Baby Bag

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა, წელიწადში რამდენჯერ გაციება არის ნორმა და შეესაბამება თუ არა სიმართლეს მოსაზრება, რომ აცრა იწვევს აუტიზმს - ამ და სხვა აქტუალურ საკითხებზე ​MomsEdu.ge​-ს ცნობილი პედიატრი თემურ მიქელაძე  ესაუბრა.

- ბატონო თემურ, ვაქცინაციასთან დაკავშირებით საზოგადოების გარკვეულ ნაწილში კვლავ არსებობს მცდარი შეხედულება - აცრა იწვევს აუტიზმს და ა.შ.  რას ეტყოდით მშობლებს, რომლებიც არ ცრიან შვილებს?

- პირველ რიგში გეტყვით, რომ აცრა არ იწვევს აუტიზმს. ჩემი პირადი კონტროლის ქვეშ, 22 წლის განმავლობაში, გაკეთებულა დაახლოებით რამდენიმე ასეული ათასი დოზა ვაქცინებისა და არ დაფიქსირებულა არცერთი შემთხვევა, რომ ვაქცინას გამოეწვია აუტიზმი. მათ შორის, აუტიზმის მქონე ბავშვებიც ჩვეულებრივად იცრებიან. მქონია აუტიზმის მქონე ბავშვების შემთხვევებიც, რომლებიც საერთოდ არ არიან აცრილები.
 
მშობლებს ვეტყვი, რომ წითელას, დიფტერიის, ყივანახველის, ტეტანუსის და სხვა ინფექციების თავიდან ასაცილებლად აუცილებელია გეგმიური და დროული ვაქცინაცია. სახელმწიფოს შემოაქვს მაღალი ხარისხის ევროპული წარმოების ვაქცინები და მე პირადად, ვცრი ჩემს შვილებსაც. ჩვენ გვაქვს ერთ-ერთი ყველაზე სრულყოფილი გეგმიური ვაქცინაციის ეროვნული კალენდარი.

- საყოველთაო გრიპის აცრა რა ასაკიდან შეიძლება, გავუკეთოთ ბავშვს?

- გრიპის აცრა ბავშვს შეიძლება, ჩავუტაროთ 6 თვის ასაკიდან. გარდა ამისა, აცრა სასურველია, ჩაუტარდეს რისკ-ჯგუფის მქონე პაციენტებს. ესენია - 5 წლამდე ასაკის ხშირად მოავადე და სკოლამდელ დაწესებულებაში მყოფი ბავშვები, 65 წელს გადაცილებული ასაკის მქონე პირები, ორსულები, სამედიცინო პერსონალი, სხვადასხვა ქრონიკული პათოლოგიის მქონე პირები. 

გრიპის ვირუსს გააჩნია ანტიგენური სტრუქტურის სწრაფი ცვლილება ამიტომ ყოველ წელს კეთდება ახალი ანტიგენური სტრუქტურის ვაქცინები. აუცრელ პაციენტებს გრიპის ვირუსის დროს უმეტეს შემთხვევაში უტარდებათ სიმპტომური მკურნალობა. ზოგჯერ ჩვენ ვიყენებთ ანტივირუსულ პრეპარატებსაც.

- რას ურჩევდით მშობელს, რომლის შვილიც ბაღში დადის და ხშირად ავადობს, ვირუსების დროს ატაროს თუ არა ბავშვი ბაღში და წელიწადში რამდენჯერ გაციება არის ნორმა?

- აუცილებელია, განვმარტოთ რას ნიშნავს ხშირად ავადობა; 6 წლამდე ჯანმრთელმა ბავშვებმა წლის განმავლობაში შეიძლება, სხვადასხვა ვირუსული ინფექციებით იავადონ 6-10-მდე და ეს ნორმაა. ასაკის მატებასთან ერთად სიხშირე მცირდება და მოზრდილი ავადდება წლის განმავლობაში 2-3-ჯერ. ვირუსული ინფექციის მქონე ბავშვმა გამოჯანმრთელებამდე არ უნდა იაროს ბაღში. აქვე აღვნიშნავ, რომ მშობლებმა ბავშვებს თვითნებურად არ უნდა უმკურნალონ. განსაკუთრებით, თუ ეს ეხება სხვადასხვა ბაქტერიულ და მძიმე ინფექციებს.

- როგორ გავაკაჟოთ ბავშვები ზამთარში?

- ზამთარში ცურვაზე შეიძლება ბავშვების ტარება, თუმცა აუცილებელია, დაცული იყოს ჰიგიენური ნორმები. მე პირადად, ჰიპერრეაქტიული ბრონქების მქონე პაციენტებს ციგურაობაზე ვურჩევ ხოლმე სიარულს.

ესაუბრა თამარ კიკალიშვილი 

შეიძლება დაინტერესდეთ

„თუ სამიდან ექვს თვემდე ასაკის ბავშვის ტემპერატურა 39 გრადუსია, მას სახლში არ ვტოვებთ,“ - პედიატრი შორენა ქართველიშვილი

„თუ სამიდან ექვს თვემდე ასაკის ბავშვის ტემპერატურა 39 გრადუსია, მას სახლში არ ვტოვებთ,“ - პედიატრი შორენა ქართველიშვილი

პედიატრმა შორენა ქართველიშვილმა ბავშვებში მაღალი ტემპერატურის დროს მშობლის ქცევის წესების შესახებ ისაუბრა. მან აღნიშნა, რომ სამ თვემდე ასაკის ბავშვი 38 ტემპერატურით სახლში არ უნდა დავტოვოთ:

​თუ ტემპერატურა აქვს სამ თვემდე ასაკის ბავშვს და ტემპერატურის ციფრი 38-ია, უკვე ბავშვს სახლში აღარ ვტოვებთ. თუ სამიდან ექვს თვემდე ასაკის არის ბავშვი და მისი ტემპერატურის ციფრი 39 გრადუსია, ესეც უკვე რისკის ჯგუფია, უკვე მასაც სახლში აღარ ვტოვებთ. არსებობს ასევე ცხელებასთან არსებული გაუწყლოვების სიმპტომები, რომელსაც აუცილებლად აფასებს ექიმი და ასეთ შემთხვევაში განიხილება მისი სტაციონარში გადაყვანა.“

შორენა ქართველიშვილის თქმით, როდესაც ტემპერატურა არ ექვემდებარება მედიკამენტებს, ბაქტერიულ ინფექციაზე უნდა ვიფიქროთ:

​თუ ტემპერატურა არ ექვემდებარება მედიკამენტებს და ხველაც ხანგრძლივდება, ასეთ შემთხვევაში უნდა ვიფიქროთ თანდართულ ბაქტერიულ ინფექციაზე და უფრო ალტერნატიულ, სხვა დიაგნოზებზე, მაგრამ ეს უნდა მოხდეს აუცილებლად ექიმის მიერ. არის ორი ჯგუფის პრეპარატი: პარაცეტამოლი და იბუპროფენი, ორივე პრეპარატის ერთად მიღება კატეგორიულად არ შეიძლება.“

„ჩვენ ხშირად მოგვმართავენ მშობლები და გვეუბნებიან: ჩემს შვილს ძალიან სუსტი იმუნური სისტემა აქვს. ძალიან ხშირია ასეთი მშობელი. ჩვენ ვეკითხებით, რამდენჯერ ავადობს ბავშვი წელიწადში. ის გვეუბნება, რომ დაახლოებით ოთხჯერ-ხუთჯერ. ჩვენ ვპასუხობთ, რომ მის შვილს ნამდვილად არ აქვს სუსტი იმუნური სისტემა. თუ ბავშვი წელიწადში რვაჯერ და ცხრაჯერ ავად ხდება და ეს ავადობა გრძელდება 7-დან 14 დღემდე, გაციებათა შორის პერიოდში კი ბავშვი ჯანმრთელია, ითვლება, რომ მისი იმუნური სისტემა აბოსლუტურად ნორმალურია,“ - აღნიშნულ საკითხებზე შორენა ქართველიშვილმა რადიო ფორტუნას ეთერში ისაუბრა.

წყარო: ​რადიო ფორტუნა

წაიკითხეთ სრულად