Baby Bag

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა და წელიწადში რამდენჯერ გაციება არის ნორმა - ინტერვიუ პედიატრ თემურ მიქელაძესთან

რა ასაკიდან შეიძლება, გავუკეთოთ ბავშვს საყოველთაო გრიპის აცრა, წელიწადში რამდენჯერ გაციება არის ნორმა და შეესაბამება თუ არა სიმართლეს მოსაზრება, რომ აცრა იწვევს აუტიზმს - ამ და სხვა აქტუალურ საკითხებზე ​MomsEdu.ge​-ს ცნობილი პედიატრი თემურ მიქელაძე  ესაუბრა.

- ბატონო თემურ, ვაქცინაციასთან დაკავშირებით საზოგადოების გარკვეულ ნაწილში კვლავ არსებობს მცდარი შეხედულება - აცრა იწვევს აუტიზმს და ა.შ.  რას ეტყოდით მშობლებს, რომლებიც არ ცრიან შვილებს?

- პირველ რიგში გეტყვით, რომ აცრა არ იწვევს აუტიზმს. ჩემი პირადი კონტროლის ქვეშ, 22 წლის განმავლობაში, გაკეთებულა დაახლოებით რამდენიმე ასეული ათასი დოზა ვაქცინებისა და არ დაფიქსირებულა არცერთი შემთხვევა, რომ ვაქცინას გამოეწვია აუტიზმი. მათ შორის, აუტიზმის მქონე ბავშვებიც ჩვეულებრივად იცრებიან. მქონია აუტიზმის მქონე ბავშვების შემთხვევებიც, რომლებიც საერთოდ არ არიან აცრილები.
 
მშობლებს ვეტყვი, რომ წითელას, დიფტერიის, ყივანახველის, ტეტანუსის და სხვა ინფექციების თავიდან ასაცილებლად აუცილებელია გეგმიური და დროული ვაქცინაცია. სახელმწიფოს შემოაქვს მაღალი ხარისხის ევროპული წარმოების ვაქცინები და მე პირადად, ვცრი ჩემს შვილებსაც. ჩვენ გვაქვს ერთ-ერთი ყველაზე სრულყოფილი გეგმიური ვაქცინაციის ეროვნული კალენდარი.

- საყოველთაო გრიპის აცრა რა ასაკიდან შეიძლება, გავუკეთოთ ბავშვს?

- გრიპის აცრა ბავშვს შეიძლება, ჩავუტაროთ 6 თვის ასაკიდან. გარდა ამისა, აცრა სასურველია, ჩაუტარდეს რისკ-ჯგუფის მქონე პაციენტებს. ესენია - 5 წლამდე ასაკის ხშირად მოავადე და სკოლამდელ დაწესებულებაში მყოფი ბავშვები, 65 წელს გადაცილებული ასაკის მქონე პირები, ორსულები, სამედიცინო პერსონალი, სხვადასხვა ქრონიკული პათოლოგიის მქონე პირები. 

გრიპის ვირუსს გააჩნია ანტიგენური სტრუქტურის სწრაფი ცვლილება ამიტომ ყოველ წელს კეთდება ახალი ანტიგენური სტრუქტურის ვაქცინები. აუცრელ პაციენტებს გრიპის ვირუსის დროს უმეტეს შემთხვევაში უტარდებათ სიმპტომური მკურნალობა. ზოგჯერ ჩვენ ვიყენებთ ანტივირუსულ პრეპარატებსაც.

- რას ურჩევდით მშობელს, რომლის შვილიც ბაღში დადის და ხშირად ავადობს, ვირუსების დროს ატაროს თუ არა ბავშვი ბაღში და წელიწადში რამდენჯერ გაციება არის ნორმა?

- აუცილებელია, განვმარტოთ რას ნიშნავს ხშირად ავადობა; 6 წლამდე ჯანმრთელმა ბავშვებმა წლის განმავლობაში შეიძლება, სხვადასხვა ვირუსული ინფექციებით იავადონ 6-10-მდე და ეს ნორმაა. ასაკის მატებასთან ერთად სიხშირე მცირდება და მოზრდილი ავადდება წლის განმავლობაში 2-3-ჯერ. ვირუსული ინფექციის მქონე ბავშვმა გამოჯანმრთელებამდე არ უნდა იაროს ბაღში. აქვე აღვნიშნავ, რომ მშობლებმა ბავშვებს თვითნებურად არ უნდა უმკურნალონ. განსაკუთრებით, თუ ეს ეხება სხვადასხვა ბაქტერიულ და მძიმე ინფექციებს.

- როგორ გავაკაჟოთ ბავშვები ზამთარში?

- ზამთარში ცურვაზე შეიძლება ბავშვების ტარება, თუმცა აუცილებელია, დაცული იყოს ჰიგიენური ნორმები. მე პირადად, ჰიპერრეაქტიული ბრონქების მქონე პაციენტებს ციგურაობაზე ვურჩევ ხოლმე სიარულს.

ესაუბრა თამარ კიკალიშვილი 

შეიძლება დაინტერესდეთ

„ბავშვი კონდიციონერთან უნდა იყოს მაქსიმუმ ოთხი საათის განმავლობაში,“ - ინფექციონისტი მაია ქაჩლიშვილი

„ბავშვი კონდიციონერთან უნდა იყოს მაქსიმუმ ოთხი საათის განმავლობაში,“ - ინფექციონისტი მაია ქაჩლიშვილი

​​ინფექციონისტმა მაია ქაჩლიშვილმა ბავშვებთან კონდიციონერის გამოყენების წესების შესახებ ისაუბრა. მან აღნიშნა, რომ კონდიციონერის გამოყენება ბავშვთან საჭიროა, თუ გარემო ტემპერატურა 35 გრადუსზე მაღალია, ბავშვი არ ჭამს და არ იძინებს:

„თუ გარემო ტემპერატურა არის 35 გრადუსზე მაღალი, ბავშვი არც ჭამს, არც იძინებს, აქედან გამომდინარე ზაფხულში კონდიციონერის არსებობა აუცილებელი ფაქტორია. მე ძალიან ხშირად მიხდება ბრძოლა და ახსნა-განმარტება პაციენტის მშობელთან, რომ კონდიციონერი უნდა ჩართოს. ჩვილი ბავშვები რომ იბადებიან, ახალშობილები, ისინიც იმყოფებიან იმ გარემოში.“

მაია ქაჩლიშვილის თქმით, როდესაც ბავშვს სძინავს, კონდიციონერის გამოყენება რეკომენდებული არ არის:

„გარემო ტემპერატურა როდესაც არის 35 გრადუსზე მეტი, ამ შემთხვევაში უნდა გამოვიყენოთ კონდიციონერი. შიდა სივრცეში ტემპერატურა უნდა იყოს 22-დან 24 გრადუსამდე. ძილის პერიოდში ბავშვთა ასაკში კონდიციონერის გამოყენება არ არის რეკომენდებული. იმ გარემოში, სადაც კონდიციონერი დგას, ბავშვი უნდა იყოს სამი მეტრის დაშორებით. კონდიციონერის შეძენისას უნდა გავითვალისწინოთ, რომ მას უნდა ჰქონდეს ჰაერის და ტემპერატურის მარეგულირებელი. რაც უფრო მაღალი ხარისხის არის კონდიციონერი, მით მეტად უსაფრთხოა.“

„გამოშრობის საპროფილაქტიკოდ უნდა ვსვათ ბევრი წყალი კონდიციონერის ქვეშ. ​ბავშვი კონდიციონერთან უნდა იყოს მაქსიმუმ ოთხი საათის განმავლობაში. გარდა სარგებლისა, კონდიციონერს აქვს ძალიან მავნე გვერდითი მოვლენები. შიგნითა და გარეთა ტემპერატურას შორის სხვაობა უნდა იყოს ყველაზე ცოტა ოთხი გრადუსი. არ არის სასარგებლო ის, რომ ძალიან ციოდეს ოთახში და გარეთ მაღალი ტემპერატურა იყოს. ამ ტემპერატურის ცვლილებას ადამიანის ორგანიზმი ძალიან ცუდად იტანს. გადაციების ფაქტორი არის ძალიან ცუდი. სანამ სეზონი დაიწყება კონდიციონერი აუცილებლად უნდა გაიწმინდოს. მას აქვს ფილტრები და რომ ნახოთ ეს ფიტლრები რა საშინელ რაღაცებს შეიცავს, ის ან გამდინარე წყლით უნდა გაირეცხოს, ან მტვერსასრუტის საშუალებით გაიწმინდოს. როდესაც კონდიციონერში გროვდება ჭუჭყი, იქ მრავლდება ბაქტერიები, პარაზიტები, სოკო,“ - აღნიშნულ საკითხზე მაია ქაჩლიშვილმა ტელეკომპანია „ფორმულას“ გადაცემაში „დილა ფორმულაზე“ ისაუბრა.

წყარო: ​„დილა ფორმულაზე“

წაიკითხეთ სრულად