Baby Bag

როგორ დავიკლოთ წონაში ეფექტიანად დიეტის გარეშე? - მარიამ მდინარაძე პირად გამოცდილებას გვიზიარებს

როგორ დავიკლოთ წონაში ეფექტიანად  დიეტის გარეშე? - მარიამ მდინარაძე პირად გამოცდილებას გვიზიარებს

ტელეწამყვანმა მარიამ მდინარაძემ წონაში კლების საკუთარი გამოცდილების შესახებ ისაუბრა. მისი თქმით, მან დიეტის გარეშე წონის საგრძნობლად დაკლება შეძლო:

„ძალიან გამხდარი არასდროს არ ვყოფილვარ. მშობიარობის შემდეგ მოვიმატე. ეს იყო საკვებით გამოწვეული. ძალიან ბევრს ვჭამდი და ეს იყო მიზეზი. მინდა გაგიზიაროთ წონაში კლების ჩემი მეთოდი, რომელიც რამოდენიმე პუნქტისგან შედგება. პირველი პუნქტი არის: „არ ვარ დიეტაზე.“ როდესაც გადავწყვიტე წონაში დაკლება, ვთქვი, რომ არ ვიქნები დიეტაზე. ასეთი კვების რეჟიმზე უნდა იყოს ყველა ადამიანი მთელი ცხოვრება. შემდეგი პუნქტი არის: „ვიწონებით ყოველდღე.“ 3-4 კილოს როდესაც იკლებს ჭარბწონიანი ადამიანი, ეს არ არის შესამჩნევი, რის გამოც ხელს იქნევენ და თავს ანებებენ. ჩემი მიზანი იყო, რომ ყოველ მომდევნო დღეს ვყოფილიყავი 100 გრამით უფრო ნაკლები, ვიდრე წინა დღეს. ამისთვის მნიშვნელოვანია ელექტრო სასწორი. საუზმემდე აიწონეთ.“

მარიამ მდინარაძის თქმით, წონაში დასაკლებად დღეში ოთხჯერ უნდა მიირთვათ:

„შემდეგი პუნქტი არის: „ვჭამთ დღეში ოთხჯერ.“ ვჭამთ თითქმის ყველაფერს. მთავარია, რამდენს ვჭამთ. ამის გასაზომად საუკეთესო საზომია თეფში. თეფშს თვალით ვყოფთ შუაზე. ნახევარი უნდა იყოს ბოსტნეული, ასევე უნდა გვქონდეს ცილა და გარნირი. საუზმეზე შეიძლება იყოს ორი კვერცხის ომლეტი და პური, ან ყველის სენდვიჩი, ან ხაჭაპური. რა თქმა უნდა, ეს უნდა იყოს ერთი ნაჭერი და არა - სამი. სადილზე შეგიძლიათ დიდი თეფშით ლობიო, ან ბოსტნეული, გარნირი და კატლეტი, ან ერთი თეფში წიწიბურა. ბოლო ორი კვება უმჯობესია იყოს ხორცი-ბოსტნეული. საღამოს რძის პროდუქტები არის ძალიან კარგი. თუ დილით 9-ზე ვსაუზმობთ, ბოლო კვებაც იქნება საღამოს 9 საათზე.“

„უარს ვამბობთ შაქარზე სუფთა სახით. უმჯობესია კარაქი გამონაკლის შემთხვევებში მივირთვათ. თუ არჩევანი გვაქვს მოხარშულსა და შემწვარს შორის, ავირჩიოთ მოხარშული. ნატურალური წვენიც აფერხებს წონის კლების პროცესს და თუ შეგიძლიათ უარის თქმა, თქვით უარი. გამონაკლის შემთხვევებში უნდა მივირთვათ მაიონეზი, ნამცხვარი. ერთადერთი, რისი არსებობაც უნდა დავივიწყოთ, არის ტკბილი გაზიანი სასმელები. ასეთი ტემპით თვეში 4 კილოგრამის დაკლება შეგიძლიათ,“- აღნიშნულ საკითხზე მარიამ მდინარაძემ ტელეკომპანია „იმედის“ გადაცემაში „იმედის დღე“ ისაუბრა.

წყარო: ​„იმედის დღე“

შეიძლება დაინტერესდეთ

​როდიდან უნდა გადავიყვანოთ ბავშვი მყარ კვებაზე და რა უნდა შედიოდეს საკვებ რაციონში? - თემაზე MomsEdu.ge-ს პედიატრი თათია სხირტლაძე ესაუბრა

​როდიდან უნდა გადავიყვანოთ ბავშვი მყარ კვებაზე და რა უნდა შედიოდეს საკვებ რაციონში? - თემაზე MomsEdu.ge-ს პედიატრი თათია სხირტლაძე ესაუბრა

როდიდან უნდა გადავიყვანოთ ბავშვი მყარ კვებაზე და რა უნდა შედიოდეს საკვებ რაციონში? - ამ თემაზე MomsEdu.ge-ს პედიატრი თათია სხირტლაძე ესაუბრა.

რა ასაკამდე უნდა იყოს ბავშვი ბუნებრივ კვებაზე?

- დედის რძე ახალშობილი და ჩვილი ბავშვის სრულფასოვანი საკვებია. ბუნებრივი კვების გაგრძელება რეკომენდებულია 2 წლამდე, რა თქმა უნდა, 6 თვიდან დამატებით საკვებთან ერთად. 2 წლამდე ძუძუთი კვება ხელს უწყობს ბავშვის გონებრივ განვითარებას და მოზრდილ ასაკში ქრონიკული დაავადებებისა და სიმსუქნის განვითარების რისკის შემცირებას.

- რა ასაკიდან უნდა გადავიყვანოთ მყარ საკვებზე?

- დამატებითი საკვების მიღების საუკეთესო პერიოდად 6 თვის ასაკია მიჩნეული, იშვიათ შემთხვევაში, განსაზღვრული ჩვენებით და ექიმის გადაწყვეტილებით, დამატებითი კვება ინიშნება 4 თვიდან. პირველი 6 თვის განმავლობაში დედის რძე ან ხელოვნური ნარევი სრულად აკმაყოფილებს ჩვილის მოთხოვნილებას საკვებსა და სითხეზე. ბავშვის ინტენსიურ ზრდასთან ერთად იზრდება მისი კვებითი და ენერგეტიკული მოთხოვნილება, რის გამოც აუცილებელია დედის რძესთან ან ხელოვნურ ფორმულასთან ერთად დამატებითი საკვების მიწოდება. 6 თვიდან საკვების დაწყება ემყარება ასევე ბავშვის ნერვ-კუნთოვანი და საჭმლის მომნელებელი სისტემის მომწიფებას და მზაობას მიიღოს ნახევრადმყარი საკვები, ვითარდება „ღეჭვის რეფლექსი“, შეუძლია ლუკმის ფორმირება და გადაყლაპვა, იწევს საკვებისკენ და აღებს პირს, როცა შია.

- მთლიანი ულუფები უნდა მივცეთ თუ დედის რძესთან ერთად, ნელ-ნელა მივაწოდოთ სხვადასხვა პროდუქტი?

- დამატებით საკვებს მიეკუთვნება ნახევარად მყარი საკვები, როგორებიცაა: მარცვლეულის ფაფა, ბოსტენულის პიურე, ხილფაფა, ხორცისგან დამზადებული საკვები.

ბუნებრივი კვებიდან დამატებით კვებაზე გადასვლა ხორციელდება ეტაპობრივად. პირველ ეტაპზე, ბავშვი ეჩვევა საკვების კოვზიდან მიღებას, პირის ღრუში საკვების გადაადგილებას და გადაყლაპვას, ამიტომ პირველი საკვები უნდა იყოს მცირე რაოდენობის, რბილი კონსისტენციის და შეიცავდეს ერთ ინგრედიენტს.

ბუნებრივი კვება გრძელდება მოთხოვნილების მიხედვით. როდესაც ბავშვი მიეჩვევა კოვზიდან კვებას, უნდა შესთავაზოთ მრავალფეროვანი, შედარებით სქელი კონსისტენციის პიურე ან ფაფა. დაახლოებით 9 თვის ასაკიდან კი ბავშვს შეუძლია მიიღოს დაკეპილი, დაჭყლეტილი საკვები, რაც ხელს უწყობს ღეჭვის განვითარებას. დამატებითი საკვები ეძლევა 2-3 ჯერ დღეში, კვებათა შორის რეკომენდებულია წახემსება - ხილი, ორცხობილა და ა.შ.

ბავშვებისთვის საკვები უნდა მომზადდეს ყოველი კვების წინ ჰიგიენური ნორმების დაცვით და არ არის რეკომენდებული ორი ან მეტი სახეობის ახალი პროდუქტის ერთდროული მიცემა, ბავშვის შეგუება ახალ საკვებთან უნდა მოხდეს თანდათანობით. შესთავაზეთ ბავშვს დამატებითი საკვების მცირე ულუფა (1-2 კოვზი) და ყოველდღიურად გაზარდეთ საკვების რაოდენობა.

ფაფებით უნდა დავიწყოთ თუ ხილ-ბოსტნეულით, რომელი უმჯობესია?

- მკაცრი გამიჯვნა, პირველ ეტაპზე, რომელი უმჯობესია, არ გვაქვს. მარცვლეულის ფაფის დამატება იწყება უგლუტეინო მარცვლეულით, როგორებიცაა - წიწიბურა, ბრინჯი, სიმინდი.

ბოსტნეულის და ხილფაფის პიურეს დაწყება ხდება ერთი სახეობის პროდუქტით, რომელსაც თანდათან ემატება განსხვავებული ხილი და ბოსტნეული 1-2 დღიანი ინტერვალით.

- რა ასაკიდან უნდა შემოვიტანოთ რაციონში ხორცი და როგორი სახით შევთავაზოთ?

- ხორცი ჩვილის რაციონში აუცილებელია დაემატოს 7-8 თვის ასაკიდან. ხორცი მდიდარია ცილით, ასევე შეიცავს რკინას, ბ ჯგუფის ვიტამინებს, ამინომჟავებს, რომლებიც აუცილებელია ბავშვის ზრდა-განვითარებისთვის. თავდაპირველად ხორცის მიცემა უმჯობესია დაქუცმაცებული სახით, ბოსტნეულის პიურესთან ერთად, კვირაში 3-4-ჯერ. არ არის რეკომენდებული ხორცის ნახარშის, ბულიონის მიცემა 2 წლამდე. ამიტომ ხორცი იხარშება ცალკე და შემდეგ ხდება შერევა ბოსტნეულთან. ბავშვის რაციონში ხორცის დამატება უმჯობესია დავიწყოთ ფრინველის ხორცით, ინდაურით ან ქათამით, რომელიც მდიდარია სასარგებლო ნივთიერებებით, ადვილად ათვისებადია და არ იწვევს ალერგიას, შემდეგ ემატება ხბოს და კურდღლის ხორცი.

ესაუბრა მარიამ ჩოქური

წაიკითხეთ სრულად