირაში ერთხელაც რომ გაიზომოთ წნევა და აღმოჩნდეს, რომ მაღალია, უნდა მიმართოთ ზომებს,“ - კარდიოლოგი ზურაბ ფაღავა

კარდიოლოგმა ზურაბ ფაღავამ არტერიული წნევის მონიტორინგის მნიშვნელობაზე ისაუბრა. მან აღნიშნა, რომ ადამიანს წნევა დაბადებისთანავე ეზომება:

„წნევა იზომება ადამიანის დაბადებისთანავე. ​თუ ადამიანს წნევა არ აქვს, ის ცოცხალი არ არის. წნევა არის აუცილებელი იმისთვის, რომ სისხლი გადაადგილდეს ორგანოთა შორის. ადამიანმა პრევენციისთვის ზოგჯერ უნდა გაიზომოს წნევა. კვირაში ერთხელაც რომ გაიზომოთ წნევა და აღმოჩნდეს, რომ მაღალია, უნდა მიმართოთ ზომებს, რომ დაასაბუთოთ ეს წნევა ეპიზოდურად იყო მომატებული, თუ სისტემატურად ასეა.“

ზურაბ ფაღავამ არტერიული წნევის არაფარმაკოლოგიური მკურნალობის მეთოდებზე ისაუბრა:

„არაფარმაკოლოგიური მკურნალობაა, რომ ადამიანმა შეზღუდოს მარილის მიღება. ჩვეულებრივ ადამიანები იღებენ 10-12 გრამ მარილს დღეში. ეს უნდა შემცირდეს დღეში ხუთ გრამამდე. პაციენტებმა უნდა შეწყვიტონ თამბაქოს მოწევა. თამბაქო არის ძალიან ძლიერი გამომწვევი წნევის. ასევე უნდა შეიზღუდოს ალკოჰოლის მიღება, რადგან ​ნაბახუსევზე სისხლძარღვები არის ძლიერად შევიწროვებული.“

„არასწორია დამოკიდებულება, რომ ყველანაირი პასუხისმგებლობა დააკისრო ექიმს. აუცილებელია თანამშრომლობა პაციენტსა და ექიმს შორის. როდესაც ექიმი ნიშნავს წამალს, ეს სულაც არ ნიშნავს, რომ ეს წამალი აუცილებლად იმოქმედებს. აუცილებელია რაღაც დროის შემდეგ ისევ იმ ექიმთან მისვლა. პაციენტები ძალიან ხშირად იცვლიან ექიმებს. ეს არ მგონია სწორი,“ - აღნიშნულ საკითხებზე ზურაბ ფაღავამ ტელეკომპანია „იმედის“ გადაცემაში „დღის შოუ“ ისაუბრა.

წყარო: ​„დღის შოუ“

წაიკითხეთ სრულად